Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ФЕССАЛОНИКА КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 3

3-тӥ ЛЮКЕТ

1Соин ик чиданмы бырем бере Афиные ми огнамы кылёно кариськимы.2Соку ми тӥ доры асьмелэсь агай-вынмес Тимофеез ыстӥмы – Христослэсь Ӟеч Иворзэ тодытонын милемын ӵош Инмар понна ужась-тыршисез. Со тӥледыз мед юнматоз, оскондэс мед кужмоятоз шуыса, сое ыстӥмы.3Та куректон-кайгуосын сэрен нокин но медаз ни отчы-татчы шонаськы: тӥ асьтэос тодӥськоды, асьмелы та вылӥысен сётэмын.4Ми соку но, тӥ доры вуылыкумы, азьвыл ик тӥледлы вераллямы, курадӟонъёс адӟылоно луомы шуыса. Кызьы тӥ тодӥськоды, озьы ик луиз но.5Соин ик мон но чидатэк ини тӥляд осконды сярысь тодыны Тимофеез ыстӥ, визь сынась кызьы ке но тӥлесьтыд визьдэс медаз сына вал но ужам ужмы юнме медаз луы вал шуыса.

6Нош табере, тани, тӥ дорысь али гинэ Тимофей берытскиз но тӥляд осконды, тӥляд яратонды сярысь умой ивор вайиз. Со вераз, тӥ, пе, милемыз ялан ӟечен тодады вайиськоды, милемыз туж адӟемды потыса улӥськоды, кызьы ми но тӥледыз адӟеммы потыса улӥськомы.7Ми пӧртэм куректон-кайгуос пӧлын, ёрмыса улӥськомы ке но, агай-вынъёсмы, тӥляд осконды сярысь тодыса, ми буйгатскимы.8Табере тӥ Кузё-Инмар бордын юн сылӥськоды бере, ми каньылак шокчыны быгатӥськомы ни.9Тӥ понна Инмарлы кызьы меда ми тау карыны быгатомы? Вань со шумпотонэз милемлы ваемды понна ми Инмармы азьын шумпотэммес вераськомы.10Уй но нунал вань сюлмысьтымы со понна вӧсяськиськомы: тӥледын пумиськыны мед быгатысалмы на, тӥляд осконады маиз уг на тырмы, сое ватсаны мед быгатысалмы на шуыса.

11Ачиз Инмар, милям Атаймы но милям Кузё-Инмармы Иисус Христос милесьтым тӥ доры сюресмес мед ӵошкатысал.12Нош Кузё-Инмар тӥледлы ог-огдэс, мукетъёссэ но яратонэз пачыл мед кароз, кызьы ми но тӥледыз пумтэм яратӥськомы.13Кузё-Инмармы Иисус Христос Аслаз вань святойёсыныз валче лыктон нуналэ Инмармы, Атаймы азьын Со тӥлесьтыд сюлэмъёстэс дун-сьӧлыктэм, дун-шектэм карыса мед юнматоз. Аминь.


предыдущая глава Глава 3 следующая глава