Выбрать язык
Книги Ветхого Завета
Книги Нового Завета
с русским текстом1Инмар Кузё-Инмар мыным таӵе адӟон усьтӥз: тани, кисьмам емышен корзина.2Со шуиз: «Амос, мае тон адӟиськод?» Мон шуи: «Кисьмам емышен корзинаез». Соку Кузё-Инмар мыным шуиз: «Израиль калыкелы пум вуиз: азьланяз сьӧлыкъёссэ уг ни кушты».
3Со нуналэ четлыкысьтыз-юртысьтыз кырӟан гуръёс викышъяса бӧрдонлы пӧрмозы, – шуэ Инмар Кузё-Инмар. – Трос шӧйёс луозы, пӧртэм интыосы соосты шыпытэн куялозы.
4Куанеръёсты ньылыны, кураськисьёсты быдтыны ёрмисьёс,
кылзэ тае, –
5тӥ, тазьы шуисьёс: «Куке но ортчоз выль толэзьлэн потон дырыз,
суббота но ортчоз, соку ми нянь вузаны быгатомы, –
соку ми ю кеносъёсмес усьтомы, мертэтмес пичиятомы,
сӥкльлэсь дунзэ будэтомы, шонертэм весэн пӧяломы.
6Соку ми начар улӥсьёсты азвесен басьтыны быгатомы,
куанеръёсты одӥг куз пыдкутчанэн воштомы,
жагесь юэз вузаломы».
7Кузё-Инмар Иаковлэн дано нимыныз кыл сётӥз:
зэм ик, одӥг ужзэс но ноку уг вунэты!
8Талы луыса музъем уз зурка-а, котькудӥз отын улӥсь уз бӧрды-а?
Шур кадь быдэс музъем тулкымъяськоз,
Египетысь шур кадь со ӝутскылоз, лэзиськылоз.
9Со нуналэ тазьы луоз, – шуэ Инмар Кузё-Инмар, –
нуназе шорын шундыез пуксён интыяз пукто,
югыт нуналын музъемез пеймыт каро.
10Праздник нуналъёстэс ӝожен улонлы пӧрмыто,
вань кырӟанъёстэс бӧрдыса кырӟато,
ваньдылэсь кусъёстэс чурыт бышкись дӥськутэн думылыто,
ваньдылэсь йырдэс гольык кельто;
одӥг гинэ пи понна кызьы бӧрдо,
озьы бӧрдозы та секыт нуналэ та кунын.
11Тани, вуо нуналъёс, – шуэ Инмар Кузё-Инмар, –
музъем вылэ сютэм аръёс лэзё, –
няньлы ӟудон-ёрмон уз луы, вулы ӟудон-ёрмон уз луы, –
Кузё-Инмарлэсь кылзэ кылэм потонлы ӟудыса-ёрмыса улон луоз.
12Одӥг зарезь дорысен мукет зарезь дорозь,
уйпаласен шундыӝужан пала ветлозы,
Кузё-Инмарлэсь кылзэ кылэмзы потыса ветлозы, но сое уз кылэ.
13Со нуналэ, талы чидатэк,
чебересь нылъёс, егит пиос пашмозы-катьтэммозы.
14Соос Самарияысь калыклэн сульдэръёсызлэн нимынызы
кыл сёто но шуо:
«Улэп тынад Инмаред, Дан! Улэп тынад сюресэд, Вирсавия!»
Соос усёзы но ноку но уз ни султэ.
Глава 8