Выбрать язык
Книги Ветхого Завета
Книги Нового Завета
с русским текстом1Куректон-кайгу Сӥонын сюлмаськытэк улӥсьёслы,
Самария гурезьлы оскиськыса улӥсьёслы,
тужгес но сӥё-сано калыклэн нимо-даноосызлы,
кинъёс доры Израиль калык ветлэ.
2Ортче Калне кар пыр, учкелэ, отысен быдӟым Емафе выже,
филистим музъемысь Геф каре ваське:
та эксэйлыкъёслэсь соос умоесьгес ӧвӧл-а?
Соослэн шаерзы тӥляд сярысь паськытгес ӧвӧл-а?
3Тӥ, шугадӟон нунал кыдёкын ай шуыса лыдъясьёс,
ёртыса-ӝикатыса улонлэсь кузёяськон дырзэ матэ кариськоды, –
4тӥ, слон лылэсь лэсьтэм кроватьёс вылын кыллисьёс,
валес вылады эркияськыса кыллиськоды,
ыж уллёысь быръем ыжъёсты сииськоды,
турыно возь вылъёсысь кунянъёсты сииськоды;
5крезь шудэмъя кырӟаськоды,
малпаськоды, Давид кадь шудыны быгатӥськоды шуыса;
6бадӟым сюмыкъёсысь вина юиськоды,
самой ӟеч вӧйёсын зыраськиськоды,
нош Иосифлэн курадӟонэз пумысен уд куректӥське!
7Со понна табере соос мурт киулэ
пленэ шедемъёслэн азьпалазы мынозы,
соку эркияськыса улӥсьёслэн
шумпотыса-шулдыръяськыса улонзы быроз.
8Инмар Кузё-Инмар Аслаз нимыныз кыл сётэ,
тазьы шуэ Саваоф Инмар Кузё-Инмар:
Иаковлэсь вылтӥяськыса улэмзэ синазькыль карисько,
солэсь юртъёссэ-четлыкъёссэ адӟеме уг поты,
солэсь городзэ но мар отын вань, мурт кие сёто.
9Тазьы луоз: кыӵе ке корка дас мурт кылиз ке, соос но кулозы.10Ӵыжы-выжызы яке сутӥсь мурт соосты кутоз но лыоссэс коркась поттоз, коркан эшшо улӥсь муртлэсь юалоз: «Тынад кинэд ке вань на-а?» Соиз шуоз: «Нокинэ но ӧвӧл». Соку таиз шуоз: «Шып ул! Кузё-Инмарлэсь нимзэ вераны уг яра».
11Уго тани, Кузё-Инмар косоз но
бадӟымесь коркаосты шори пильылоз,
пичиоссэ тэрскатылоз.
12Изгурезь кузя валъёс ворттыло-а? Ошъёсын сое гыро-а?
Нош тӥ шонер судэз ядлы пӧрмытӥськоды,
шонерлыклэсь емышсэ – курыт макелы.
13Тӥ, чик кулэтэм арбериосын ушъяськисьёс, шуиськоды: «Таӵе быдӟымлыкмес ми асьме кужымен ӧм поттэ-а?»14Тани, Мон, – шуэ Саваоф Инмар Кузё-Инмар, – тӥледлы пумит, Израиль выжы, калыкез ӝуто, соос тӥледыз Емафе пырон дорысен луоё кырысь шур дорозь ӝикатыса возёзы.
Глава 6