Выбрать язык
Книги Ветхого Завета
Книги Нового Завета
с русским текстом2-тӥ книга
1Иудей музъемысь калык Иосиялэсь Иоахаз пизэ кутӥз но, вӧйын зырӟыса, атаез интые Иерусалиме эксэе пуктӥз.2Эксэе пуксьыкуз, Иоахазлы кызь куинь арес вал, Иерусалимын со куинь толэзь ӵоже эксэй пуконын пукиз. [Анаезлэн нимыз Амитал, со Ловнаысь Иеремиялэн нылыз вал. Атайёсыз сямен ик вань удысъёсын Кузё-Инмар азьын кескич ужъёс лэсьтыса улӥз. Иерусалимын со эксэй медаз ни луы шуыса, Нехао фараон сое Емаф музъемысь Девлафаын жильыен дурылӥз.]3Египетлэн эксэез сое Иерусалимын эксэй пуконысь куштӥз, [эксэй сое Египетэ нуиз], Иудей музъемлы сю талант азвесь, талант зарни тырон понӥз.4Египетлэн эксэез Иудеялы но Иерусалимлы Иоахазлэсь Елиаким братсэ эксэе пуктӥз, солэсь нимзэ воштӥз, Иоаким кариз, нош солэсь агайзэ, Иоахазэз, Нехао кутыса Египетэ нуиз, [со отчы кулӥз. Азвесь но, зарни но фараонлы сётъяз: соку, фараонлэн косэмезъя, та музъемын улӥсь калык солы азвесен выт тырыны кутскиз; котькудӥз кивалтӥсь та музъемын улӥсь калыклэсь Нехао эксэйлы зарниен но азвесен выт тырыны курыны кутскиз].
5Эксэе пуксьыкуз, Иоакимлы кызь вить арес вал, Иерусалимын эксэй пуконын со дас одӥг ар пукиз. [Анаезлэн нимыз Зехора, со Рамаысь Нириялэн нылыз вал.] Инмарезлэн Кузё-Инмарлэн азяз атайёсыз кадь ик ярантэм ужъёс лэсьтыса улӥз. [Со эксэйын пукон аръёсы Иудей музъем вылэ вуиз Вавилонлэн Навуходоносор эксэез, Иоаким солы куинь ар ӵоже ужаса-тыршыса улӥз, собере со дорысь палэнскиз. Соос вылэ Кузё-Инмар халдейёсты но Сирияысь йыртэмасьёсты, Моав музъемысь йыртэмасьёсты, аммон но самария пиосты ыстӥз, – Кузё-Инмарлэн Ас ляльчиосыз, пророкъёс, пыр верам кылызъя соос Иудей музъемысь кошкизы. Манассиялэн вань лэсьтэм сьӧлыкъёсыз понна Кузё-Инмарлэн вожпотонэз иудей калык вылын улӥз, Аслаз азьысьтыз сое кулэтэм карон понна, озьы ик Иоакимлэн сьӧлыктэм вирез кисьтэмез понна, сьӧлыктэм вирын Иерусалимез тырмытэмез понна. Но Кузё-Инмарлэн соосты выжытэм быдтэмез ӧз поты].6Иоакимлэн пумитаз Вавилонлэн Навуходоносор эксэез потӥз но сое Вавилонэ нуыны жильыосын думылӥз.7Кузё-Инмар коркась сосудъёс пӧлысь оглюкетсэ Навуходоносор Вавилонэ нуиз, Вавилонысь куала пушказ понӥз.
8Иоакимлэн мукет ужъёсыз, юрӟым ужъёсыз, кудъёссэ со лэсьтӥз, кудъёсыз со пушкысь шедьтэмын, соос Израильлэн но Иудеялэн эксэйёсызлэн книгаязы гожтэмын. [Атайёсыз кадь ик Иоаким кулӥз но, сое атайёсынызы огазе Ганозанэ ватӥзы.] Со интые Иехония пиез эксэе пуксиз.
9Эксэе пуксьыкуз, Иехониялы дас тямыс арес вал, куинь толэзь но дас нунал ӵоже со Иерусалимын эксэй пуконын пукиз, Кузё-Инмарлэн азяз со ярантэм ужъёс лэсьтыса улӥз.10Ар кутскыку, Иехонияез Кузё-Инмар коркась дуно сосудъёсын ӵош Вавилонэ нуыны косыса, Навуходоносор адямиоссэ Иерусалиме ыстӥз; Иудеяен Иерусалимлы эксэе солэсь Седекия братсэ пуктӥз.
11Эксэе пуксьыкуз, Седекиялы кызь одӥг арес вал, дас одӥг ар ӵоже со Иерусалимын эксэй пуконын пукиз но12Инмарезлэн Кузё-Инмарлэн азяз ярантэм ужъёс лэсьтыса улӥз. Кузё-Инмарлэсь кылзэ тодытӥсь Иеремия пророклы со ӧз тэрытскы.13Инмарлэн нимыныз кыл сётытӥсь Навуходоносор эксэй бордысь со куштӥськиз, – чыртызэ куасалляськисьтэм кариз, сюлэмзэ сокем лекомытӥз, – Израильлэн Инмарез Кузё-Инмар пала ӧз берытскы.14Священникъёсын но, калыкен но вань кивалтӥсьёс трос сьӧлыказы, язычникъёслэсь юрӟым ужъёссэс санэ поныса улӥзы, Иерусалимысь Кузё-Инмарлэсь дун-чылкыт карем корказэ саптазы.15Атайёссылэн Инмарзы Кузё-Инмар вазь ӵукнаысен ик соос доры Аслэсьтыз адямиоссэ ыстылӥз, уго Солы Аслаз калыкез, Аслаз улон интыез жаль потэ вал.16Нош соос Инмар дорысь ыстэм муртъёсты сантэмаллязы, Солэсь кылъёссэ кулэтэм карылӥзы, Кузё-Инмарлэн вожпотонэз калыкез вылэ вуытозь, Солэсь пророкъёссэ тышкаськылӥзы, озьы калыклы утиськон ӧз ни кыльы.17Соку соос вылэ Со халдейёслэсь эксэйзэс лэзиз, святой корказы егит пиоссэс со мечен виылӥз, Седекияез но, егит пиосты но, егит нылъёсты но, пересь муртъёсты но, пурысьтам пересьёсты но ӧз жаля: Инмар ваньзэ солэн киулаз сётӥз.18Инмар коркась бадӟымъёссэ но, пичиоссэ но сосудъёсты, Кузё-Инмар коркась ваньбурез, эксэйлэсь, кивалтӥсьёслэсь ваньбурзэс – ваньзэ со Вавилонэ вайиз.19Инмар коркаез сутӥзы, Иерусалимлэсь борддоръёссэ куашкатӥзы, эксэй коркаосты тылын сутӥзы, отысь вань дуно тӥрлыкъёсты быдтӥзы.20Мечлэсь утиськыны быгатэмъёсты ваньзэсты Навуходоносор Вавилонэ улыны нуиз, соос солы аслыз но, пиосызлы но ляльчиос луизы, Персиялэн эксэй пуконаз мукет эксэй пуксьытозь,21Кузё-Инмарлэн Иеремия пыр верам кылъёсыз быдэсмытозь, музъем аслэсьтыз субботаоссэ ортчытытозь*а, озьы вал. Тырттэм кыльыса улон нуналъёсы, сизьымдон ар ӵоже, музъем шутэтскиз.
22Кузё-Инмарлэсь Иеремиялэн пыр верам кылзэ быдэстыса, Персиялэн Кир эксэез нырысетӥ арзэ эксэйын пукыку, Кузё-Инмар Персиялэн Кир эксэезлэсь мылкыдзэ ӝутӥз, соку со быдэс эксэйлыказ гожъяса но, кылын вераса но ялыны косӥз:23«Тазьы шуэ Персиялэн Кир эксэез: дунне вылысь вань эксэйлыкъёсты Инмысь Инмар Кузё-Инмар мыным сётӥз, Со монэ Иудеяе, Иерусалиме Аслыз корка пуктыны косӥз. Тӥ пӧлысь кин Солэн калыкез луэ, солэн Инмарез Кузё-Инмар соин огазьын мед луоз, со отчы мед мыноз».
*а 36:21 еврей законъя, сизьым ар ортчыса, музъем шутэтскыны – суббота карыны – кулэ
Глава 36