Выбрать язык
Книги Ветхого Завета
Книги Нового Завета
с русским текстом2-тӥ книга
1Иосафатлэн трос вал узырлыкез но, данлыкез но; со Ахавен ӵыжы-выжы кусыпъёс кылдытӥз.2Кӧня ке ар ортчыса, со Самарияе Ахав доры мынӥз; солы но соин ӵош лыктэм калыклы шуыса, Ахав трос сюро векчи пудооссэ, сюро таза пудооссэ вандӥз, Иосафатэз со ӝутказ Галаадысь Рамоф кар вылэ ожен мыныны.3Израильлэн Ахав эксэез Иудеялэн Иосафат эксэезлы шуиз: «Монэн ӵош Галаадысь Рамоф каре мынод-а?» Соиз шуиз: «Кызьы тон, мон но озьы ик, кызьы тынад калыкед, озьы ик мынам но калыке: тонэн ӵош оже мыно!»4Израильлэн эксэезлы Иосафат шуиз: «Туннэ юа, мар шуоз Кузё-Инмар».5Израильлэн эксэез ньыль сю пророкъёсты люказ но соослы шуиз: «Галаадысь Рамоф кар вылэ ожен мыноно-а, ӧвӧл-а?» Соос шуизы: «Мын, Инмар сое эксэйлэн киулаз сётоз».6Иосафат шуиз: «Кузё-Инмарлэн эшшо одӥг пророкез татын ӧвӧл-а? Солэсь но юаломе».7Соку Израильлэн эксэез Иосафатлы шуиз: «Эшшо одӥг адями вань на, со пыр Кузё-Инмарлэсь юаны луоз, но мон сое уг яратӥськы, малы ке шуоно мынам азьпалы сярысь со номыр но умойзэ уг вера, ялан уродзэ гинэ вера; со – Михей, Иемвлайлэн пиез». Иосафат шуиз: «Тазьы эн вера, эксэй».8Соку Израильлэн эксэез, одӥгзэ евнухез ӧтьыса, солы шуиз: «Ӝоггес Иемвлайлэсь Михей пизэ ӧтьыны мын».
9Нош Израильлэн эксэез но Иудеялэн Иосафат эксэез, эксэй дӥськутэн дӥсяськыса, котькудӥз аслаз престол вылаз пукиз; Самарияысь падвожын капкаос дорын пукизы но вань пророкъёс соос азьын азьпалзэ тодытыса вераллязы.10Хенааналэн Седекия пиез аслыз корт сюръёс лэсьтӥз но шуиз: «Тазьы шуэ Кузё-Инмар: ”Таин тон сири калыкез быдтытозяд лекалод”».11Мукетъёсыз но вань пророкъёс, азьпалзэ тодытыса, тазьы ик вераллязы: «Мын Галаадысь Рамоф вылэ; тынад азинлыкед луоз, Кузё-Инмар сое эксэйлэн киулаз сётоз».
12Михеез ӧтьыны ыстэм мурт солы вераз: «Тани пророкъёс огкылысь эксэйлы ӟечлык луоз шуыса верало; тынад но кылыд соослэн ваньзылэн кылзылы мед укшасал: тон но ӟечсэ вера».13Михей шуиз: «Улэп Кузё-Инмар, – Инмаре мар мыным вералоз, сое ик мон верало».14Со эксэй доры лыктӥз но, эксэй солы шуиз: «Михей, Галаадысь Рамоф городэ милемлы ожен мыноно-а яке мыноно ӧвӧл-а?» Соиз шуиз: «Мынэлэ, тӥляд азинлыкты луоз, соос тӥляд киулады сётэмын луозы».15Соку эксэй шуиз: «Кӧня пол тонэ сюлвороно на Кузё-Инмарлэн нимыз понна, зэмлыкез сяна, номыре но тон мыным медад вера?»16Соку Михей шуиз: «Израильлэсь вань пиоссэ мон адӟи, возьмаськисьтэк кылем ыжъёс кадь соос гурезьёсы пазьгиськемын. Соку Кузё-Инмар шуиз: ”Соослэн кивалтӥсьёссы ӧвӧл, ваньзы асьсэ доры каньыллыкен мед берытскозы”».17Израильлэн эксэез Иосафатлы шуиз: «Ӧй вера-а мон тыныд, та адями мынам азьпал улонэ сярысь ӟечсэ уг вера, уродзэ гинэ?»
18Соку Михей шуиз: «Кылзӥське ук Кузё-Инмарлэсь кылзэ: мон адӟи Ас престол вылаз пукись Кузё-Инмарез, вань Ин кужымъёс солэн бурпалаз но, паллян палаз но сылӥзы.19Кузё-Инмар шуиз: ”Кин меда Израильлэсь Ахав эксэйзэ Галаадысь Рамоф каре нуыны быгатысал но со отчы мед бырысал?” Одӥгез тазьы шуиз, мукетыз мукет сямен.20Одӥг дух потыса Кузё-Инмар азе султӥз но шуиз: ”Мон нуо сое”. Кузё-Инмар солы шуиз: ”Маин?”21Соиз шуиз: ”Мон пото но вань пророкъёсызлэн вераськоназы ӧрекчаськонлэн духез карисько”. Кузё-Инмар шуиз: ”Тон сое нуод, тон со ужез быдэстод; мын, озьы лэсьты”.22Тани, Кузё-Инмар эрик сётӥз ӧрекчаськонлэн духезлы пророкъёсыдлэн кылазы-ымазы пырыны, но Кузё-Инмар тон сярысь ӟечсэ ӧз вера».23Соку Хенаанлэн Седекия пиез лыктӥз но Михейлэн бамаз чабкыса шуиз: «Кузё-Инмарлэн Духез мон дорысь кыӵе сюрестӥ кошкиз тон пушкын вераськон понна?»24Михей шуиз: «Тон сое адӟод ватӥськыса комнатаысь комнатае бызьылон нуналад».25Израильлэн эксэез шуиз: «Михеез кутэ но городлэн йырыз Амон доры, эксэйлэн Иоас пиез доры нуэ но шуэ:26”Тазьы шуэ эксэй: тае пытсэтэ ворсалэ но нянен, вуэн кӧттырымон эн сюдэ, эн секталэ, мон отысь ӟеч мылкыдын берытскытозь”».27Михей шуиз: «Ӟеч мылкыдын тон берытскид ке, соку мон пыр Кузё-Инмар ӧз вераськы». Эшшо шуиз на: «Вань адямиос, тае кылзэ!»
28Израильлэн эксэез но Иудеялэн Иосафат эксэез Галаадысь Рамоф кар доры мынӥзы.29Израильлэн эксэез Иосафатлы шуиз: «Мон али дӥськутме вошто но оже пото, нош тон эксэй дӥськуттэ дӥся». Израильлэн эксэез дӥськутсэ воштӥз но ожмаськонэ пыриськиз.30Сириялэн эксэез ас дораз сылӥсь ожмаськон уробоослэн кивалтӥсьёссылы шуиз: «Покчиосыныз но, быдӟымъёсыныз но эн ожмаське, одӥг Израиль эксэен гинэ ожмаське».31Ожмаськон уробоослэн кивалтӥсьёссы Иосафатэз адӟизы но малпазы: «Та – Израильлэн эксэез!» – сое котыртӥзы ожмаськыны кутскон вылысь. Нош Иосафат черектӥськиз но, Кузё-Инмар солы юрттӥз, Инмар соосты со дорысь палэнтӥз.32Ожмаськон уробоослэн кивалтӥсьёссы та Израильлэн эксэез ӧвӧл шуыса адӟизы но со дорысь кожытскыса кошкизы.33Со куспын одӥг адями чик малпаськытэк пукыӵсэ золтӥз но Израильлэсь эксэйзэ корт дӥсезлэн вурысэз пыр яраё кариз. Валзэ валтӥсьлы шуиз: «Берлань чигна, ожгарчиос дорысь монэ палэнэ ну, мон яраё каремын».34Со нуналэ ожмаськон кужмояз; Израильлэн эксэез ожмаськон уробо вылын сири ожгарчиослэн ваче пумитазы сылӥз ӝытозь, нош шунды пуксьыку кулӥз.
Глава 18