Выбрать язык
Книги Ветхого Завета
Книги Нового Завета
с русским текстом2-тӥ книга
1Соку Ровоам Сӥхем каре мынӥз, малы ке шуоно Сӥхеме вань израиль калык сое эксэе пуктон понна люкаськиз.2Наватлэн Иеровоам пиез та сярысь кылэм бераз Египетысь берытскиз. Соку со Египетын Соломон эксэйлэсь пегӟыса улэ вал.3Сое ӧтьыны ыстӥзы; Иеровоам но, вань израиль калык но лыктӥзы, соос Ровоамлы шуизы:4«Тынад атаед ми вылэ секыт зӥбет понӥз; нош тон атаедлэсь лек ужзэ капчияты, ми вылэ понэм секыт зӥбетсэ но, соку ми тыныд ужаса-тыршыса уломы».5Ровоам соослы шуиз: «Куинь нунал ортчыса, нош ик мон доры лыктэ». Собере калык дораз кошкиз.6Ровоам эксэй ас атаезлэн, Соломонлэн, улон дыръяз солэн азяз сылӥсь тӧроосын кенешиз но шуиз: «Та калыклы кыӵе ответ вераны визь-кенеш сётоды?»7Соос солы шуизы: «Та калыклы лякыт сямо кариськид ке, соослы ярад ке, соосын небытэн вераськид ке, соку соос тыныд вань улон нуналъёсыд ӵожелы ляльчи кариськозы».8Нош со тӧроослэн сётэм визь-кенешсылэсь палэнскиз но асэныз ӵош будэм, солэн азяз сылӥсь егит пиослэсь визь-кенеш юаса улыны кутскиз;9соослы шуиз: «Мыным ”атаедлэсь ми вылэ понэм зӥбетсэ капчияты” шуись калыклы кыӵе ответ сётыны ӵектоды?»10Соку соин ӵош будэм егит пиос солы шуизы: «Тыныд тазьы верась калыклы: ”Тынад атаед ми вылэ секыт зӥбет понӥз, нош тон сое капчияты”, тон шу: ”Мынам чӧльые атаелэн макесъёсызлэсь зӧкгес.11Мынам атае тӥ вылэ секыт зӥбет понӥз, нош мон тӥлесьтыд зӥбеттэс йылэто; атае тӥледыз сюлоен вӧсь кариз, нош мон тӥледыз скорпионъёсын вӧсь каро”».
12Эксэйлэсь «куинь нунал ортчыса, мон доры лыктэ» косонзэ кылзӥськыса, Иеровоам но, вань калык но куинетӥ нуналэ Ровоам доры лыктӥзы.13Соку Ровоам эксэй соослы чурыт кылын ответ сётӥз, тӧроослэн визь-кенешсылэсь палэнскыса, егит муртъёслэсь ӵектэмзэс санэ поныса, соослы со тазьы вераз:14«Мынам атае тӥ вылэ секыт зӥбет понӥз, нош мон сое бадӟымато; атае тӥледыз сюлоен вӧсь карылӥз, нош мон тӥледыз скорпионъёсын жуго».15Эксэй калыклэсь ӧз кылзӥськы, уго тазьы малпамын вал Инмар дорын, – Наватлэн Иеровоам пиезлы Сӥломысь Ахия пыр Кузё-Инмарлы Аслэсьтыз верамзэ быдэстон понна.
16Эксэйзылэсь соосты кылӟиськымтэзэ быдэс Израиль адӟиз но калык эксэйлы шуиз: «Давид бордын кыӵе милям люкетмы? Иессей пи бордын милемлы люкет ӧвӧл; израиль пиос, ваньды асьтэлэн балаганъёсады бертэ! Табере тод, аслад выжыед сярысь сюлмаськы, Давид!» Соку вань израиль калык балаганъёсаз кошкиз.17Иудалэн городъёсаз улӥсь израиль калыклы гинэ Ровоам эксэй луыса кылиз.18Выт бичасьёслэсь кивалтӥсьсэс, Адонирамез, Ровоам эксэй ыстӥз, нош израиль пиос со вылэ изъёс зӥръяны кутскизы, – со кулӥз. Нош Ровоам эксэй дыртыса ожмаськон уробое пуксиз но Иерусалиме ворттыса кошкиз.19Тазьы туннэ нуналозь но израиль калык Давид выжылэсь люкиськыса улэ.
Глава 10