Выбрать язык
Книги Ветхого Завета
Книги Нового Завета
с русским текстом2-тӥ книга
1Иерусалимысь Мория гурезе Соломон Кузё-Инмарлы корка пуктыны кутскиз, со инты атаезлы, Давидлы, возьматэмын вал, Иевусей пилэн Орналэн кутсаськон итым бервылаз Давид инты дасяз.2Со пуктӥськыны кутскиз ньылетӥ арзэ эксэйын пукыкуз, кыкетӥ толэзьлэн кыкетӥ нуналаз.3Тани Инмар корка пуктон азьын Соломонлэн кутскем инъетэз: кузьдалаез солэн куатьтон гырпум, азьвыл мертэтъя, нош пасьталаез – кызь гырпум;4корка азьысь бӧльмыезлэн кузьдалаез храмлэн пасьталаеныз огкадь – кызь гырпум, нош ӝуждалаез сю кызь гырпум. Солэсь пушсэ чылкыт зарниен шобыртӥз.5Бадӟым корказэ кипарис пуэн шуккиз, усто зарниен шобыртӥз, со вылэ пальмапуос, жильыос суредаз.6Корказэ чебер карон понна сое дуно изъёсын шобыртӥз; нош зарниез Парваимысь ваем зарни вал.7Корказэ, коръёссэ, ӧс янакъёссэ, борддоръёссэ [укнооссэ но], ӧсъёссэ но зарниен шобыртӥз, борддор борды вандылыса херувимъёсты лякылӥз.
8Собере Святойлэсь но Святой инты дасяз: солэн кузьдалаез коркалэн пасьталаез кадь ик – кызь гырпум, пасьталаез но кызь гырпум; сое куать сю талант тыръем самой умой зарниен шобыртӥз.9Кортӵогъёслэн секталазы витьтон зарни сӥклёзь [котькуд кортӵогын]. Коркалэсь бадӟым пал висъетъёссэ зарниен шобыртӥз.10Святойлэсь но Святой интые кык херувимъёсты вӧлыса лэсьтӥз но соосты зарниен шобыртӥз.11Херувимъёслэн бурдъёссы кызь гырпум кузьдаесь вал. Одӥгез, вить гырпум кузьда бурд, коркалэн борддор бордаз йӧтӥськыса улӥз, нош мукетыз бурд, вить гырпум кузьда ик, мукет херувимлэн бурдыз борды йӧтӥськиз;12мукетызлэн херувимлэн но бурдыз, вить гырпум кузьда, коркалэн борддор бордаз йӧтӥськыса улӥз, нош мукетыз бурд, вить гырпум кузьда ик, мукет херувимлэн бурдыныз ваче йӧтӥськыса улӥзы.13Та херувимъёслэн бурдъёссы кызь гырпум кузьда вӧлъяськыса улӥзы, соос ас пыд вылазы сылӥзы, ымнырынызы храм пала учкыса улӥзы.14Яхонт из тусъем, гордпыр, нап-горд басмалэсь катанчи вуриз, виссонлэсь но со вылэ херувимъёслэсь тусбуйзэс пуктӥз.
15Храм азе кык юбо пуктӥз, куамын вить гырпум ӝужда, котькудӥзлэн йылӥяз вить гырпум ӝуждалаем капитель лэсьтӥз.16Вӧсяськон интые кадь ик жильыос лэсьтӥз, соосты юбоослэн йылазы понӥз, гранатлы укшась сю улмоос лэсьтӥз но жильыос вылэ понӥз.17Храм азе юбоос пуктӥз, одӥгзэ бурпалаз, мукетсэ – паллян палаз, бурпалысезлы Иахин ним сётӥз, нош паллян палысезлы – Воаз.
Глава 3