Выбрать язык
Книги Ветхого Завета
Книги Нового Завета
с русским текстом1Та сярысь кылэм бераз Езекия эксэй дӥськутсэ кесяз, чурыт бышкись дӥськут дӥсяз но Кузё-Инмарлэн корказ мынӥз.2Эксэй юртэн кивалтӥсь Елиакимез, Севна подъясез, священникъёслэсь бадӟымъёссэс, чурыт бышкись дӥськут дӥсяса, Езекия соосты Амослэн пиез Исаия пророк доры ыстӥз.3Соос солы шуизы: «Тазьы шуэ Езекия: ”Та нунал ӝоже усёнлэн, вӧсь каронлэн, возьытэ вуонлэн нуналыз; нуныос анайзылэн пушкысьтыз потон интыязы вуизы, нош нуны вайыны анайлэн кужымез ӧвӧл.4Оло нош тынад Инмаред Кузё-Инмар кылоз Рабсаклэсь вань верам кылъёссэ, сое татчы солэн кузёез – Ассириялэн эксэез – улэп Инмарез сантэманы, урод кылъёсын тышкаськыны ыстӥз, соосты тынад Инмаред Кузё-Инмар кылӥз. Улэп кылемъёс понна вӧсяськы ук”».
5Езекия эксэйлэн медоосыз Исаия доры вуизы.6Исаия соослы шуиз: «Кузёдылы тазьы шуэ: ”Тазьы шуэ Кузё-Инмар: Ассирия эксэйлэн медоосызлэсь Монэ сантэм кылъёссылэсь, кудъёссэ тон кылӥд, эн кышка.7Тани, Мон со пушкы дух лэзё но, со ивор кылоз, соку со ас музъемаз берытскоз но, Мон сое аслаз музъем вылаз мечен виё”».
8Рабсак ас дораз берытскыкуз, Ассириялэсь эксэйзэ Ливнаен ожмаськыкуз пумитаз, уго со кылӥз, Ассириялэн эксэез Лахис город дорысь кошкиз шуыса.
9Эфиопиялэн Тиргак эксэез сярысь Ассириялэн эксэез кылӥз. Солы шуизы: «Тани, со тонэн ожмаськыны потӥз». Со нош ик Езекия доры вераськыны адямиоссэ ыстӥз:10«Иудеялэн Езекия эксэезлы тазьы шуэ: ”Тынад оскиськоно Инмаред тонэ медаз ӧрекча: Иерусалим Ассириялэн эксэезлэн киулаз сётэмын уз лу шуыса эн малпа.11Тон кылӥд ук, Ассириялэн эксэйёсыз, соос вылэ карган лэзьыса, мар каризы вань музъемъёсын, – Езекия, тон-а быдэс кылёд?12Атайёсылэн таркам музъемысьтызы калыкъёслэн инмаръёссы соосты утизы-а? Утизы-а Гозанэз, Харранэз но, Рецефез но, Фалассарысь Еден пиосты но?13Кытын Емафлэн эксэез, Арпадлэн эксэез, Сепарваим карлэн эксэез, Еналэн, Иввалэн эксэйёссы?”»
14Езекия ыстэм муртъёслэн киысьтызы гожтэтсэс басьтыса лыдӟиз, Кузё-Инмарлэн корказ мыныса, сое Езекия Кузё-Инмарлэн азяз вӧлдӥз.15Езекия Кузё-Инмар азьын вӧсяськиз, со шуиз: «Кузё-Инмаре Израильлэн Инмарез, херувимъёс вылын пукись! Тон Одӥгнад музъем вылысь вань эксэйлыкъёслэн Инмарзы, Тон инэз но музъемез кылдытӥд.16Кузё-Инмаре, пельдэ мыкырты но кыл монэ. Кузё-Инмаре, синдэ усьтыса учкы, Тонэ, улэп Инмарез, сантэманы ыстэм Сеннахиримлэсь кылъёссэ пеляд пон!17Зэм ик, э, Кузё-Инмаре, Ассириялэн эксэйёсыз калыкъёсты тарказы, соослэсь музъемъёссэс но,18соослэсь инмаръёссэс тылэ келяллязы, но соос инмаръёс ӧвӧл, – адями киын лэсьтэмъёс, пу но из, соин ик соосты быдтылӥзы.19Али но, Инмармы Кузё-Инмар, уть милемыз Ассириялэн эксэезлэн киызлэсь, соку музъем вылысь вань эксэйлыкъёс тодозы, Тон, Кузё-Инмар – одӥг Инмар шуыса».
20Амослэн пиез Исаия Езекиялы вераны ыстӥз: «Израильлэн Инмарез Кузё-Инмар тазьы шуэ: Ассириялэн Сеннахирим эксэезлы пумит кылъёс вераса вӧсяськемдэ Мон кылӥ.
21Тани со сярысь Кузё-Инмарлэн верам кылыз:
учкоз тон шоры, Сӥонлэн бызьытэк кылем нылыз тонэ серекъялоз; Иерусалимлэн нылыз бӧрсяд йырзэ сэзъялоз.
22Кинэ тон ултӥяд, сантэмалляд?
Кин шоры тон куарадэ будэтӥд, синдэ сокем вылэ ӝутӥд?
Израильлэн Дун-Сьӧлыктэмез вылэ!
23Ыстэм муртъёсыд пыр тон Кузё-Инмарез сантэмад, шуид:
”Трос ожмаськон уробоосыным гурезьёслэн йылъёсазы мон туби,
Ливанлэн дуръёсаз;
солэсь ӝужытэсь кедырпуоссэ корай, устоесь кипариспуоссэ но,
вуи солэн самой дурысьтыз улон интыяз, садэзлэн нап интыяз;
24гудӟи но муртлэсь вузэ юи,
Египетлэсь вань шуръёссэ пыдтышкыным куасьто”.
25Тон ӧд кылылы шат,
тае Мон туж кемалась аръёсы лэсьтӥ ни шуыса,
вашкала нуналъёсы тае лэсьтыны эсэплай ни шуыса,
нош али быдэстӥ соин, –
юнматэм городъёсты таркаськод но
куашкатэм из люкъёслы пӧрмытъяськод?
26Соослэн улӥсьёссы кужымтэмесь луизы,
куалекъяло, возьдаськыса уло.
Соос бусыысь турын кадесь, ненег вож турын кадесь,
липет йылысь будос кадесь,
шепаськемезлэсь азьвыл ик сутӥськем ю-нянь кадесь луизы.
27Пуксёд-а тон, потод-а, пырод-а – Мон ваньзэ тодӥсько;
тодӥсько тынэсьтыд Мыным пумит кышкасьтэм луэмдэ.
28Мынэсьтым кышкамтэед понна,
тынад вылтӥяськонэд Мынам пель дорам вуэм понна,
Мон Аслэсьтым кульчоме тынад нырпысыяд поно,
кортнэтме ымад поно но тонэ лыктэм сюрес кузяд ик
дор палад берыкто.
29Тани тыныд, [Езекия], тодмет:
таяз арын ас понназ потэм тысьлэсь будэм юэз сие,
мукетаз аре но – ас понназ потэмзэ,
нош куинетӥяз аре кизе, аралэ,
виноград садъёс мерттэ но соослэсь емышсэс сие.
30Иудалэн юртаз улэп кылем люкетэз улласянь выжы лэзёз,
кылемез вылласянь емыш ваёз.
31Уго Иерусалимысь улэп кылемъёс потозы,
Сӥон гурезьлэсь утиськемъёс потозы.
Саваоф Кузё-Инмарлэн сюлмаськонэз тае лэсьтоз.
32Соин ик Кузё-Инмар Ассириялэн эксэез сярысь шуэ:
та городэ со уз пыры, пукыӵ ньӧлзэ отчы уз ыбы,
щитэныз со доры уз лыкты, солы пумит мудэт уз ӝуты,
33лыктэм сюрес вылтӥз ик берен берытскоз,
та городэ уз пыры, – шуэ Кузё-Инмар.
34Та городэз чакласа-утьыса возё,
Ачим понна, Давид ляльчие понна Мон сое утё».
35Со уе тазьы луиз: Кузё-Инмарлэн Кылчинэз мынӥз но Ассириялэн ожгарчиосыз пӧлысь сю тямыстон вить сюрссэ погыртӥз. Ӵукна султӥзы но, тани, вань шӧйёс пумемын.36Соку Ассириялэн эксэез Сеннахирим султыса кошкиз, дораз берытскиз но Ниневияын улыны кутскиз.37Нисрох инмарезлы сӥзем корказ йыбыртъяса улыкуз, солэн пиосыз Адрамелехен Шарецер сое мечен виизы, нош асьсэос Арарат музъеме пегӟизы. Солэн интыяз Асардан пиез эксэе пуксиз.
Глава 19