Выбрать язык
Книги Ветхого Завета
Книги Нового Завета
с русским текстом1Ииуйлэн сизьыметӥ араз эксэе пуксиз Иоас, со ньыльдон ар ӵоже Иерусалимын эксэй пуконын пукиз. Солэн анаезлэн нимыз Цивья, со Вирсавияысь вал.2Иодай священник сое индылыса-нодъяса возён нуналъёсы Иоас Кузё-Инмар азьын ярамон ужъёс лэсьтыса улӥз.3Гурезь йылъёсын вӧсяськонъёс гинэ дугдытэмын ӧй вал; калык гурезь йылъёсын курбонъёс сётъяз, ӵындытъянъёс ортчытъяз.
4Иоас священникъёслы шуиз: «Вань сӥзем азвесез, кудзэ Кузё-Инмарлэн корказ ваё, мынӥсь-ветлӥсьёслэсь бичам азвесьсэс, лыдъямъя котькуд адями лул понна сётэм азвесез, адямилэсь ас сюлэм косэмъяз ваем вань азвесез – ваньзэ Кузё-Инмарлэн корказ ваёно,5нош священникъёс сое храм ужъёслы мед басьтозы; котькудӥз мед тыршоз аслаз тодмоезлэсь басьтыны, храмлэсь вань сӧриськем интыоссэ шедьтыса мед тупатъялозы».6Иоас кызь куинь ар ӵоже эксэйын пукытозь, священникъёс храмлэсь сӧриськем интыоссэ ӧз тупатъялэ бере,7Иоас эксэй Иодай священникез, мукет священникъёсты ӧтчаз но соослы шуиз: «Малы тӥ храмлэсь сӧриськем интыоссэ уд тупатъяське? Туннэ нуналысен тодмоостылэсь азвесьсэс асьтэлы эн ни басьтэ, сое храмлэсь сӧриськем интыоссэ тупатъянлы сётэ».8Храмлэсь сӧриськем интыоссэ тупатъян понна калыклэсь азвесь бичатэк улонэн священникъёс соглаш луизы.
9Иодай священник одӥг шыкысэз басьтӥз но солэн йылӥяз пась кариз, сое курбон сётон ӝӧклэн бурпалаз, Кузё-Инмарлэн корказ пырон палаз, пуктӥз. Ӧс дорын возьмаськыса сылӥсь священникъёс Кузё-Инмарлэн корказ ваем вань азвесез отчы тыризы.10Шыкысэ трос азвесь люкаськем ни шуыса адӟо ке, соку эксэй подъясь архиереен ӵош лыктыса, сое мешоке думыло но Кузё-Инмарлэн корказ ваем азвесез лыдъяло-ӵотало.11Лыдъям-ӵотам азвесез Кузё-Инмарлэн корказ ужен кивалтыны пуктэм муртъёслэн киязы сёто, нош соос сое Кузё-Инмарлэн корказ лэсьтӥськисьёс, тӥрен ужасьёс кие сётъяса быдто,12озьы ик борддор ӝутӥсьёслы, из вӧлӥсьёслы; кор, вӧлэм изъёс октыны но соосын Кузё-Инмарлэн коркаезлэсь сӧриськем интыоссэ тупатъяны – храмез утён-возён понна вань ужъёсты лэсьтонлы со азвесь мынэ.13Но Кузё-Инмарлэн корказ ваем азвесь уксёлэсь азвесь тэркыос, пуртъёс, ву пазян чашаос, гумыос, зарнилэсь пӧртэм сосудъёс, азвесь сосудъёс лэсьтэмын ӧй вал,14азвесь уксёез ужасьёс кие сётылӥзы но соин Кузё-Инмарлэсь корказэ тупатъязы.15Ужаны пуктэм муртъёслы азвесь сётъямзы понна та адямиослэсь отчётсэс ӧз курылэ, уго соос пӧяськытэк, оскиськымон ужазы.16Йыруж понна курбонлы ваем азвесез, сьӧлыкъёс понна курбонлы ваем азвесез Кузё-Инмарлэн корказ ӧз пыртылэ: со священникъёс киын вал.
17Соку ож сюрес вылэ потӥз Сириялэн Азаил эксэез, со ожен Геф вылэ мынӥз но сое киултӥз; Азаил Иерусалим вылэ ожен мыныны малпаз.18Нош Иудеялэн эксэез Иоас храме Иосафатлэсь, Иорамлэсь, Охозиялэсь, атайёсызлэсь, Иудеялэн эксэйёсызлэсь храмлы шуыса ваем тӥрлыкъёссэс, аслэсьтыз ваемзэ но, Кузё-Инмарлэн корказ, эксэй коркан дуно арбериос возён шыкысысь шедьтэм вань зарниез басьтӥз но Сириялэн Азаил эксэезлы ыстӥз; соку соиз Иерусалим вӧзысь кошкиз.
19Мукетсэ, ваньзэ, мар лэсьтӥз Иоас, Иудей эксэйёслэн книгаязы гожтэмын.20Солэн медоосыз бугырскизы но солы пумит лушкемен лек уж лэсьтӥзы, Сӥллае мынӥсь сюрес вылын сылӥсь Миллолэн корказ Иоасэз виизы.21Сое виизы медоосыз: Иозакар, Шимеатлэн пиез но Иегозавад, Шомерлэн пиез. Со кулӥз но, Давидлэн городаз атайёсыныз огазе сое ватӥзы. Со интые эксэе пуксиз Амасия пиез.
Глава 12