Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ ТИМОФЕЕНДИ

Глава 6

Урет и синь азорсна

1Сятненди, кит кандыхть урексшинь ашка, эряви няфнемс эсь азорснонды сембе пара лувксть и кулхцондомс синь. Тяфта Шкайть лемоц и тонафтомац аф сялдовихть.2Сятненди, кинь азорсна кемай ломатть, аф эряви вятемс эсь прясна азорть мархта кода повсь, кемай ялгакс улемать инкса. Меколанкт, катк покодихть лангозост сядонга пяк, сяс мес сят, кинди синь тиендихть пара тефт, кельгома и кемай ялгат. Тонафтт тянди и кемокстайть ломаттнень тиендемс тя тонафтомать коряс.

Афкуксонь козяши

3А кда кие лиянди тонафты и аф кулхцондсыне Азороньконь Иисус Христость шумбра валонзон и ся тонафтоманц, кона лезды эрямс Шкайть мяленц коряс,4ся прянь няи и мезевок аф шарьхкоди. Тейнза педсь валса пялькстомань и тюремань урма. Сембось тя вяти сельмонь каямас, сялондомас, ломанень сялдомас, лиятнень колга кальдявста арьсемас,5пефтома пялькстомас стама ломаттнень ёткса, конатнень ёньцна колаф и конатне юмафтозь видешить. Синь арьсихть: бта Шкайть мяленц коряс эрямась – тя ки, кона вяти козяшити. Ворьготькшнек тяфтапнень эзда.

6Виде, Шкайть мяленц коряс эрямась ули козяшикс сянди, кинди саты ся, мезец сонь ули.7Минь вдь мезевок ашеме канда масторлангти, сяс тястонга мархтонк мезевок аф машттама сявомс.8Кда ули минь ярхцамбяленьке и щамоньке, катк тя ули сатомшка тейнек.9А сят, кит ёрайхть козякодомс, прашендыхть варчсемас и кундамас, и эрь кодама смузьфтома и зиянонь визькс таколдомас, конат вятьсазь ломанть оцю кальдявс и юмамас-арамас.10Сяс мес ярмаконь кельгомась – эрь кодама кальдявть юроц. Улихть ломатть, конатнень ярмаконь кельгомась шарфтозень кемамать эзда и кандсь тейст лама ризф-сталма.

Кемамать инкса цебярь тюрема

11Но тон, Шкаень ломань, ворьготть сембонь тянь эзда! Ёрак эрямс видексшиса, Шкайть мяленц корява, кемамаса, кельгомаса, сталмонь кирдезь и сятявшиса.12Виень путозь и цебярьста тюрьхть кемамать инкса, сатнек пефтома пингонь эряфть, конанди тон и улеть тертьф, мзярда ламотнень инголе тон азондоть эсь кемамацень колга.

13Шкайть инголе, кона максы эряф сембонди, и Христос Иисусть инголе, кона азозе видеть Эсь колганза Понтий Пилатонь инголе, мон кошартте тонь:14аруста и видеста тик семботь сянь, мезенди мон тонь кошардыхтень, мянь Иисус Христос Азороньконь сама шинцты.15Эсь пингстонза Сонь саманц тейнек панчсы Шкайсь, Бславафсь и семботь лангса фкя Виись. Сон оцязорхнень Оцязорсна и азорхнень Азорсна.16Сон Фкясь, кона мзярдонга аф кулы. Сон эряй валдса, конанди кивок аф нежедеви. Сонь фкявок ломань ашезе няе и аф машты няемс. Улеза Тейнза шнама и пефтома азорксши! Аминь.

17Азк тя эряфса козятненди, катк аф няйсазь пряснон и аф надияйхть козяшить лангс, конац аф кеме, но катк надияйхть эряй Шкайть лангс, кона козяста макссесы семботь, мезе эряви тейнек кенярдеманди.18Кошардыть синь паронь тиендемс, козякоткшнемс цебярь тевса и аф ужяльдезь макссемс эсь уликсснон эзда лиятненди.19Тяфта синь кочкайхть эстейст козяши, кона арай юркс сай пингти, и сатсазь афкуксонь эряфть.

Мекольце валхне Тимофеенди

20Тимофей! Лацкас ванфтк сянь, мезе путф лангозт. Тушентт шири шкайфтома и шава корхнематнень и каршек молематнень эзда, конат эвондасть аф виде содамошиста. Тя аф виде содамошить лемдезь афкуксонь содамошикс,21и мельганза молезь, кой-кит шарфтсть кемамань кить лангста. Шкаень пароказнесь улеза мархтот! Аминь.


предыдущая глава Глава 6 следующая глава