Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ ТИМОФЕЕНДИ

Глава 5

1Сире алять кяжи валса тяк уркста, а кемокстак и ладяк видешинь ки лангс, кода эсь аляцень, од цёратнень – кода браттнень,2сире аватнень, кода тядяцень, а од стирьхнень – кода сазорхнень, эрь кодама ару мяльса.

Од и сире удаватне

3Кирдить пара лувксса и лезтт удаватненди, конат афкуксонь удават.4Кда удавать улихть шабанза али уноконза, эста тейст васендакиге эряви няфтемс кемамаснон тевса: катк тонафнихть лездомс эсьснонды и тяфта пандсазь тядятнень-алятнень парснон: вдь тя Шкайть мялезонза.5Удавась, кона афкукс илядсь ськамонза, кемай Шкайть лангс и шинек-венек эняльтькшни и озонкшни Тейнза.6А ся удавась, кона эряй эсь ронгонь мялензон топафтоманкса, ваймосонза сон ни кулось, хуш и иляды ронгса эряйкс.7Тянь колга азонтт тейст, эста эряфсна ули аф мувору.8Кда кие аф пичеди-канзеди эсензон колга, а сембодонга пяк эсь кудэряензон колга, ся аердсь кемамать эзда и тиевсь аф кемайдонга кальдявкс.

9Удавакс, конанди эряви лезкс, эряви лувомс сянь, кинди ни топодсь кодгемонь киза, конац весть туфоль рьвакс,10и конац содаф, кода цебярь тевонь тии: сон касфтсь-трясь шабат, васьфнесь инжихть, шнись пилькт Шкаень ломаттненди, лезнесь сятненди, конат повсть люпштамас, и мяль вельде тиендсь эрь кодама цебярь тефт.11Сяда оттнень тяйть лува стама удавакс, конатненди эряволь лезкс. Вдь одонь пси маряматне аерфтсазь синь Христость эзда, и тага ёрайхть лисемс рьвакс.12Эста синь улихть судендафт, сяс мес ашезь кирде инголи максф валснон: покодемс аньцек Христости.13Тяфта жа кудста кудс яказь, синь тонадыхть нолашити, и аф аньцек нолашити, нинге корхтафтомати, ломанень тевс эцемати и азонкшнемс сянь, мезе аф эряви.14Сяс монь мялезе: катк од удаватне лисендихть рьвакс, шачфнихть шабат, вятихть кудъётконь тефт и аф макссихть каршек ащети кодамовок туфтал кальдяв корхтаматненди.15Сяс мес конат-конат пувордасть ни виде ки лангста и тусть Сатанать мельге.16Кда кемай авать юромсонза улихть удават, катк сон лезды тейст, и тя удаватне аф улихть сталмокс кемаень пуромксти. Эста пуромкссь машты пичедемс-канзедемс афкуксонь удаватнень колга, конат илядсть ськамост.

Кемаень пуромксонь оцюнятне

17Кемаень пуромксонь оцюнятнень, конат цебярьста вятьсазь тевснон, эряви кирдемс пара лувксса и цебярьста тейст пандомс, васендакиге сятненди, конат путнесазь вийснон Шкаень валти и тонафтомати.18Вдь Сёрматфкссь корхтай: «Тяк пяксне букать кургонц, мзярда сон тяляй сёрот»; и нинге: «Покодити эряви пандомс тиф тевонзон инкса».19Пуромксонь оцюнять лангс сялдомать кулхцонтк аньцек эста, кда сонь кемокстазь кафта али колма ломатть.20Пежень тиихнень кардайть сембонь инголе, эста катк лиятневок кармайхть пелема.21Шкайть, Иисус Христос Азорть и Сонь кочкаф ангелонзон инголе мон кошартте тонь тиендемс ня кошардоматнень коряс. Вятьк эсь пряцень сембонь мархта фкакс, инголькиге тят арьсе ломанть али тевть колга цебярьста али кальдявста.22Тят эряскода бславакшнемс кядень путомать вельде. Эста тон аф улят пежень тиикс лия ломаттнень пежесост. Ванфтк эсь пряцень арушиса.

23Сяда тов симонтть аф аньцек ведьта, но и аф ламне винада, сяс мес тонь сидеста сярятькшни желудкаце. Тя лезды тейнза.24Кой-кона ломаттнень пежесна няевихть тяникиге и синь видеста вятихть судендамати, а лиятнень пежесна панжевихть сяльде.25Тяконь лаца цебярь тефневок няевихть, а сят, конат аф няевихть, панжевихть сяльде.


*а 5:10 Сон ульсь анок сятявста покодемс Шкаень ломаттненди.

*б 5:17 кемаень пуромксонь оцюня – пресвитер


предыдущая глава Глава 5 следующая глава