Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ ЕФЕС ОШЕНЬ КЕМАЙХНЕНДИ

6 Глава

Тонафтомат иттненди и синь тядяснонды-аляснонды

1Итть, уледа кулхцондыхть тядянтенди-алянтенди, кода Азорть мельге молихне, сяс мес тя ули виде.2«Ванк аляцень и тядяцень мяльснон» – тя васенце кошардомвалсь надияфтомань вал мархта:3«Эста кармай улема тейть цебярь, и кармат кувать эряма модать лангса».4И тиньге, алят, тясть сафне идентень кяжснон, а трясть-касфтость Азорть тонафтоманц и мярьгоманц коряс.

Тонафтомат уретненди и азорхненди

5Урет, панжада ваймоса, мялень ванозь и трнатозь уледа кулхцондыкс модалангонь азоронтенди, кода и Христости.6Тяфта тиендеда аф аньцек сельме инголе няфтемать инкса, кода ломанень мялень ваныхне, но кода Христость уренза, седи ваксста тиендеда Шкайть мяленц коряс.7Покодеда мяль вельде, кода Азорти, а аф кода ломаттненди.8Тинь содасасть: Азорсь эрти максы ся цебярть коряс, конань сон тиезе, улендяряй сон урекс али воляшистоннекс.9Тиньге, азорхт, тиендеда урентень мархта тяконь лаца, кадость эвфнемантень, содамок, тинь тинцень лангсонт и синьге лангсост менельса ули Азор, конань инголе сембе ломаттне фкат.

Кемоста ащеда кяжть каршек

10И мекольцесь, кемай ялгат, кемокснеда Азорса и Сонь инь оцю вийсонза.11Щасть эсь лангозонт марнек тюремань щамть, конань максозе тейнть Шкайсь. Эста тинь карматада кемоста ащема идемэвозть кяжи арьсеманзон каршек.12Сяс мес минь тюреманьке аф ломаттнень каршек, а кяжи ваймопожфонь оцюнятнень и азорхнень каршек, шобда вийхнень каршек, конат азорондайхть тя шобда пингонь масторлангса, и вярдень кяжи ваймопожфнень каршек.13Тянь инкса щада марнек тюремань щамса, конань максозе Шкайсь, и тяфта, кяжи шиста, тинь карматада кемоста ащема тейст каршек и, ётамок тюремать педа-пес, кирттяда.14Сяс ащеда кемоста: каркстасть перьфонтень видешинь карксса и щасть лангозонт видексшить, бта ваксарщам.15И катк карьсембялькс тейнть ули аноксшись пачфнемс Пара кулять сетьмошить колга.16Сембодонга пяк сявость кядезонт ванфтомань седяфть, лиякс мярьгомс, кемамать, конань вельде тейнть матовихть идемэвозть сембе палы налонза.17И сявость идемать, бта такия, и сявость Ваймопожфть торонц – Шкаень валть.

18Тянь тиендесть эрь кодама озондомаса и эняльдемаса. Сембе пинкнень озондода Иняру Ваймопожфса. Уледа анокт и апак лотксек озондода Шкайти сембе иняру ломаттнень инкса.19И моньге инксон озондода: катк, мзярда мон ушедан корхтама, Шкайсь максы тейне виде валхт и мон аф пелезь карман панчсемонза Пара кулять салавашинц.20Тя Кулять кандома мон кучфан и тяни сонь инксонза цинзерса пякстафан. Озондода, катк мон аф пелезь пачфнелине сонь, кода тейне и эряви тиендемс.

Мекольце валхне

21Тихик, монь кельгома кемай ялгазе и Азорть валонь кирди покодиец, азондсы тейнть семботь монь колган. Эста тиньге карматада содамонза, мезе мон тиендян и кодамот монь тевне.22Мон кучине сонь тейнть тянкса: азондомс минь тевоньконь колга и ваймафтомс-кемокстамс седиентень.

23Шкай Алясь и Иисус Христос Азорсь катк максыхть тейнть, кемай ялгат, сетьмоши и кельгома мархта кемама!24Улеза пароказнесь сембонь сятнень мархта, конат пефтома кельгомаса кельгсазь Азороньконь Иисус Христость! Аминь.


*а 6:14 ваксарщам – броня, кольчуга

*б 6:16 ванфтомань седяф – щит

*в 6.16 нал – стрела

*г 6:17 такия – шлем


предыдущая глава Глава 6 следующая глава