Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ ЕФЕС ОШЕНЬ КЕМАЙХНЕНДИ

2 Глава

Куломаста эрямас

1Тяда инголе тинь уледе кулофт коень коламать инкса и пежентень инкса.2Синь эсост тинь эряде тя масторлангонь кяжи обуцятнень коряс, максседе пря менель алдонь азорти, ваймопожфти, кона тянивок азорондай сятнень лангса, кие аф кулхцондсы Шкайть.3Синь ётксост сембе миньге инголи эряме эсь ронгонь пежу мяленьконь-арьсеманьконь коряс, топафнемок ронгоньконь и мяленьконь. Сяс миньге, тя обуцяньконь инкса, улеме сембонь лаца Шкайть кяженц ала.4Но Шкайсь, кона козя кельгозь ужяльдемаса, эвондазе Эсь инь оцю кельгоманц тейнек,5и минь, коень коламать инкса кулофнень, эреклафтомазь Христость мархта. Сонь пароказненц вельде тинь идефтяда.6Шкайсь вельмафтомазь минь Христос Иисусонь мархта и озафтомазь менельса Сонь мархтонза марса.7И тянь вельде Сон няфтьсы сай пингонь эряйхненди Эсь козя и аф ункстави пароказненц, ся оцю парошить, конань Сон максозе тейнек Христос Иисусонь вельде.8Сяс пароказнеса тинь идефтяда, кемамать вельде. Тя аф тинцень вельдент, тя Шкайть казнец.9И аф тевонтень вельде, сяс кивок тяда шнафта пря.10Сяс мес минь Шкайть тифонза, Сон тиемазь минь Иисус Христосса цебярь тевонди, конатнень инголькиге ладязень тиемс тейнек.

Христоссь сотозень марса сембе кемайхнень

11Сяс мяляфтость, кикс тинь уледе инголи. Тинь шачема коряс уледе лия ломаньтналоннет и тинь лемнедезь «апак керфокс» сят, конат кядьса тиф ронгонь киськопень керомать вельде лемдевихть «керфокс».12Ся пингть тинь уледе Христосфтома. Тинь ашеде сувсе Израилень ломаньтналть лувксс. Тинь ашель пяльксонте тя сотксса, кона кирди Шкаень надияфтоматнень эса Сонь ломаньтналонцты. Тинь уледе тя масторлангса надиямафтома и Шкайфтома.13А тяни Христос Иисусса, тинь, конат уледе ичкозденнекс, араде маластоннекс Христость веронц вельде.14Сон минь сетьмошиньке. Сон тись кафттнень эзда фкя и срафтозе ётксост ащи перяфксть ся пингста,15мзярда Эсь куломанц вельде машфтозень вийда койть кошардоманзон и кяжть, кона ульсь ётксост. Тяфта, Сон Эсьсонза кафттнень эзда тись фкя од ломань, ладямок ётксост сетьмоши,16и кафцьконь, фкя ронгса, крёз лангса куломать вельде мирендафтозень Шкайть мархта, и тяфта машфтозе кяжть.17Эсь саманц вельде Сон пачфтезе сетьмошинь Пара кулять тейнть, кит ульсть Шкайть эзда ичкозе, и сятненди, кит ульсть маласа.18Сяс мес Сонь вельденза тейнек – еврейхненди и лия ломаньтналхненди – панжевсь кись Аляти, фкя Ваймопожфть вельде.19Тяфта, тяни тинь аф лия масторонь, и аф ширеста сафтада, тяни тинь иняру ломаньтналть лувкссотада и Шкайть кудэряензотада,20и тиньге путфтада кудъюрть лангс, конань маразь апостолхне и пророкне, и Сонць Иисус Христоссь ащи тоса кудужень кевкс.21Сонь Эсонза кудть сембе пяльксонза кемоста кирдихть марса и касыхть иняру кудкс Азорть эса.22Сонь Эсонза тиньге лиятнень мархта марса тиефтяда тяфтама кудкс, коса Шкайсь кармай эряма Иняру Ваймопожфонц вельде.


*а 2:2 менель алдонь азор – кяжи ваймопожф, кона азорондай масторлангса; господин поднебесного мира

*б 2:14 кафттнень – тяса корхтави еврейхнень и лия тналонь ломаттнень колга.


предыдущая глава Глава 2 следующая глава