Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 10

Ванфтода пря аф афкуксонь шкайхненди сюконямада

1Кемай ялгат, монь мялязе лятфтамс тейнть вов мезе: сембе минь атянь-атяньке ульсть коволть ала, и сембе синь ётасть оцюведть туркс.2Тя коволть и оцюведть эса сембе синь ульсть кстиндафт, кода Моисеень мельге молихть.3Сембе синь ярхцасть ваймопожфонь фкя-сяка ярхцамбяльда.4И сембе синь симсть ваймопожфонь фкя-сяка симомбяльда, симсть ваймопожфонь кевбандста, кона ашезень кадонда синь. Тя кевбандсь ульсь Христос.5Но сембе сяка ламотне эздост ашесть ту Шкайть мяльс, и синь кулость шавмодаса.

6Сембонь тянь вельде тейнек няфтевсь: афоль уле мяленьке тиендемс кяж, кода ульсь атянь-атяньконь.7Тяда арсе аф афкуксонь шкайхненди сюконяйкс, кода кой-конатне синь эздост. Вдь Сёрматфксса азф: «Ломаньтналсь озась ярхцама-симома, сяльде стясь и срхкафтсь кштимат аф афкуксонь шкайхнень лемс».8Аф карматама прашендома усксевомас, кода тись мзярошкась синь эздост. Синь прасть усксевомас – и фкя шиста синь эздост шавовсь комсь колмува тёжянь.9Аф карматама варчсемонза Христость куватьс кирдемшканц, кода тиендсть ёткстост конат-конат: синь кулсесть куень пупамада.10Тяда изгорда, кода изгордсть ёткстост конат-конат. Синь машфтозень куломань ангелсь.

11Сембось, мезе лиссь минь атянь-атяньконь мархта, улеза тейнек тонафтомакс. Тя сёрматф тейнек, минь ванфтомганк, кит эряйхть пингть песта.12Сяс эрсь, кие арьси: сон кемоста ащи пильге лангса, катк ваны, афоль пра.13Сембе варчсематне, конат прайхть лангозонт, сембе синь ломанти кирдевомшкат. Шкайсь кирдьсы валонц: Сон мзярдонга аф нолдай лангозонт стама варчсемат, конат улельхть тейнть аф вийс коре. Тяконь лаца эрь варчсемаса Сон няфти лисема васта и максы вий сонь кирдемс.

14Сяс, кельгома ялгат, ворьгодеда аф афкуксонь шкайхненди сюконямада.15Мон корхтан мархтонт, кода пряса арьси ломаттнень мархта. Тинць арьседа монь валнень колга.16Дяряй бславамань кядьгось, конанкса астама сюконяма Шкайти, минь аф сотсамазь Христость веронцты? Кшиське, конань минь синнесаськ, дяряй аф сотсамазь Христость ронгонцты?17Кшида фкя, и хуш эздонк лама, миньге арсетяма фкя ронгокс, сяс мес явондсаськ сембонди фкя-тяка кшить.18Варжакстода Израилень ломаньтналть лангс! Кали сят, кит ярхцайхть озксказненди кантфта, аф сотовихть тянь сюнеда Шкаень алтарти?19Мезе мон ёран азомс тянь вельде? Ули кодамовок виец озксказнеть, кона кантф аф афкуксонь шкайти, али ули кодамовок виец аф афкуксонь шкайть?20Кодамовок аш! Но мзярда аф афкуксонь шкайхненди сюконяйхне кандыхть озксказне, синь кандсазь сонь аф Шкайти, а кяжи ваймопожфненди. А монь аш мялезе шоворямс тинь кяжи ваймопожфнень мархта.21Тейнть аш кода симомс Азорть кядьгоста и кяжи ваймопожфнень кядьгоста. Тейнть аш кода ярхцамс Азорть шранц ваксса и кяжи ваймопожфнень шраснон ваксса.22Кали минь мяленьке сргозьфтемс Шкайть кяженц? Кали минь Сондедонза виихтяма?

Семботь тиендесть Шкайть шнаманкса

23Тинь корхтатада: «Сембось мярьгондеви», но аф сембось канды лезкс. Тинь корхтатада: «Сембось мярьгондеви», но аф сембось касфты-кемокстай.24Катк кивок аф вешендьсы сянь, мезсь тейнза цебярь, а вешендьсы сянь, мезе лияти канды цебярь.25Сембода, мезе рамсетяда сиволень мишендихнень кядьста, ярхцада и ваймовайгялентень инкса тяда кизефне мезевок.26Вдь Сёрматфксса азф: «Модась и мезе сонь лангсонза – сембось Азорть».27И кда кивок аф кемайхнень эзда терттядязь эсь пялонза и тинь мольхтяда, ярхцада сембода, мезе сон путы инголент и мезевок тяда кизефне ваймовайгялентень инкса.28Но кда тейнть мярьгихть: «Тя озксказнекс кантфть эзда», эста тяда ярхца, сянь инкса, кие тянь азозе, и ваймовайгяльть инкса. Вдь азф: «Модась и мезе сонь лангсонза – сембось Азорть».29Мон корхтан аф тонцень ваймовайгяльцень колга, а тянь азыенц. Мес монь азорксшизе судендави лиять ваймовайгяльса?30Кда мон ярхцан и сюконян Шкайти ярхцамбяленкса, эста мес кивок сюцесамань монь ярхцамбяльть инкса, конань инкса мон азондан сюконяма?31Эрь вов мезе: ярхцатада али сиптяда, семботь мезе тиенттяда, тиендесть Шкайть шнаманкса.32Эряда тяфта: афоледе уле пупордамань кевкс аф еврейхненди, аф грекненди, аф кемаень пуромксти.33Тиендеда монь лацон: мон тяряфнян ваномс сембонь мяльснон, мон аф вешендян эстейне цебярь, а вешендян цебярь лиятненди, синь идемаснон инкса.


предыдущая глава Глава 10 следующая глава