Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ РИМ ОШЕНЬ КЕМАЙХНЕНДИ

Глава 10

Идемась максови сембонди, кит кемайхть Иисусти

1Кемай ялгат, монь седиваксстонь мялезе: идевольхть Израилень ломаттне. Тяконь колга эняльдян Шкайти.2Мон виде ваймот азса, синь седи путыхть Шкайти покодемста, но афкуксонь содамошисна аф сатни.3Синь ашезь шарьхкоде, кода Шкайсь лувсыне ломаттнень видексшинь ломанькс, и ёрасть эсь тевснон вельде кемокстамс видексшиса улемаснон. Сяс синь ашезь макса пряснон Шкаень видексшити.4А вдь Христос педа-пес пяшкодезе койть, сяс тяни эрсь, кие кемай Тейнза, ули лувф видексшинь ломанькс Шкайть инголе.

5Моисей сёрмады ся видексшить колга, кона сай койть пяшкодеманц вельде: «Ся, кие ванфтсыне койть сембе кошардоманзон, муй эсост эстейнза эряф».6Но кемамать вельде максф видексшить колга Сёрматфксса корхтави тяфта: «Тят арьсе эсь седисот: "Кие кеподеви менели?" – лиякс мярьгомс: Христость менельста валхтомс модать лангс.7Али тяфта: "Кие валги тонашинь потмаксфтома томбати?" – лиякс мярьгомс: вельмафтомс Христость кулофнень эзда».8Но вов мезе корхтай Сёрматфкссь: «Шкайть валоц тонь вакссот, кургсот и седисот», лиякс мярьгомс, кемамать колга валсь, вчёк ся, конань минь пачфнесаськ.9Кда тон эсь кургсот сембонь инголе азсак: Иисус – Азорсь, и кда седисот кармат кемама: Шкайсь кулофнень эзда вельмафтозе Сонь – эста улят идеф.10Сяс мес седиса кемамась вяти видексшити, а сембонь инголе кургса тянь азондомац – идемати.11Сёрматфкссь корхтай: «Кивок Тейнза кемайхнень эзда аф прай визькс шамас».12Тя азф сембонди, и еврейти, и лия ломаньтналоннети. Азорсь сембонди фкя, и козяста казьсыне сембонь, кие тердьсы Сонь.13Вдь сёрматф: «Эрсь, кие тердьсы Азорть, ули идеф».

14Но кода тердьсазь Сянь, кинди аф кемайхть? Кода кемайхть Сянди, кинь колга ашесть куленде? Коста синь кульсазь, кда аш тянь колга азонды?15Кие кармай азондома, кда кивок аф ули кучф? Сёрматфкссь корхтай: «Вай, кодань пархт пильгсна сятнень, кит молихть Пара кулянь пачфнема!»

16Но аф сембе сявозь седиезост Пара кулять. Тянь колга корхтай Исаия: «Азор, кие кемась сянди, мезе кульсь эздонк?»17Тяфта, кемамась сашенды Кулять марямста, а марясазь сонь тоса, коса азондови Шкайть валоц.

18Но мон кизефнян: кали синь ашезь куле? Кулемс кулезь! Вдь Сёрматфксса азф:
«Модать келес срадсь синь вайгяльсна,
масторть пенцты пачкодсть валсна».

19Мон тага кизефнян: кали Израильсь ашезь шарьхкоде? Нинге Моисей корхтась:
«Мон сргозьфтян эсонт седиень палома сятнень вельде,
конат ломаньтналкс аф лувовихть.
Мон сргозьфтян эсонт кяж
мезевок аф шарьхкоди ломаньтналть вельде».

20Исаия нинге сяда видеста азозе:
«Монь мумазь сят, кит ашемазь вешенде.
Мон няфтине Эсь прязень сятненди,
конат ашесть кизефне Монь колган».

21Но Израильть колга Сон корхтай:
«Шиньберьф Мон венепнине Эсь кяднень
аф кулхцонды и каршек моли ломаньтналти».


*а 10:6 5 Моисея 30:12

*б 10:7 5 Моисея 30:13

*в 10:8 5 Моисея 30:14

*г 10:18 Псалтирь 18:5

*д 10:19 5 Моисея 32:21

*е 10:20 Исаия 65:1

*ж 10:21 Исаия 65:2


предыдущая глава Глава 10 следующая глава