Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ ВАСЕНЦЕ СЁРМАЦ

Глава 5

Кемамась сяськсы пежу масторлангть

1Эрсь, кие кемай: Иисус – тя Христоссь, ся шачф Шкайть эзда. И кие кельгсы Алять, ся кельгсы Сонь эздонза Шачфтьке.2Кда минь кельгсаськ Шкайть и эрятама Сонь кошардоманзон коряс, эста содасаськ: минь кельгсаськ Сонь идензонга.3Минь кельгоманьке Шкайти няфтеви Сонь кошардоманзон пяшкодемаса. А Сонь кошардоманзон аф стакат пяшкодемс.4Вдь эрь ломанць, кона шачсь Шкайть эзда, сяськсы тя пежу масторлангть. И тя вийсь, кона сяськозе масторлангть, – минь кемаманьке.5Кие ина сяськсы тя масторлангть? Ся, кие кемай: Иисуссь – Шкаень Цёра.

Кемокстафты вал Христость колга

6Вага Ся – Иисус Христоссь, кона сась тейнек ведь и вер вельде и Ваймопожфса. Сон сась аф аньцек ведь вельде, Сон сась ведь и вер вельде. И тянь кемокстасы Ваймопожфсь, вдь Ваймопожфсь – тя видеши.7Улихть колма кемокстайхть менельса: Алясь, Валсь и Иняру Ваймопожфсь; и ня колмотне кемокстайхть-корхтайхть фкянь колга.8И масторлангса улихть колма кемокстайхть: Ваймопожфсь, ведсь и версь, и синь кемокстамасна фкат.

9Минь кематама ломаттнень кемокстафты валснонды, но Шкайть кемокстафты валоц сяда вии, сяс мес тя корхтай Сонць Шкайсь и Сон кемокстай Эсь Цёранц колга.10Кие кемай Шкаень Цёрати, сянь седисонза ули ся кемокстафты валсь. Кие аф кемай Шкайти, ся тиендьсы Шкайть васькафникс, сяс мес сон аф кемай Шкайть кемокстафты валонцты, конань Шкайсь азозе Эсь Цёранц колга.11Вага тя кемокстафты валсь: Шкайсь макссь тейнек пефтома эряф, и тя эряфсь Сонь Цёрасонза.12Кинь ули Шкаень Цёрац, сянь ули эряфоц, а кинь аш Шкаень Цёрац, сянь аш эряфоц.

Озондода пежес сувафнень инкса

13Мон сёрмадыне семботь тянь тейнть, Шкаень Цёрати кемайхненди, содалесть: Шкаень Цёрати кемазь, тинь ули пефтома эряфонте.14Минь аф пелезь малаткшнетяма Шкайти и кемоста содасаськ: кда минь анатама Шкайть кядьста сянь, мезе Сонь мяленц коряс – Сон марясамазь минь и макссы тейнек анафть.15И кда минь содасаськ тянь: мезе ба минь афолеме ана, Сон сембоса марясамазь минь, эста содасаськ тяньге: ся, мезе минь анатама Сонь кядьстонза, максови тейнек.

16Кда кие няйсы кемай ялганц пежень тиема, но аф стама пежень, кона вяти куломас, ся катк озонды ялганц инкса, и Шкайсь максы ялганцты эряф. Тяса мон корхтан сятнень колга, кинь пежесна аф вятихть куломас. Но ули тяфтама пеже, кона вяти куломас, и тяфтама пежень тиить инкса мон аф тердян озондома.17Эрь кодама кальдяв тевсь – пеже, но улихть пежет, конат аф вятихть куломас.

Минь Шкайть эзда

18Минь содасаськ: эрсь, кие шачсь Шкайть эзда, аф тии пеже. Шкайть эзда шачфсь ванфтсы эсь прянц, и Кальдявсь аф токасы тяфтама ломанть.19Тейнек содаф: минь Шкайть эзда, но сембе тя масторлангсь Кальдявть кядялонза.

20Содасаськ тяньге: Шкаень Цёрась сась и макссь тейнек шарьхкодема: содалеськ афкуксонь Шкайть. Минь эрятама Шкайть афкуксонь Цёранц, Иисус Христосонь эса. Сон афкуксонь Шкайсь и пефтома эряфсь.

21Идне, ванфтость прянтень аф афкуксонь шкайхнень эзда! Аминь.


*а 5.1 Тя вастсь ётафневи нинге тяфта: «И кие кельгсы Алять, ся кельгсы Сонь эздонза шачфненге».

*б 5.6 «ведь и вер вельде» лиякс мярьгомс, Иисус сась ведьса кстиндаманц и крёз лангса куломанц вельде.

*в 5.18 Тя вастсь ётафневи нинге тяфта: «Сяс мес Шкайть эзда Шачфсь ванфнесы сонь».


предыдущая глава Глава 5 следующая глава