Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ ВАСЕНЦЕ СЁРМАЦ

Глава 4

Шкаень Ваймопожфсь и антихристонь ваймопожфсь

1Кельгома ялгат, аф эрь ваймопожфти кемада, а инголи ваность-варжасть синь: Шкайть али аф Шкайть эзда сафт, сяс мес тяни масторть ланга якай лама аф афкуксонь пророкта.2Шкаень Ваймопожфть содасть тяфта: эрь ваймопожфсь, кона сембонь инголе аф сёпозь азсы: «Иисус Христоссь сась ломанень ронгса», – тя Ваймопожфсь Шкайть эзда.3А эрь ваймопожфсь, кона аф азсы: «Иисус Христоссь сась ломанень ронгса», – аф Шкайть эзда. Тя ваймопожфсь антихристть эзда, конань саманц колга тинь куледе, и сон тяни ни тяса, масторлангса.

4Идне, тинь Шкайть эзда и тинь сяськость тона аф афкуксонь пророкнень. Вдь Ся, кона тинь эсонт, сяда оцю ся ваймопожфть коряс, кона эряй масторлангонь пежу ломаттнень эса.5Синь – тя масторлангстоннет, сяс синь корхтайхть тя масторлангть смузьшинц коряс, и масторлангонь ломаттне кулхцондсазь синь.6Но минь Шкайть эзда, и ся, кие содасы Шкайть, кулхцондсамазь минь, а кие аф Шкайть эзда, ся аф кулхцондсамазь. Вов тяфта минь содасаськ видешинь Ваймопожфть и васькафнемань-эрьготьфтемань ваймопожфть.

Шкайсь – тя кельгома

7Кельгома ялгат, карматама кельгома фкя-фкянь, вдь кельгомась Шкайть эзда. Эрсь, кие кельги, шачф Шкайть эзда и содасы Шкайть.8А кие аф кельги, ся аф содасы Шкайть, сяс мес Шкайсь – тя кельгома.9Шкайсь няфтезе Эсь кельгоманц тейнек тяфта: Сон кучезе масторть лангс Эсь фкя тяка Цёранц, сяс мес мялецоль Сонь вельденза максомс тейнек эряф.10Афкуксонь кельгомась аф тоса, мес минь кельгсаськ Шкайть, а вов мезьса: Шкайсь Сонць кельгомазь минь и кучезе Эсь Цёранц ладямань канды озксказнекс минь пеженьконь инкса.

11Кельгома ялгат, кда Шкайсь минь тяфта кельгомазь, эста тейнековок эряви кельгомс фкя-фкянь.12Шкайть кивок мзярдовок ашезе няенде. Но кда минь фкя-фкянь кельктяма, эста эсонк эряй Шкайсь, и Сонь кельгомац афкукс пяшкодемазь минь.

13Сон максозе тейнек Эсь Ваймопожфонц, и сяс содасаськ: минь эрятама Сонь эсонза, а Сон минь эсонк.14Минь минць няеськ и аф сёпозь азонттама тянь колга: Шкай Аляньке кучезе Цёранц идемс масторлангть.15Кие кемай Иисусонди и аф сёпозь азсы: «Иисус – Шкайть Цёрац», – сянь эса эряй Шкайсь и сонць тя ломанць эряй Шкайть эса.16Тяфта минь кармаме содама и кемама: Шкайсь минь кельгсамазь. Шкайсь – тя кельгома, и ся, кие эряй-ащи кельгомаса, эряй Шкайть эса, и Шкайсь эряй ся ломанть эса.17Тяфта Шкайть кельгомац пяшкоди минь эсонк, и тейнек аф пелезь васьфтеви судонь шись, сяс мес масторлангса минь эрятама ни кода Христоссь.18Кельгомаса аш пелема. Афсатыксфтома кельгомась панцы пелемать. Вдь пелемась фалу сотф наказамать мархта, и пелезь эряйсь аф пачкоди афсатыксфтома кельгомати.

19Минь кельгсаськ Шкайть, сяс мес васенда Шкайсь кельгомазь минь.20Кда кие корхтай: «Мон кельгса Шкайть», а сонць прокс афолезе няе эсь кемай ялганц, ся васькафни ломань. Вдь кие аф кельгсы эсь кемай ялганц, конань няйсы, сянди аф кельгови Шкайське, конань сон ашезе няенде.21Кошардомаса, конань кадозе тейнек Христоссь, мярькф: «Кие кельгсы Шкайть, сянди кельгома эсь кемай ялгацка».


предыдущая глава Глава 4 следующая глава