Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 15

Валвеляфкс юмаф учать колга

(Матф. 18:12-14)

1Иисусонь кулхцондома сашендсь лама каяфксонь кочкайда и пежу ломаньда.2Фарисейхне и койти тонафтыхне изгордозь корхтасть: «Тя ломанць нолясыне малазонза пежуфнень и нльне ярхцай мархтост».

3Эста Иисус азондсь тейст тяфтама валвеляфкс:4«Мярьктяма, ёткстонт киньге ули сяда учац и эздост фкясь юмась. Кали сон аф кадсыне вейхксогемонь вейхксыеть шавмодас и аф кармай юмафть вешендемонза, мзярс аф мусы?5Мзярда мусы, кенярдезь путсы лафтубрязонза;6куду самста тердьсыне ялганзон и шабранзон, и мярьги тейст: "Кенярдеда мархтон, мон муйне юмаф учазень".7Азондса тейнть, тяфта менельсонга сяда пяк кенярдихть фкя пежу ломанти, кона шарфты Шкайти, а аф вейхксогемонь вейхксые видексшинь ломаттненди, конатненди аф эряви шарфнемс Шкайти».

Валвеляфкс юмаф ярмакть колга

8«Али сявсаськ авать, конань ули кемонь сиянь ярмакоц и фкять юмафтозе. Кали сон аф крьвясти штатол и аф тяйсы кияксть, и аф кармай вешендемонза ярмакть, мзярс аф мусы?9Мзярда мусы, серьгядьсыне ялганзон, шабранзон и мярьги тейст: "Кенярдеда мархтон, мон муйне юмаф ярмакозень".10Корхтан тейнть: тяфта Шкаень ангелхневок кеняртькшнихть фкя пежу ломанть Шкайти шарфтоманцты».

Валвеляфкс юмаф-араф цёрать колга

11Иисус нинге азондсь: «Фкя ломанть ульсть кафта цёранза.12Ёмлась корхтай алянцты: "Аляй, макск тейне уликс-пароть эзда пяльксозень". Аляц явозе цёранзонды уликс-паронц.13Мзярошка шида меле ёмла цёрась мизе сембонц и тусь ичкоздень масторс. И тоса, усксевозь эрязь, юводозе сембонц, мезец ульсь.14Мзярда сонь мезецка ашезь ляда, ся мастору сась оцю вачаши. Сон кармась маятама.15Эста сон мольсь и сивотьфтсь пря ся масторонь фкя эряйти. Тона кучезе паксязонза тувонь ванома.16Сон кенярдезь топафтолезе пеконц тувонь порембяльдовок, аньцек кивок ашезь макссе тейнза.

17Эста сонь сргозсь пряёнец, арьсезевсь: "Мзяра сивотьф ломаньда алязень пяле крга видева ярхцайхть кшида, а мон тяса кулсян вачеда!18Туян тяста, молян алязти и мярьган: Аляй! Мон тиень пеже менельть каршек и тонь инголет,19мон оду аф кондястян лемневомс тейть цёракс; сявомак сивотьф ломаттнень ёткс".20И сон эстокиге тусь алянцты.

Сон нинге ичкозель, мзярда аляц няезе сонь. Аляти ужялькс арась цёрац; ласьксь каршезонза, ашкодсь кргазонза и палсезе.21Цёрац мярьгсь тейнза: "Аляй! Мон тиень пеже менельть каршек и тонь инголет, мон оду аф кондястян лемневомс тейть цёракс".22Но аляц мярьгсь покодиензонды: "Куроконе кандость инь цебярь щамть и срхкафтость сонь, тонгода сурозонза суркс и пильгозонза карьсембяльхть.23Вятеда антф вазня и печкость, карматама ярхцама и кеняртькшнема!24Вдь тя цёразе кулофоль, тяни вельмась, сон юмсесь и мувсь". И синь тисть каванямань ила.

25Оцю цёрац паксясоль. Тоста мрдамста маладсь кудснонды, кульсь кштимань-морамань вайгяльхть.26Сон серьгядезе покодихнень эзда фкять, кизефтезе: "Мезе тоса тиендеви?"27Ся мярьгсь каршезонза: "Брадце мрдась, и аляце печксь антф вазня, сяс мес сон мрдась шумбраста-парста".28Оцю цёрац сяшкава кяжиясь, кудунга ашезь ёра сувамс. Аляц лиссь и ушедсь корхнемонза,29но сон алянц каршес мярьгсь: "Вов, мон тняра киза покодян тейть кода уре, мзярдонга ашень моле туркс валцень каршек. Аньцек тон вестенге ашеть макссе тейне сява вероскявок ялгань каванямс.30А кодак сась тя цёраце, кона юводозе уликс-паронц усксеви аватнень мархта, тон печкоть тейнза антф вазня!"31Аляц мярьгсь тейнза: "Цёрай, тон фалу мархтонат, сембе моннесь тонне.32А сянкса эряви кеняртькшнемс, мес брадце кулофоль и вельмась, юмсесь и мувсь"».


предыдущая глава Глава 15 следующая глава