Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ

Глава 3

1-6 Иисус Моисей деч кӱшнӧ шога. 7– 4:13 Юмын калыклан каныш.

1Тыгеракын, святой иза-шольо-влак, пылпомышсо тудо ӱжмашымак налше-влак, мемнан почын ойлымо ӱшанымашын Апостолжо да Архиерейже Иисус Христосым умылен налза.2Моисей семынак Тудо Шогалтышыжлан ӱшанле лийын, Моисейже Юмын уло пӧртыштыжӧ ӱшанле улмаш,3но кузе пӧртым чоҥышын чапше пӧртын чапше деч кугурак, тугак Иисусат Моисейын деч кугу чапым сулен налаш йӧрышӧ.4Вет кажне пӧртын чоҥышыжо уло, а чылажымат чоҥышыжо – Юмо.5Моисеят Тудын уло пӧртыштыжӧ служитлыше семын ӱшанле улмаш. Мо нерген Юмо варарак каласышаш улмаш, тидым таныклышаш улмаш.6Но Христосшо Юмын пӧртыштӧ Эрге семын ӱшанле лийын. А лӱддымылыкнам да мемнам куандарыше ӱшанен вучымашнам мучаш марте пеҥгыдын арален кодена гын веле, Тудын пӧртшӧ ме улына.

7Сандене Святой Шӱлыш ойлымо семын ыштыза:
«Тачысе кечын Тудын йӱкшым колыда гын,
8ӧпкелыме годымсыла
ир мландыште тергыме кечысыла
шӱмдам ида пешкыдемде.
9-10Тушто тендан ачада-влак
Мыйым тергеныт,
да Мыйын ыштымем нылле ий ужыныт.
Сандене Мый тиде тукымлан шыдешкенам да каласенам:
”Нуно шӱмышт дене эре йомын коштыт,
Мыйын корнем пален налын огытыл”.
11Сандене шыдем дене товатленам:
нуно Мыйын ласкалыкышкем огыт пуро».

12Иза-шольо-влак, тендан кокла гыч иктаж-кӧн шӱмжӧ осал да ӱшаныдыме ынже лий да илыше Юмо деч ынже кораҥ манын шекланыза.13Тендан кокла гыч нигӧ, язык дене ондалалтын, пешкыдемше ынже лий манын, эше «тачысе кечын» маналтме годым икте-весыдам кече еда кумылаҥдыза.14Вет ме тӱҥалтыш ӱшанымашым мучаш марте пеҥгыдын арален кодена гын веле, Христос дене ушнен шогена.15Каласыме:
«Тачысе кечын Тудын йӱкшым колыда гын,
ӧпкелыме годымсыла шӱмдам ида пешкыдемде».
16Колыштшо-влак кокла гыч южышт ӧпкеленыт, но Моисей дене Египет гыч лекше чыла еҥ огыл.17Кӧлан Юмо нылле ий шыдешкен? Языкыш пурышо-влаклан огыл мо? Нуно лулегыштым ир мландеш пыштеныт.18«Мыйын ласкалыкышкем огыт пуро» манын, Юмо кӧлан товатлен? Мутым колыштдымо-влаклан огыл мо?19Тыгеракын, ужына: ӱшанымашышт уке улмылан нуно тушко пурен кертын огытыл.


*а 3:7-11 Пс 94:7-11.

*б 3:15 Пс 94:7-8.

предыдущая глава Глава 3 следующая глава