Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО ИКЫМШЕ СЕРЫШЫЖЕ

Глава 14

1-25 Пророкла ойлен да палыдыме йылме дене ойлен моштымаш. 26-40 Черкын погынымаштыже радамым аралыме нерген.

1Йӧратымашке шуаш тыршыза, но Святой Шӱлышын пуымо тӱрлӧ моштымашлан, поснак пророкла ойлымылан кумылаҥза.2Вет кӧ палыдыме йылме дене ойла, еҥ-влаклан огыл, а Юмылан ойла, вет тудым нигӧ ок умыло, тайным Шӱлыш дене ойла.3А кӧ пророкла ойла, еҥ-влаклан ойла: туныктен пеҥгыдемда, кумылаҥда, лыпландара.4Кӧ палыдыме йылме дене ойла, ойлымыжо дене шкенжым туныктен пеҥгыдемда, а кӧ пророкла ойла, ойлымыжо дене черкым пеҥгыдемда.5Те чыланат палыдыме йылме дене ойлыза манын, мый шонем, но пророкла ойледа гын, эшеат сай шонем. Палыдыме йылме дене ойлымо шомак черкым туныктен пеҥгыдемдаш манын ок умылтаралт гын, тугеже пророкла ойлышо еҥ – палыдыме йылме дене ойлышо деч кугурак.

6Ынде, иза-шольо-влак, тендан деке мием да палыдыме йылме дене ойлем гын, да мыйын мутыштем почмашат, шинчымашат, пророкла ойлымашат, туныктымашат уке гын, тыланда могай пайдам кондем?7Тыгак йӱкым лукшо чондымо ӱзгар, кеч шиялтыш але кӱсле лийже, посна йӱкым ок лук гын, тудын дене мом шоктымым кузе палаш лиеш?8Але пуч йӱкым раш ок лук гын, кӧ кредалмашлан ямдылалташ тӱҥалеш?9Тыгак теат, йылмыда дене умылаш лийдыме мутым луктыда гын, мом ойлымыдам кузе пален налыт? Те мардежлан веле ойледа.10Тӱняште мыняр тӱрлӧ йылме уло, мый ом пале, но нунын коклаште нимом ончыктыдымо иктат уке.11А мут-влакын мом ончыктымыштым мый ом пале гын, ойлышылан мый йот еҥ улам, да ойлышат мылам йот улеш.12Те Святой Шӱлышын пуымо тӱрлӧ моштымашлан кумылаҥында гын, черкым пеҥгыдемдашлан нунын дене пойдаралташ тыршыза.13Сандене палыдыме йылме дене ойлышо еҥ умылтарен моштымым тек сӧрвален кумалеш.14Мый палыдыме йылме дене кумалам гын, мыйын шӱлышем кумалеш гынат, ушемже саска деч посна кодеш.15Мом ышташ? Мый шӱлыш дене кумалаш тӱҥалам, уш денат кумалаш тӱҥалам. Мый шӱлыш дене мураш тӱҥалам, уш денат мураш тӱҥалам.16Тый Юмым шӱлышет дене веле мокташ тӱҥалат гын, погынымашыш толшо шагал палыше еҥ таум ыштыметлан кузе «аминь» манын каласа? Тудыжо тыйын ойлыметым ок умыло вет.17Тый порын тауштет, но весылан тиде нигузе ок полшо.18Мый палыдыме йылме дене тендан чыланда деч шукырак ойлем, тидлан Юмемлан тауштем.19Но черкыште молымат туныкташ манын, шуко тӱжем мутым палыдыме йылме дене ойлымешке, шке ушем дене вич шомакым каласынем.

20Иза-шольо-влак, ушда дене йоча гай ида лий. Осаллык шотышто аза гай лийза, а уш дене – кушкын шушо.21Законышто возымо:
«Вес йылме дене ойлышо-влак гоч,
йот калыкын шомакше дене
тиде калыклан ойлаш тӱҥалам,
но тунамат Мыйым огыт колышт, манеш Господь».
22Тыгеже, палыдыме йылме-влак ӱшаныше-влаклан огыл палдарыше пале улыт, а ӱшаныдыме-влаклан. Но пророкла ойлымаш ӱшаныдыме-влаклан огыл палдарыше пале, а ӱшаныше-влаклан.23Пӱтынь черке иктыш погынымо годым чыланат палыдыме йылме дене ойлаш тӱҥалыт гын, да шагал палыше еҥ але ӱшаныдыме-влак погынымашке пурат гын, тугеже тендан ушда каен манын, огыт каласе мо?24А чылан пророкла ойлат да ӱшаныдыме але шинчымаш деч посна кодшо еҥ пура гын, тудын титакшым чылан ончыктат, тудым чылан лончылат,25да тудын шӱмеш шылтымыже тӱжвак лектеш. Тунам тудо кумык возеш, Юмылан вуйым сава да ойла: «Юмо чынжымак тендан дене».

26Кузе вара, иза-шольо-влак? Погынымыда годым тендан кокла гыч кажныдан муро, туныктымаш але почмаш, йылме але тудым умылтарымаш уло – чыла тиде тек черкым пеҥгыдемдашлан лиеш.27Палыдыме йылме дене ойлышо лийыт гын, тек кокыт, эн шукыжо кумыт ойла, тек нуно черет дене ойлат, икте тек умылтара.28А умылтарыше уке гын, тек черкыште нуно шып лийыт, шкаланышт да Юмылан ойлышт.29Пророк-влак кокла гычат тек кок але кум еҥ ойла, а молышт тек ойлымыштым лончылат.30Но тушто шинчыше-влак кокла гыч иктаж-кудыжлан Юмо деч почмаш лиеш гын, икымше ойлышо шып лийже.31Чылан тунемышт да кумылаҥышт манын, икте-весе почеш те чыланат пророкла ойлен кертыда.32Пророк-влакын шӱлышышт пророк-влакым колыштыт,33вет Юмо шот деч посна ыштымын Юмыжо огыл, а тыныслыкын. Святой-влакын чыла черкыштышт тыге лиеш.

34Тек тендан ӱдырамашда-влак черкыште шып лийыт, нуно ынышт ойло, мутым колыштшаш улыт, законат тыге ойла.35Нуно иктаж-молан тунемнешт гын, тек тидын нерген мӧҥгыштышт марийышт деч йодыт, вет ӱдырамашлан черке погынымаште ойлаш намыс.36Але Юмын шомак тендан деч лектын? Але тендан деке веле шуын?

37Иктаж-кӧ шкенжым пророклан шотла але Святой Шӱлыш деч моштымашым налынам шона гын, тудо палышаш: мом мый тыланда возем, тиде Господьын кӱштымыжӧ.38А кӧ тидым ок умыло, тек ок умыло.39Тугеже, иза-шольо-влак, пророкла ойлымылан кумылаҥза, палыдыме йылме дене ойлашат ида чаре,40но тек чылажат келшышын да радамын лиеш.



*а 14:21 Ис 28:11-12.

*б 14:38 «А кӧ тидым ок умыло‚ тек ок умыло»: грекла возымым вес семынат умылаш лиеш‚ мутлан «Кӧ тидым ок умыло‚ тудым те палышаш огыдал» але «Кӧ тидым ок пале‚ Юмат тудым ок пале».

предыдущая глава Глава 14 следующая глава