Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАН ВОЗЫМО СВЯТОЙ ЕВАНГЕЛИЙ

Глава 15

1-10 Йомшо шорык ден йомдарыме окса нерген туштен ойлымаш. 11-32 Йомын коштшо эрге нерген туштен каласымаш.

1Йозак погышо ден языкан-влак Иисус деке колышташ чылан толыныт.2Фарисей ден закон туныктышо-влак ӧпкелен ойленыт: «Тиде Еҥ языкан-влакым Шкеж деке лишемда да нунын дене пырля кочкеш!»

3Иисус тунам нунылан тыге туштен каласен:4«Тендан кокла гыч ик еҥын шӱдӧ шорыкшо уло да иктыжым йомдара гын, индешле индешыжым ир мландеш коден ок кае да йомшыжым мумешке ок кычал мо?5А мумеке, куана да шорыкшым вачышкыже пышта.6Мӧҥгыжӧ толмеке, йолташыж ден пошкудыж-влакым ӱжын, ойла: ”Мый денем пырля куаныза: мый йомшо шорыкем муынам!”7Тыланда каласем: языкым касарыкташ амалышт укеан индешле индеш чын ыштыше дене таҥастарымаште, шке языкшым касарыктыше да Юмо деке савырныше языкан ик еҥ верчат пылпомышто тидын семынак утларак куан лиеш.

8Лу драхме оксаже уло да иктыжым йомдара гын, могай ӱдырамаш, лампым чӱктен, пӧртым ӱштын, мумешкыже тыршен ок кычал?9А мумеке, йолташ ӱдырамаш да пошкудыж-влакым ӱжеш да каласа: ”Мый денем пырля куаныза, мый йомдарыме оксам муынам!”10Тыланда ойлем: языкшым касарыктен Юмо деке савырныше языкан ик еҥ верчат Юмын Суксыж-влак коклаште тыгаяк куан лиеш».

11Иисус умбакыже ойлен: «Ик еҥын кок эргыже лийын.12Изиракше ачажлан каласен: ”Ачай! Мылам логалшаш пого пайым ойырен пу”. Ача нунылан погым пайлен пуэн.13Икмыняр кече эртымеке, изирак эргыже чыла поген да тора элыш каен. Тушто шала илен да шке пайжым шоналтыде кучылтын.14Чыла шалатыл пытарымекше, тиде элыште кугу шужымаш тӱҥалын, да эргылан нужнам чыташ логалын.15Тудо тиде элысе ик еҥ деке пашаш пураш йодын миен, а садыже шке пасушкыжо сӧснам кӱташ колтен.16Тудо сӧсналан пукшымо отыза дене мӱшкыржым темаш шонен, но тидыжымат нигӧ пуэн огыл.

17Тунам тудо шонаш тӱҥалын да шкаланже каласен: ”Ачамын кунар шуко тарлалтше еҥже уло, чылалан кинде утымеш сита, а мый шужен колем!18Каем, ачам деке пӧртылам да каласем: ’Ачай! Мый Пылпомыш ваштареш да тыйын ончылнет языкым ыштенам.19Ынде эргыч маналташат ом йӧрӧ, мыйым тарлалтше-влакет коклаш нал’”.20Тудо кынелын да ачаж деке каен.

Эше тораште улмыж годымак ачаже тудым ужын да чаманен, ваштарешыже куржын миен, шӱйжӧ гыч ӧндалын да шупшалын.21Эргыже тудлан каласен: ”Ачай! Мый Пылпомыш ваштареш да тыйын ончылнет языкым ыштенам. Ынде эргыч маналташат ом йӧрӧ”.22Но ача тарзыж-влаклан каласен: ”Эн сай вургемым кондыза да тудлан чиктыза. Кидышкыже шергашым да йолышкыжо йолчиемым пуыза.23Ӧрдыктарыме презым вӱден кондыза да шӱшкылза, кочкаш да куан пайремым эртараш тӱҥалына!24Мыйын тиде эргым колен ыле, ынде ылыжын, йомын ыле, ынде мумо”. Нуно куан пайремым эртараш тӱҥалыныт.

25А кугурак эргыже пасушто лийын. Пӧртылмыж годым, пӧрт деке лишеммеке, куанен мурымо йӱк-йӱаным колын.26Тарзе-влак кокла гыч иктыжым ӱжын да йодын: ”Тиде мо тыгай?”27Тудыжо вашештен: ”Тыйын шольыч толын. Тудо илыше да таза пӧртылынат, ачат ӧрдыктарыме презым шӱшкылын”.28Кугурак эргыже сырен, пӧртышкат ынеж пуро улмаш. Ачаже лектын да тудым пураш ӱжын,29но тудо ачажлан вашештен: ”Теве мый тыланет тынар ий пашам ыштем, тыйын кӱштыметым ик ганат шуктыде коден омыл, но тый мылам йолташем-влак дене пайремым эртараш каза пачамат пуэн отыл.30А кунам тиде эргыч, яжар-влак дене коштын поянлыкетым пытарымеке толын, тый тудлан ӧрдыктарыме презым шӱшкылынат!”31Но ача тудлан каласен: ”Эргым, тый эре мый денем пырля улат. Мыйын мо уло, чылажат тыйын.32А кызыт куанаш да йывырташ кӱлеш: тыйын тиде шольыч колен ыле, ынде ылыжын, йомын ыле, ынде мумо”».


*а 15:22 Шергашым пуымыжо кугу пагалымашым ончыкта.

предыдущая глава Глава 15 следующая глава