Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАН ВОЗЫМО СВЯТОЙ ЕВАНГЕЛИЙ

Глава 14

1-6 Фарисейын пӧртыштыжӧ. 7-14 Оза ден уна-влакым туныктымаш. 15-24 Кугу пайрем нерген туштен каласымаш. 25-33 Иисусын тунемшыже лияш. 34-35 Тамдыме шинчал.

1Икана Иисус ик вуйлатыше фарисейын пӧртышкыжӧ шуматкечын кочкаш миен. Тушто лийше-влак Тудым эскереныт.2Теве Иисус ончылно – кӱпнышӧ черан еҥ.3Иисус закон туныктышо ден фарисей-влак деч йодын: «Шуматкечын паремдаш лиеш?»4Нуно пелештен огытыл. Иисус тиде еҥым тӱкалтен да паремден, вара колтен.5А нунылан каласен: «Тендан кокла гыч иктаж-кудыдан оселжо але ӱшкыжшӧ тавыш пурен кая гын, шуматкечынат тунамак огыда лук мо?»6Тидлан нуно нимом вашештен кертын огытыл.

7Иисус уна-влакын сайрак верыш логалаш тӧчымыштым шекланен, нунылан туштен каласен:8«Тыйым сӱаныш иктаж-кӧ ӱжеш гын, сайрак верым ит нал, вет тый дечет утларак пагалыме еҥымат ӱжын кертыныт.9Тыгай годым тыйымат, тудымат ӱжшӧ оза, толмекыже, тылат каласа: ”Тиде верым тудлан пу”. Тунам, вожылмашке пурен, эн тӱреш верланашет логалеш.10А кунам тыйым ӱжыт, мий да тӱр верым нал. Тунам тыйым ӱжшӧ оза, мийымекыже, тыланет каласа: ”Йолташ, ончыланрак верлане”, да тый денет пырля ӱстелтӧрыштӧ улшо чыла еҥ ончылно тылат чап лиеш.11Кеч-кӧат, шкенжым кӱшкӧ шында гын, волтымо лиеш, а шкенжым ӱлыкӧ шындыше нӧлталтеш».

12Иисус Тудым ӱжшӧ фарисейлан ойлен: «Кечывал але кас сийым ыштымет годым йолташет-влакым, иза-шольычым, родо-тукыметым, поян пошкудет-влакым ит ӱж. Нуно шкештат тыйым ӱжын да тидын дене тылат тӱлен кертыт.13Сийым ыштымет годым йорло, чолак, окшак, сокыр-влакым ӱж,14тунам тый пиалан лият: нунын тылат тӱлаш нимошт уке. Тыланет чын ыштыше-влакын ылыж кынелмышт годым тӱлалтеш».

15Тидым колмеке, ӱстелтӧрысӧ кокла гыч иктыже Иисуслан каласен: «Юмын Кугыжаныште киндым кочшо – поро пиалан!»

16А Иисус тудлан каласен: «Ик еҥ кугу кас сийым ыштен да шуко унам ӱжын.17Кунам сийым кочкаш жап шуын, ӱжмӧ-влаклан ”Толза, ынде чыла ямде” манын каласаш тарзыжым колтен.18Но чылан, миен ом керт манын, ик ой дене умылтараш тӱҥалыныт. Икымше тудлан каласен: ”Мый мландым налынам, мылам ончал савырнаш кӱлеш, вуеш ит нал, миен ом керт”.19Кокымшо каласен: ”Мый вич мужыр ӱшкыжым налынам, нуным тергаш каем, вуеш ит нал, миен ом керт”.20Кумшо каласен: ”Мый ӱдырым налынам, сандене миен ом керт”.21Тарзе пӧртылын да озажлан тидым увертарен. Тунам суртоза чот сырен да тарзыжлан каласен: ”Оласе урем ден изуремлашке писынрак кае да тышке йорло, чолак, сокыр да окшак-влакым кондо”.22Варарак тарзе ойлен: ”Оза, тыйын кӱштыметым шуктымо, но эше яра вер кодын”.23Тунам оза тарзыжлан ойлен: ”Корно ден ял уремлашке кае, тышке толаш чыла еҥым ӱшандаре, тек пӧртем уна дене темеш!24Тыланда ойлем, ӱжмем-влак кокла гыч иктыжат мыйын кас кочкышем тамлен ок ончо! Вет ӱжмӧ – шуко, ойырен налме – шагал”».

25Иисус дене пырля моткоч шуко еҥ коштын. Тудо нунын деке савырнен каласен:26«Кӧ Мый декем толеш, но ачажым, аважым, ватыжым, йочаж-влакым, иза-шольыжым, ака-шӱжаржым, шке илышыжымат ужын кертдыме ок лий гын, тудо Мыйын тунемшем лийын ок керт.27Кӧ шке ыресшым ок нумал да почешем ок кай, тудо Мыйын тунемшем лийын ок керт.

28Тендан кокла гыч иктаж-кудыжо башньым ыштынеже гын, чоҥен шукташ мо кӱлешым да окса ситышашым шотлаш ондак ок шич мо?29Негызым пыштымеке, башньым ыштен пытарен огеш керт гын, тидым ужшо-влак чылан тудым воштылаш30да ойлаш тӱҥалыт: ”Тиде айдеме чоҥаш тӱҥалын, а пытарен кертын огыл”.

31Але кугыжа вес кугыжа ваштареш сар дене кайынеже гын, лу тӱжем сарзыж дене ӱмбакыже толшо коло тӱжеман ваштареш шогаш вийже сита мо манын, тудо ондак шинчын ок каҥаше мо?32Огеш сите гын, тушманже тораште улмо годымак тудын деке тыныслык ойпидышым йодаш еҥже-влакым колта.

33Тендан денат тыгак: кӧ уло погыж деч ок кораҥ гын, Мыйын тунемшем лийын ок керт.

34Шинчал – сай, но тудо шинчалан лиймым чарна гын, кузе тудым уэш шинчаланым ышташ?35Тыгай шинчал мландышкат, терысышкат пышташ ок йӧрӧ, тудым луктын шуат. Кӧн колышташ пылышыже уло, тек колеш!»


предыдущая глава Глава 14 следующая глава