Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАН ВОЗЫМО СВЯТОЙ ЕВАНГЕЛИЙ

Глава 11

1-13 Кумалме нерген. 14-23 Иисус але веельзевул. 24-26 Осал шӱлышын пӧртылмыжӧ. 27-28 Чын пиал. 29-32 Палдарыше палым ончыкташ йодмаш. 33-36 Волгалтарыме нерген. 37-54 Фарисей ден закон туныктышо-влакым титаклымаш.

1Икана Иисус ик вере кумалын, а кунам чарнен, тунемшыж-влак кокла гыч иктыже Тудлан каласен: «Господь, кумалаш мемнам туныкто. Иоаннат шке тунемшыж-влакым туныктен».2Иисус нунылан каласен: «Кумалмыда годым тыге ойлыза:
Пылпомышто улшо мемнан Ачана! Тыйын святой лӱмет мокталтше,
Тыйын Кугыжанышет толжо,
Тыйын эрыкет мланде ӱмбалнат
пылпомышсо гаяк лийже.
3Мыланна илышаш киндым кече еда пу.
4Мемнан языкнам кудалте,
вет меат мыланна языкым ыштыше-влакын титакыштым кудалтена,
языкышке мемнам ит пурто,
осал дечын мемнам утаре».

5Вара нунылан каласен: «Ала тендан кокла гыч иктаж-кудыжо пелйӱдлан шке йолташыж деке мия да ойла: ”Йолташ, мылам кум сукыр киндым кӱсын пу,6корныш лекше йолташем пурен, а мыйын ӱстембак шындаш нимо уке”.7А тудыжо пӧрт кӧргӧ гыч вашешта: ”Мыйым ит тургыжландаре. Омса ынде тӱкылмӧ, йочам-влак воктенем вакшышыште улыт, мый тылат тидым пуаш кынелын ом керт”.8Тыланда ойлем, йодшын йолташыже улмыжлан кӧра ок кынел да ок пу гынат, чарныде йодмыжлан кӧра кынелеш да кунар кӱлеш, тунар пуа.

9Мый тыланда каласем: сӧрвалыза – тыланда пуалтеш, кычалза – муыда, пералтыза – тыланда почыт,10вет кажне сӧрвалыше налеш, кычалше муэш, пералтышылан почыт.11Эргыда киндым йодеш гын, тудлан кӱ моклакам пуышо, але колым йодеш гын, тудлан кол олмеш кишкым пуышо ача тендан коклаште уло мо?12Але эрге муным йодеш гын, тендан кокла гыч кӧ тудлан скорпионым пуа?13Тыгеже, те осал улмо ӱмбачат шочшыланда тӱрлӧ порым пуэн моштеда гын, пылпомышсо Ачана Тудын деч йодшылан Святой Шӱлышым огеш пу мо?»

14Икана Иисус еҥ кӧргӧ гыч йылмыдыме иям поктен луктын. Кунам ия лектын, йылмыдыме еҥ ойлаш тӱҥалын, да калык чот ӧрын.15Но южышт ойленыт: «Веельзевулын, ия тӧран, вийже дене Тудо ия-влакым поктен луктеш».16А весышт, Тудым тергаш шонен, палдарыше палым ончыкташ йодыныт.

17Но Иисус нунын шонымыштым пален да каласен: «Кеч-могай кугыжаныш шке кӧргыштыжӧ шелалтеш гын, тудо пустаҥеш, да суртышто шелалтмаш лиеш гын, тудо сӱмырла.18Сатана шке ваштарешыже шогалеш гын, кузе тудын кугыжанышыже шоген кертеш? А те ойледа, пуйто Мый ия-влакым веельзевулын вийже дене поктен луктам.19Мый нуным веельзевулын вийже дене поктен луктам гын, тендан эргыда-влак кӧн вий дене поктен луктыт? Сандене нуно тендам судитлыше лийыт.20А Мый Юмын кидше дене иям поктен луктам гын, тыгеже Юмын Кугыжаныш тендан деке ынде шуын.21Кунам шке пӧртшым виян да саркуралан еҥ орола, погыжо аралалт кодеш.22А кунам тудын деч виянрак ӱмбакыже кержалтеш да тудым сеҥа, тудын ӱшанлылан шотлымо саркуралжым шупшын налеш да аген налмыжым шеледа.

23Кӧ Мый денем пырля огыл, тудо Мыйын ваштареш шога, да кӧ Мый денем пырля ок пого, тудо шалатылеш.

24Айдеме кӧргӧ гыч лекмеке, каналташ верым кычалын, осал шӱлыш вӱддымӧ кундемыште коштеш, но огеш му да ойла: ”Мый коден кайыме верышкем пӧртылам”.25Пӧртылмекыже, тудым арун ӱштын да эрыктен шындымым ужеш.26Тунам кая да шкеж деч осалрак шым шӱлышым пырля налеш, чыланат пурат да тушто илаш тӱҥалыт. Тиде айдемылан мучаште тӱҥалтыш годсо деч ударак лиеш».

27Кунам Тудо тидын нерген ойлен, калык кокла гыч ик ӱдырамаш йӱкым кугемден каласен: «Тыйым нумалше мӱшкыр да Тыйым пукшышо чызе поро пиалан улыт!»28Иисус вашештен: «Юмын шомакым колыштшо да шуктен шогышо-влак поро пиалан улыт!»

29Иисус йыр калык шукырак погынен. Тудо нунылан ойлаш тӱҥалын: «Тиде тукым осал! Палдарыше палым йодеш, но пророк Ионан палыж деч моло тудлан ок пуалт.30Кузе Иона Ниневийыште илыше-влаклан палдарыше пале лийын, Айдеме Эргат тиде тукымлан тыгак лиеш.31Кечывалвел ӱдырамаш кугыжа суд кечын тиде тукым еҥ-влак дене пырля кынелеш да нуным титаканыш луктеш, вет тудо Соломонын ушан мутшым колышташ мландын вес тӱржӧ гыч толын, а тыште Соломон деч Кугурак уло.32Ниневий олаште илыше-влак суд кечын тиде тукым дене пырля кынелыт да тудым титаканыш луктыт, вет Ионан увертарен туныктымыжым колмеке, нуно, языкым касарыктен, Юмо деке савырненыт. А тыште Иона деч кугурак уло.

33Лампым чӱктымеке, тудым нигӧ ок шылте але ате дене ок петыре. Пӧртыш пурышо-влак волгыдым ужышт манын, лампыпӱкеныш шындат.34Капын волгалтарышыже – шинча. Тугеже, шинчат яндар лиеш гын, уло капет волгыдо лиеш, а шинчат начар гын, капетат пычкемыш лиеш.35Шеклане, тыйын волгыдет пычкемыш ынже лий.36Тыйын уло капет волгыдо да тушто нимогай пычкемыш вер уке гын, тый лампын йолгышо тулжын волгалтарыме гай волгыдо лият».

37Кунам Иисус ойлен пытарен, ик фарисей Тудым шкеж деке кочкаш ӱжын. Иисус пӧртыш пурен, ӱстелтӧреш верланен.38Кочмо деч ончыч Тудо кидшым мушкын огылат, фарисей, тидым ужмеке, чот ӧрын.39Но Господь тудлан каласен: «Теве те, фарисей-влак, ате ден кӱмыжым тӱжвач эрыктеда, а кӧргыда опкынланен агымаш да осаллык дене темын.40Шонен моштыдымо-влак! Кӧ тӱжвалым ыштен, Тудак огыл мо кӧргыжымат ыштен?41Мода уло, тудым йорло-влаклан пуыза, тунам тыланда чылажат ару лиеш.42А тыланда ойго, фарисей-влак! Те пӱртньыкын, рута шудын да чыла пакчасаскан луымшо ужашыжым Юмылан пуэда, а шкендам чын кучымым да Юмым йӧратымым кӱлешлан огыда шотло. Тидыжымат ыштыман ыле, тудыжымат ӧрдыжеш кодыман огыл ыле.43Тыланда ойго, фарисей-влак! Синагогышто ончылно шинчымым да калык погынымо верлаште тыланда вуй савымым йӧратеда.44Ойго тыланда, закон туныктышо ден фарисей-влак! Те, сайла кояш тӧчышӧ-влак! Те шинчалан койдымо шӱгар-влак гай улыда. Нунын ӱмбалне еҥ-влак коштыт, но тидым огыт пале».

45Закон туныктышо кокла гыч иктыже Иисуслан каласен: «Туныктышо, тыгайым ойлен Тый мемнамат вурсет!»46Но Иисус каласен: «Закон туныктышо-влак, тыландат ойго. Те еҥ ӱмбак пеш неле нумалтышым пыштеда, а шкеже тудым ик парня денат огыда тӱкалте.47Ойго тыланда! Те пророк-влаклан чапле шӱгарым ыштеда, а нуным ачада-влак пуштыныт.48Тыге те ачада-влакын ыштылмыштым палымыдам да сайлан шотлымыдам ончыктеда: нуно пророк-влакым пуштеденыт, а те пророк-влаклан чапле шӱгарым чоҥеда.49Санденак Юмын Уш-акылже ойлен: ”Мый нунын деке пророк ден Апостол-влакым колтем, иктыштым нуно пуштыт, весыштым поктылаш тӱҥалыт”.5051Тыгеже, чыла пророкын тӱням ыштыме деч тӱҥалын йоктарыме вӱржӧ, Авельын вӱржӧ деч тӱҥалын, жертвенник ден святой вер коклаш пуштмо Захарийын вӱржӧ марте, тиде тукымлан тӱлыкталтеш. Туге, тыланда ойлем, тиде тукымлан тӱлыкталтеш.52Закон туныктышо-влак, ойго тыланда! Те шинчымашын сравочшым налында: шкеат пурен огыдал, пураш шонышыланат чаракым ыштенда».

53Кунам Иисус нунылан тидым ойлен, закон туныктышо ден фарисей-влак Тудым тушманла ончаш да шуко нерген йодышташ тӱҥалыныт,54Тудым иктаж-могай мутеш кучаш да титаклаш тӧченыт.


*а 11:2 Эрык – воля, желание. Лийже – тидым «шукталтше» манынат кусараш лиеш.

*б 11:4 Языкышке – грекла: алгаштарымашке (искушенийышке).

предыдущая глава Глава 11 следующая глава