Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАН ВОЗЫМО СВЯТОЙ ЕВАНГЕЛИЙ

Глава 10

1-12 Иисус шымле тунемшыжым колта. 13-16 Титакыштым шиждыме ола-влаклан ойго. 17-20 Шымле тунемшын пӧртылмыжӧ. 21-24 Иисусын куанже. 25-37 Поро чонан самарий еҥ нерген туштен ойлымаш. 38-42 Марфа ден Мариян мӧҥгыштышт.

1Тылеч вара Господь эше шымле тунемшым ойырен налын да Шкеж деч ончыч кажне олашке, кажне верышке, кушко Шке кайынеже улмаш, кокыт дене колтен.2Тудо нунылан ойлен: «Тӱредшаш пеш шуко, а пашаеҥ шагал. Тыгерак, пашаеҥ-влакым тӱредаш колтыжо манын, лектышын Озаж деч йодын кумалза.3Кайыза! Мый тендам пача-влакым пире коклашке колтымо семын колтем.4Окса калтамат, сумкамат, йолчиемымат пеленда ида нал, корнышто нигӧ дене ида саламлалт.

5Кунам иктаж-могай пӧртыш пуреда, ондак ойлыза: ”Тиде пӧртлан тыныс лийже!”6Тушто тыныслыкын еҥже уло гын, тендан тыныслыкда тудын дене кодеш, а уке гын, тендан деке пӧртылеш.7Тиде пӧртешак кодса, мом темлат, кочса, йӱза: пашаеҥ пашадаржым сулен налеш. Ик сурт гыч весыш ида кусныл.

8Иктаж-могай олашке мийымеке, тендам порын вашлийыт гын, мом тыланда пуат, тудым кочса,9тушто улшо черле-влакым паремдыза да ойлыза: ”Юмын Кугыжаныш тендан деке лишемын”.10А иктаж-могай олашке мийымеке, тендам порын огыт вашлий гын, уремышке лекса да каласыза:11”Тендан олаште мемнан деке пижше пуракымат ме тыланда почкалтен кодена. Туге гынат палыза: Юмын Кугыжаныш ынде тендан деке лишемын”.12Тыланда ойлем: суд кечын Содомлан тиде ола деч куштылгырак лиеш.

13Ойго тылат, Хоразин! Ойго тылат, Вифсаида! Могай чудо-влак тендан дене лийыныт, тугаяк чудо-влак Тир ден Сидонышто лийыт ыле гын, нуно шукертак, чоштыра вургемым чиен да ломыжышто шинчен, языкыштым касарыктен, Юмо деке савырнат ыле.14Но суд кечын Тир ден Сидонлан тендан деч куштылгырак лиеш.15А тый, кавашке шумеш нӧлтымӧ Капернаум, тамыкыш сӱмыралме лият!16Кӧ тендам колыштеш, тудо Мыйым колыштеш, кӧ шкеж деч тендам кораҥда, Мыйым кораҥда. А кӧ шкеж деч Мыйым кораҥда, Мыйым Колтышымат кораҥда».

17Шымле тунемшыже куанен пӧртылыныт да ойленыт: «Господь, Тыйын лӱмет верч мутнам ия-влакат колыштыт!»18Но Иисус нунылан каласен: «Мый пылпомыш гыч волгенче семын сатана камвочмым ужынам.19Теве тыланда кишкым, скорпионым да тушманын уло вийжым тошкалаш властьым пуэм – нимоат тыланда эҥгекым ок ыште.20Но шӱлыш-влак мутдам колыштмылан огыл, а тендан лӱмдам пылпомышто возымылан куаныза!»

21Тиде татыштак Иисус Святой Шӱлыш дене йывыртен да каласен: «Ачай, пылпомышын да мландын Господьшо! Тый уш-акылан дечат, кугу ушан дечат тидым шылтенат да изи-влаклан почынат, сандене Тыйым чапландарем! Теве, Ачай, тыгай лийын Тыйын поро эрыкет!»22Тунемшыж-влак деке савырнен, Тудо ойлен: «Ачам Мылам чыла пуэн. Эрге кӧ улмым Ача деч моло нигӧ ок пале, Ача кӧ улмым Эрге да кӧлан Эрге почаш шона, тудын деч моло нигӧ ок пале».

23Вара, тунемшыж-влак деке савырнен, нунылан посна каласен: «Те мом ужыда, тудым ужшо шинча пиалан!24Мый тыланда ойлем: мом те ужыда, тудым шуко пророк ден кугыжа ужнешт ыле, но ужын огытыл, мом те колыда, тудым колнешт ыле, но колын огытыл».

25Иисусым тергаш шонен, закон туныктышо ик еҥ кынел шогалын да каласен: «Туныктышо, курымашлык илышым налаш манын, мый мом ыштышаш улам?»26Иисус йодын: «Законышто мом возымо? Тушто тый мом лудат?»27Тудо вашештен: «Шкендын Господь Юметым уло шӱмет дене, уло чонет дене, уло виет дене да уло умылымашет дене йӧрате. Лишылетым шкендым йӧратыме семынак йӧрате».28Иисус каласен: «Тый чын вашештышыч. Тыге ыштет гын, илаш тӱҥалат».29Но закон туныктышо, шкенжым чыныш лукташ шонен, Иисус деч йодын: «А кӧ мыйын лишылем?»

30Иисус тудлан вашештен: «Ик еҥ Иерусалим гыч Иерихоныш каен да агыше-влакын кидышкышт логалын. Нуно тудын вургемжым кудаш налыныт, кырен сусыртеныт да пеле колышым кудалтен каеныт.31Тиде корно денак иерейлан волаш логалын. Кийышым ужмеке, корно вес могыр дене эртен каен.32Левий тукым еҥат тыгак ыштен: тиде верыш миен шумеке, сусыргышым ужын, корно вес могыр дене эртен каен.33А Самарий гыч ик корныеҥ тудын деке миен лектын, а ужмеке, чаманен,34лишемын, сусыржым ӱй да йошкар арака дене мушкын пидын, шке оселжо ӱмбаке кӱзыктен шынден, унагудыш наҥгаен да тудым ончен.35А вес кечын, тушеч кайымешке, унагудо озалан кок динарийым луктын пуэн да каласен: ”Тудым ончо, мом утыжым кучылтат гын, пӧртылмем годым мый тылат ешарен пуэм”.36Тыйын шонымаште, агыше-влак кидыш логалше еҥлан нине кумыт гыч кудыжо лишыл лийын?»37Закон туныктышо вашештен: «Кӧ тудлан порым ыштен, тудо». Иисус каласен: «Кае, тыят тыгак ыште».

38Корно дене эртымышт годым Иисус ик ялыш пурен. Тыште Марфа лӱман ӱдырамаш Тудым шке пӧртышкыжӧ пуртен.39Ӱдырамашын Мария лӱман шӱжарже лийын. Тудыжо Иисусын йол воктекыже шинчын да ойлымыжым колыштын.40Марфан унам ончымо сомылкаже пеш шуко лийын. Лишке миен, тудо каласен: «Господь! Шӱжарем уло сомылым шкетланем кудалтен. Тидын нерген Тый от шоналте мо? Тудлан каласе, мылам полшыжо!»41«Марфа, Марфа! – вашештен Иисус. – Тый шуко верч тургыжланет, азапланет,42а кӱлешанже икте веле. Мария сай ужашым ойырен налын, тидыже тудын деч ок налалт.»


*а 10:21 «Святой Шӱлыш дене йывыртен» – грек мут-влакым тыгеат кусараш лиеш: «Иисусын кӧргыжӧ йывыртен». Эрык – воля, желание.

*б 10:27 Втор 6:5, Лев 19:18.

предыдущая глава Глава 10 следующая глава