Your word is a lamp to my feet

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 1

1Тōрум Пы̄г Ӣсус Кристос урыл ōлнэ Ёмас Ля̄ххал тох ты ōвылтахты:2Тōрум лāтыӈ тотнэхум Исая такви нэ̄пакēт тох лāвыс:
— Мир ōлнэ мāн Наӈ ёхтынэн э̄лы-пāлт ангелум кēтэгум.
Тав Наӈ йинэ мāгсылын лё̄ӈх сё̄питы.
3Ам тамле турсуй мир ōлтал мāт хӯлсум:
“Яныг Кӯсяюв мāгыс сохыт,
састум лё̄ӈх сё̄питэ̄лы̄н!”
4Тōрум ля̄ххал тотнэ хум, Иоан, мир ōлтал мāт ōлыс. Тав мир Тōрум ля̄льт сунсуӈкве ос кареканыл хот-вуськасаӈкве лāвыгласанэ.5Иерусалим ӯсныл, Юдея мāныл сāв мāхум тав палтэ ёхтысыт. Кареканыл вуськасан ос Тōрум ля̄льт суснэ мāхум Иоан Иордан я̄т витыл пēрнал пинсанэ.6Иоан верблюд пунныл сāгим маснутыл масхатым ōлыс. Тав совныл вāрим э̄нтап квāлыг ōньсис. Тав саранча ос мāг тāим ōлыс.7Тав мирн лāвыглас:

— Ам юи-пāлумт та хум ёхты. Тав āнумныл ё̄рнув. Тав лāгыл маснут квāлганэ хoт-пēсталаӈкве ат хōйхатэ̄гум.8Ам нāнан витыл пēрнал пинсанум, Тав нāнан Ялпыӈ Лылыл пиниянэ.

Хумус Ӣсус витыл пēрнал пинавeос Ӣсус сатанан касилтаве

9Та порат Галилeя мāт ōлнэ Назарет ӯсныл Ӣсус ёхтыс. Тав Иоанын Иордан я̄т витыл пēрнал пинвес.10Ӣсус витныл нōх-нэ̄глуме порат Иоан кāсаластэ: тōрум пāлыгпӯсхатас ос Ялпыӈ Лылы, голубь хурил Тав палтэ ёл-тāртахтас.11Нуми тōрумныл суйтыс:

— Наӈ Ам я̄тил Пыгквем! Наӈ Ам сымум э̄рнэ Пыгк­ вем!

12Ӣсус витыл пēрнал пиныматэ юи-пāлт Ялпыӈ Лылын мир ōлтал мāн тотвэс.13Тав тот налыман хōтал ōлыс. Сатана Таве āквагкасилтастэ. Тав мувлахитэ̄т вōруйт ōлсыт осангелыт Тавēн луситасыт.

Ӣсус ханисьтахтын ōвыл юртанэ

14Иоан кāснаколн ӯнттыматэ юи-пāлт Ӣсус Галилея мāн минас. Тот Тав Тōрум ōлнэ хōн-мā урыл Ёмас Ля̄ххал потыртаӈкве15патыс:

— Пора та ёхтыс, Тōрум ōлнэ хōн-мā ляпат! Нāнкареканын хультуптэн ос Ёмас Ля̄ххалн агтэ̄н!

16Аквматнакт, Галилея ся̄рысь вāтат ё̄миматэ, Ӣсус хӯл алысьлан хумыг кāсалас: каӈкы̄г-апсиы̄г Симон ос Андрей. Тэ̄н та торыг хӯл алысьласы̄г.

17Ӣсус тэ̄н нупылэ̄н лāвыс:

— Ам юи-пāлумт йиēн. Ам нэ̄нан э̄лумхōлас пувнэ хумы̄г вāриягум!

18Каӈкы̄г-апсиы̄г аквтаторыг хӯлпēн оссувластэ̄н. Ӣсус юи-пāлэ̄т минмыгтасы̄г.

19Э̄лаль-миныматэ, Ӣсус Зeвeдeй-ōйка пыгы̄г, Яков ос Иоан, кāсаласагe. Тэ̄н хāпт хӯлпанэ̄н сё̄пи­тасы̄г.20Ӣсус тэ̄на тэ̄н ōс ёт вōвсаге. Тэ̄н тāра-та Тав ётэ минмыгтасы̄г, Зеведей-ōйка ос мēтхумияныл хāпт та хультсыт.

Ӣсус āгмыӈ мāхум пусмалтаӈквe ōвылтахты

21Капернаум ӯсн ёхтуманыл порат, Ӣсус сабатхоталт синагоган минас ос тот мāхум ханисьтас.22Тав мāхум кӯсяй хольт ханисьтасанэ. Тав сāккон тотнэ хум хурипаг ат ōлыс, таимāгыс мāхум Тав осятахтыгласыт.23Та порат синагогат кулил вуим хōтпа ōлыс. Тав рōӈхалтахтас:

24— Наӈын манавныл мāныр э̄ри, Назарет мāныл ёхтум Ӣсус? Наӈ мāнав порслаӈкве ёхтысын? Ам вāглум, Наӈ хотъют — Наӈ Тōрумныл ōлнэ Ялпыӈ!

25— Астал ōлэ̄н! — Ӣсус кантыӈысь ля̄галас. — Кон-минэ̄н!

26Куль та хум тōргалтастэ ос сӯиӈ рōӈхыл тав кӣвреныл кон-минас.

27Мāхум осятахтыгласыт, халанылт китыглахтасыт:

— Ты мāныр? Йильпи ханисьтан накэ тамле ё̄р та ōньси? Тав кулит кон-ня̄влуӈкве вēрми. Кулит Тавēн ōс хӯнтлэ̄гыт!

28Мосēртын Галилея мāт ōлнэ мирн Ӣсус вāӈкве та патвес.

29Ӣсус синагоганыл кон-квāлме юи-пāлт Яков ос Иоан ханисьтахтын юртаге ёт Симон ос Андрей пāлт минасыт.30Симон ōныпе āгмыӈ ōлыс. Тав алпитэ исум ōлыс. Ты ōвылтыт мāхум Ӣсусын лāвсыт.31Тав та нэ̄ пāлт йис, нэ̄ кāтпалэ̄т пувыстэ ос нōх-лю̄люӈкве нё̄тыстэ. Āгмыӈ нэ̄ тāра-та пусмыс. Аквтаторыг нэ̄ тāнаныл тыттуӈкве-айтуӈкве патсанэ.

32Э̄типалаг, хōтал ӯнтнэ юи-пāлт, Ӣсус палт āгмыӈ ос кулил вуим мāхум тотыглалвесыт.33Ӯс тāгыл мир та кол āви пōхан ёхтысыт.34Тав сāв хōтпа сāвсыр āгманыл пусмалтасанэ ос сāв кулит коння̄влысанэ. Кулит вāсаныл Тав хотъют, таимāгыс Тав тāнаныл потыртаӈкве ат тартсанэ.

35Сяр āлпыл Тав нōх-квāлыс. Тувыл миртāл мāн пōйксяӈкве минас.36Симонын ос мōт ханисьтахтын хумиянэ̄н Тав кинсуӈкве патвес.37Юи-ōвылт Тав хōнтвес.

— Мир пуссын Наӈын кинсыяныл! — тāн Ӣсус нупыл лāвсыт.

38Ӣсус тāнанылн лāвыс:

— Ляпа пāвлытн ос ӯсытн минэ̄в. Тот Āнумн Тōрум Ёмас Ля̄ххал потыртаӈкве э̄ри, таимāгыс Ам ты мāн ёхтысум.39Галилея мā янытыл Тав синагогатт Ёмас Ля̄ххал потырталыглас ос кулит кон-ня̄влыглāлыс.

Проказа āгмыӈ э̄лумхōлас пусмалтыл

40Аквматнакт Ӣсус палт проказал āгмыӈ хōтпа ёхтыс. Тав Ӣсус э̄лы-пāлн сāнспуӈкаге тармыл ӯнтыс ос Таве пойкуӈкве патыстэ:

— Таӈхēгын-ке, Наӈ āнум пусмалтаӈкве вēр милын.

41Тав Ӣсусн сāлиг ēмтыс. Ӣсус āгмыӈ хōтпа кāтэ̄тыл карссматас ос лāвыс:

— Ам наӈын пусмалтаӈкве таӈхēгум. Пусмэн!

42Ты лāтӈыт юи-пāлт āгме та минас ос тав пусмыс.43Та хум нупыл Ӣсус кантыӈысь лāвыс:

44— Нэ̄мхотъютын ты ōвылтыт ул потыртэн. Минэн, пӯп-ōйкан сусылтахтэн. Моисей сāккон сирыл пусмумын мāгыс йир вāрен. Пуссын вос вāганыл, наӈ хумус пусмалтавēсын.

45Та хум минас, пусмалтыматэ урыл мирн потыртаӈкве патыс. Таимāгыс Ӣсус ӯсн ёхтуӈкве ат вēрмыс, миртал мāт ōлыс. Тав палтэ мир сāвсырмāныл āкваг ёхталасыт.


*а 1:2 Тōрум лāтыӈ тотнэ хум — ты русь лāтӈыл пророк

*б 1:5 витыл пēрнал пинуӈкве — ты русь лāтӈыл крестить

*в 1:6 саранча — алысāмыт ōлнэ тāнкисыр нумӯйит, тэ̄пканыт тэ̄лтнэ тэ̄нут холтнэ хомласыт

*г 1:10 голубь — тōвлыӈ ӯй

*д 1:13 луситаӈкв*1:10 голубь — тōвлыӈ ӯйе — ты русь лāтӈыл служить

*е 1:14 кāснакол — ты ōс турманкол

*ж 1:15 агтуӈкве — ты русь лāтӈыл верить, поверить

*з 1:21 сабат-хōтал — еврей услахтын хотал

*и 1:21синагога — еврей пойксян кол

*к 1:22 сāккон — ты русь лāтӈыл закон

*л 1:40 проказа — хāхтхатнэ лю̄ль āгм

*м 1:44 йир — ты русь лāтӈыл жертва


предыдущая глава Глава 1 следующая глава