Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 2

Ӣсус параличыл āгмыӈ хум хумус пусмалты

1Матахмат хōтал хультум юи-пāлт Ӣсус Капернаум ӯсн ōс ёхтыс. Мир Тав юв-ёхтуме ōвылтыт хӯлсаныл.2Тасāвит мир та атхатас, āви пōхат лю̄льнэ мā ōс āтим ōлыс. Ӣсус Тōрум лāтыӈ потыртас.3Тав палтэ нила хум ёхтысыт. Тāн параличыл āгмыӈ хōтпа тотсаныл.4Сака сāв мир ōлыс. Тāн Ӣсус ляпан йиӈкве ат вēрмысыт. Таимāгыс тāн кол ала хот-лōсытасаныл, āгмыӈ хум хуйнэ сованэ ёт нумыл ёл-тāртсаныл.5Ӣсус кāсаластэ: мāхум Тавēн агтэ̄гыт ос āгмыӈ хум нупыл лāвыс:

— Пыгкве! Наӈ кареканын хот-ёрувлахтэ̄гыт.

6Тот ань сāккон ханисьтан матахкем хум ӯнлысыт. Тāн нōмсахтасыт:

7— Ӣсус ань Тōрум нупыл манрыг люкамтахты? Тōрум коны-пāл э̄лумхōлас кареке хотъютн хотёрувлаӈкве вēрмаве?

8Ӣсус тāн номтаныл вāсанэ, тāнаныл китыгластэ:

— Нāн манры̄г тох номсэгы̄н? 9Мāныр кӯпнитнув? Āгмыӈ хōтпан лāвуӈкве: “Кареканын хот-ёрувлахтэ̄гыт” манос лāвуӈкве: “Нōх -лю̄лен, наӈки хуйнэ сованын вуēн ос ё̄мыгтэн?”10Нāн вос вāглын, Э̄лумхōлас Пы̄г мā тармыл карекыт хот-ёрувлан ё̄р ōньси. Тувыл Тав āгмыӈ хōтпа нупыл лāвыс:

11— Нōх-лю̄лен, хуйнэ сованын вуēн ос юв-минэн.

12Э̄лумхōласыт кāсаласыт хумус āгмыӈ хум аквтаторыг нōх-лю̄лис, хуйнэ сованэ акван-атсанэ ос кон-квāлыс. Мир такем-та осятахтыглас ос Тōрум янытлым лāвыглāлыс:

— Тамле нак мāн нэ̄мхуньт ат вāсинтасув.

Ӣсус Лēви нампа хум вōви

13Ань Ӣсус ōс ся̄рысь вāтан минас. Тав мӯвлахитэ̄т сāв мир атхатасыт. Тав тāнаныл ханисьтасанэ.14Ся̄рысь вāтат ё̄миматэ Тав Алфей-ōйка пыг Лēви касаластэ. Лēви пōт-олн атым ӯнлыс. Ӣсус тавēн лāвыс:

— Ам ётум минымēн.

Ань хум Тав ётэ та минмыгтас.

15Ӣсус ханисьтахтын хумиянэ ёт Лēви колт ӯсьлахтасыт. Тув ань пōт атнэ хумыт ос карекыӈ хōтпат ёхтысыт. Тав юи-пāлэ̄т āкваг сāв мāхум минасыт.16Сāккон ханисьтан хумыт ос фарисейт Таве сāвсыр мир ёт тэ̄нэ̄тэ порат кāсаласаныл, ōс ханисьтахтын хумиянэ нупыл лāвыглāлсыт:

— Тав пōт атнэ хумыт ос карекыӈ хōтпат ёт манрыг тэ̄г-айи?

17Ӣсус ты лāтӈыт хӯнтамлас ос ювлэ-лāвыс:

— Пус хōтпан лēккар хунь э̄ри. Āгмыӈ хōтпан лēккар э̄ри. Ам вēськат хōтпат ат вōвēгум. Ам карекыӈ хōтпат кареканыл хот-вуськасан мāгыс ёхтысум.

Пост ос сабат-хōтал урыл

18Иоан ханисьтахтын хумиянэ ос фарисейт поститахтасыт. Тāн Ӣсус палт ёхтысыт ос китыглахтасыт:

— Иоан ос фарисейт ханисьтахтын хумияныл поститахтэ̄гыт. Наӈ ханисьтахтын хумиянын манрыг ат поститахтэ̄гыт?

19Ӣсус тāнанылн лāвыс:

— Пури порат нэ̄ тотнэ хум юртанэ тэ̄нутныл ат воратэ̄гыт. Нэ̄ тотнэ хум ōлнэ̄тэ сыс, тāн касмустал ōлуӈкве ат вермэ̄гыт.20Хунь нэ̄ тотнэ хум хот-виве, тōнт юртанэ поститахтэ̄гыт.

21— Асыӈ пес маснутыт йильпи тōрыл нэ̄мхотъютын лап ат лолсалавет. Йильпи тōрыл лолсалым асыт усьпылнэ̄г янгыг пасапēгыт.22Усь-āстум вина пēс сов хӯргын нэ̄мхотъютын ат сōсаве. Сōсавеке, ань та винан пēс хӯрыг пāлыг-маныгтаве. Винатэ кон-сōсхаты. Усь-āстум вина йильпи сов хӯргын сōсуӈкве э̄ри.23Аквматнакт сабат-хōтал порат Ӣсус ня̄нь-пум янмалтан тэ̄пкан хосыт ё̄мантас. Тав ханисьтахтын хумиянэ колас-самыт маныгтаӈкве патсыт.24Тōнт фарисейт Ӣсус нупыл лāвсыт:

— Сунсэ̄н, тāн тох манрыг вāрēгыт? Сабат-хōтал тох вāруӈкве ат рōви.

25Ӣсус тāнанылн лāвыс:

— Нāн ман нэ̄мхуньт ат ловиньтāлсын: Давид-хōн мāныр вāрыс хунь тав мāхманэ тэ̄тал ōлсыт?26Авиафар яныг пӯпыг ōлум порат Давид-хōн Тōрум колн сялтыс ос Тōрумн ӯнттым ня̄нь тэ̄ӈкве ōвылтахтас. Та ня̄нил юрт мāхманэ ёт уртхатас. Ань пӯпыт коны-пāл ты ня̄нь нэ̄мхотъютын тэ̄ӈкве ат рōвыс!

27Тувыл Ӣсус лэ̄выс:

— Сабат-хōтал э̄лумхōлас мāгыс ōлы. Э̄лумхōлас сабат-хōтал мāгыс aт ōлы.28Э̄лумхōлас Пы̄г ань сабат-хōтал кӯсяйиг ōс ōлы!


*а 2:14 пōт-олн — ты русь лāтӈыл налоги

*б 2:16 фарисей — Моисей сāккон сирыл ōлнэ ос сāккон э̄лаль тотнэ хум

*в 2:17 веськат — ты: ёмас

*г 2:18 пост — тэ̄тал ōлнэ пора


предыдущая глава Глава 2 следующая глава