Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

JIÄVINDÜ IIVANALE

Глава 14

Uuzi pajo Sionan mäil

1Sit minä näin: kačo vai, Vuonu seizou Sionan mäil da Hänenke sada n'ellikümmenn'elli tuhattu, kudamien oččah on kirjutettu Hänen nimi da Hänen Tuatan nimi.2Minä kuulin taivahaspäi iänen, kudai oli gu suurien vezien bauhu, libo gu suuren jürün räčkeh. Iäni, kudaman minä kuulin, oli vie kui arfan iäni, konzu arfansoittajat soitetah omal arfal.3Prestolan ies da niilöin n'ellän elävän da vahnimien ies hüö pajatettih uuttu pajuo. Niken muut ei voidu opastuo sidä pajuo, vai net sada n'ellikümmenn'elli tuhattu, kudamii oli ostettu mualpäi.4Hüö ollah net, kudamat ei paganoitettu iččie naizienke, hüö ollah koskemattomat. Hüö mennäh Vuonan peräh, mengäh Häi kunnetahto. Heidü on ostettu rahvahien joukos gu uudine Jumalale da Vuonale.5Heijän suus ei kuultu kielastustu, hüö ollah soimuamattomat.

Kolme anhelii

6Sit minä näin vie ühten anhelin, kudai lendi keskitaivahal. Häi kandoi ilmanigästü jevangeliedu, gu kuuloittua se kaikile muan eläjile, kaikile rahvahile, roduloile, kielile dai mualoile.7Häi sanoi korgiel iänel: «Varakkua Jumalua da ozutakkua Hänele kunnivuo, Hänen suvvon aigu on tulluh! Kumarduattokseh Hänele, kudai on luadinuh taivahan, muan, meren dai kai viennouzemat!»

8Hänele jälles tuli toine anheli da kirgui: «Kuadui, kuadui suuri Vavilon, kudai omal karguandal pani kai rahvahat juomah Jumalan vihan viinua.»

9Nämile kahtele anhelile jälles tuli vie kolmas anheli, kudai sanoi korgiel iänel: «Ken kumardannehes zvierile da hänen kuvale, ken ottanou oččah libo kädeh hänen merkin,10segi rubieu juomah Jumalan vihan viinua, kudai on laimendamattomannu valettu Hänen vihan mal'l'ah. Händü ruvetah muokkuamah tulel da rikil pühien anheliloin da Vuonan ies.11Sit tules, kudamal muokatah nämii ristikanzoi, nouzou savvu üläh ainos dai ilmazen ijän, i ni üöl, ni päiväl ei rodei rauhua niilöile, kudamat kumardetahes zvierile da hänen kuvale, eigo nikelle, ken ottau hänen nimen merkin.12Täs küzütäh lujuttu jumalanuskojis, niilöis, kudamat noutah Jumalan käskülöi da uskotah Iisussah.»

13Sit minä kuulin taivahaspäi iänen, kudai sanoi: «Kirjuta: Ozakkahat ollah net, kudamat täs aijas lähtijen kuoltah Ižändän ominnu! Se on tozi, sanou Hengi. Hüö voijah huogavuo omis vaivois, gu heijän ruavot tullah heile peräh.»

Vil'l'an leikkavoaigu

14Sit minä näin: oli valgei pilvi, a pilvel istui kenlienne ristikanzan luaduine. Hänel piäs oli kuldaine venču i käis terävü širpi.15Vie üksi anheli tuli pühäkoispäi. Häi kovah kirgai pilvel istujale: «Pane širpi ruadamah da leikkua, nügöi on leikkavoaigu - muan vil'l'u on küpsi leikattavakse!»16Pilvel istuju lükkäi oman širpin muale, i muan vil'l'u oli leikattu.

17Vie toine anheli tuli taivahallizes pühäkoispäi, hänel sežo oli terävü širpi.18Altarispäi sežo tuli anheli, se kudai ižändöičči tuldu. Häi kovah kirgai sille anhelile, kudamal oli terävü širpi: «Pane ruadamah oma terävü širpi da keriä viinumuarjuskänčät muan viinumuarjupellos, gu muarjat küpsettih.»19Anheli lükkäi oman širpin muale, leikkai viinumuarjuskänčät muan viinumuarjupellos da lükkäi net Jumalan vihan suureh viinupuzerdamoh.20Muarjat polgiettih puzerdamos linnan ulgočural, i veri valui piäliči puzerdamon reunois, katoi muan tuhandele kuvvelesuale stadionale*a da nouzi hevon suiččih suate.


*a 14:20 Tuhat kuuzisadua stadionua on nenga 300 virstua.

предыдущая глава Глава 14 следующая глава