Your word is a lamp to my feet

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАСЯНЬ ВЕЖА БУР ЮӦР

Глава 3

Пыртісь Иоанлӧн велӧтӧм

(Мт. 3:1-12; Мк. 1:1-8; Ин.1:19-28)

1Дасвитӧт во Римын юраліс Тиверий ӧксу. Сы кипод увтісь муэзын сэк веськӧтлісӧ: Иудея муын ─ Понтий Пилат, Галилеяын ─ Ирод, сылӧн Филип воныс Итурея да Траконит муэзын, Лисаний ─ Авилинеяын.2Сэк аркирейес вӧлісӧ Аннас да Каиаф. Закарлӧн Иоан зоныс оліс кушмуын. Сія кадӧ сылӧ локтіс Енсянь кыв.3Сы бӧрсянь сія пондіс ветлӧтны Иордан гӧгӧрись муэзӧт. Сія юӧртіс: «Умӧль керӧммезныт дынісь бергӧтчӧ Енлань да пыртчӧ, медбы Еныс проститіс тіянлісь умӧль керӧммезнытӧ».4Енсянь юӧртісь Исай небӧгын этія йылісь гижӧм сідз:

─ Горӧтісьлӧн шыыс кылӧ кушмуын:
«Лӧсьӧтӧ туйсӧ Дӧсвидзисьлӧ,
Сы понда туйесӧ веськӧтӧ!
5Ась быд кырасыс лоас тыртӧм.
Быд керӧсыс мысыскӧт лэдзчисясӧ,
чукыллес веськаласӧ.
Гӧпья туйес волькамасӧ.
6Сэк быдыс пондас адззыны,
кыдз Еныс мездӧтӧ отирсӧ».

7Иоаныс сы дынӧ пыртчыны локтӧм отирыслӧ висьтавліс: «Кыйсянь шогмӧммез! Кин тіянӧс велӧтіс пышшыны локтан лӧгсис?8Мыччалӧ керӧммезнаныт Енлань бергӧтчӧмнытӧ. Эд баитӧ аслыныт: миян айным Авраам. Тіянлӧ баита: эна иззэзісь Еныс вермас Авраамыслӧ сувтӧтны челядьсӧ.9Черыс куйлӧ ни пу вуджыс бердын. Быд пусӧ, кӧда оз вай бур воӧмсӧ, кералӧны, чапкӧны биӧ».

10Отирыс Иоаныслісь юасисӧ: «Мый миянлӧ керны?»11Сія нылӧ висьталіс: «Кинлӧн кык паськӧм, сет пасьтӧмыслӧ. Кинлӧн эм сёян, сет тшыгыслӧ».12Пыртчыны локтісӧ вот ӧктіссес да юалісӧ: «Велӧтісь, мый миянлӧ керны?»13Сія нылӧ висьталіс: «Вотсӧ босьтӧ дзир сымда, мымда колӧ, унажык эд корӧ».14Воиннэз сылісь юасисӧ: «А миянлӧ мый керны?» Сія нылӧ висьталіс: «Повзьӧтлӧмӧн да бӧбӧтлӧмӧн отирлісь нем эд мырддьӧ. Олӧ дзир асланыт удж понда босьтӧм сьӧмӧн».

15Отирыс видзчисисӧ Мездӧтісьсӧ. Сійӧн Иоаныс йылісь юраныс видзисӧ, абу я пӧ сія Кристос-Мездӧтісьыс?16Иоаныс быдӧнныслӧ баитіс: «Ме тіянӧс пырта ваӧн. Но локтӧ месся Вынажык. Ме абу туяна морт нельки пӧрччавны Сы кӧмкӧтісь домӧтсӧ. Сія пондас тіянӧс пыртны Вежа Лолӧн да биӧн.17Ассис зырсӧ Сія видзӧ киас. Гунасӧ Сія весӧтас: шогдісӧ тӧлӧтас да чукӧртас сусекӧ, йикисӧ куслытӧм биын сотас».

18Уна и мӧдік кыввезӧн Иоаныс велӧтіс отирсӧ, висьтасис нылӧ Бур Юӧрсӧ.19Сія Ирод ӧксулӧ чорыта висьтавліс воныслісь Иродиада иньсӧ ас саяс босьтӧм йылісь да и мӧдік умӧль керӧммез йылісь.20Иродыс содтіс ассис умӧль керӧммесӧ: Иоансӧ пуксьӧтіс.

Исусӧс пыртӧм

(Мт. 3:13-17; Мк. 1:9-11)

21Быдӧс отирыс пыртчӧм коста пыртчис и Исусыс. Сэтӧн Исуслӧн кеймӧм коста енӧжыс оссис.22Вежа Лолыс лэдзчисис Сы вылӧ дуді кодь вывтырын. Енӧжсянь кыліс баитан шы: «Тэ Менам дона Зонӧ, олан гажӧ».

Исуслӧн увтыр

(Мт. 1:1-17)

23Аслыс Исусыслӧ уджсӧ пондӧтікӧ вӧлі куимдас во. Отирыс чайтісӧ: сія пӧ зоныс Ӧсиплӧн. Ӧсипыс вӧлі Иллялӧн.24А Иллялӧн Матфат айсянь бӧрланьӧ кӧ видзӧтны вӧлісӧ айес: Левий, Мелхий, Ианнай, Ӧсип,25Маттафия, Амос, Наум, Еслим, Наггей,26Мааф, Маттафия, Семей, Ӧсип, Иуда,27Иоаннан, Рисай, Зоровавель, Салафиль, Нирий,28Мелхий, Аддий, Косам, Елмодам, Ир,29Иосия, Елиезер, Иорим, Матфат, Левий,30Симеон, Иуда, Ӧсип, Ионан, Елиаким,31Мелеай, Маинан, Маттафай, Нафан, Давид,32Иессей, Овид, Вооз, Салмон, Наассон,33Аминадав, Арам, Есром, Фарес, Иуда,34Яков, Исак, Авраам, Фарра, Нахор,35Серух, Рагав, Фалек, Евер, Сал,36Каинан, Арфаксад, Сим, Ной, Ламех,37Мафусал, Енок, Иаред, Малелеил, Каинан,38Енос, Сиф, Адам, Ен.


*а 3.2 аркирей ─ первосвященник

*б 3.4 небӧг ─ книга

*в 3.7 кый ─ змея

*г 3.9 воӧм ─ плод

*д 3.12 вот ─ налог

*е 3.14 сьӧм ─ деньги

*ж 3.16 туяна ─ достойный


предыдущая глава Глава 3 следующая глава