Your word is a lamp to my feet

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАСЯНЬ ВЕЖА БУР ЮӦР

Глава 2

Исуслӧн шогмӧм

(Мт. 1:18-25)

1Нія луннэзӧ Римын юралісь Август ӧксу тшӧктіс лыддьыны быдӧс отирсӧ аслас кипод увтын муэзісь.2Сія отирсӧ лыддьӧмыс вӧлі медодззаись. Сы коста Сирияын юраліс Квириний.3Быд морт муніс гижсьыны сія карӧ, кытісь сія вӧлі увтырнас.

4Галилея муись Назарет карись Ӧсип муніс Иудея муӧ, Давидлӧн Вифлеем карӧ. Ӧсипыс эд вӧлі Давид увтырись.5Гижсьыны сія муніс сы сайӧ корасьӧм Мариякӧт, кӧда сэк новйӧтчис.6Сэтчин олікӧ Мариялӧ локтіс ваян кад.7Сія вайис Зонӧс, ассис медодзза кагаӧс, Сійӧ каттис да пуктіс яслиӧ. Нія эд эзӧ вермӧ сюрны сувтчан керкуӧ.

Ангеллэзлӧн юӧртӧм

8Сія муын, ыб вылын, вӧлісӧ баля видзӧтіссез. Нія ойнас видзӧтісӧ баля чукӧрныс сьӧрын.9Видзчисьтӧг ны одзын сувтіс Дӧсвидзисьлӧн Ангел. Дӧсвидзисьлӧн югьялӧмыс югдӧтіс нійӧ. Нія ӧддьӧн повзисӧ.10Ангелыс нылӧ висьталіс: «Эд полӧ. Ме висьтала тіянлӧ гажа юӧр. Сія юӧрсянь быдӧс отирыс гажмасӧ.11Ӧні Давид карын чужис Мездӧтісь. Сія ─ Дӧсвидзись Кристос.12А эта тіянлӧ лоас пасӧн: тійӧ адззат каттьӧм кагасӧ яслиись».

13Видзчисьтӧг ангелыскӧт мыччисисӧ енӧжись унася-уна воиннэз. Нія ошкисӧ Енсӧ:

14─ Ошкӧм Еныслӧ вылын енӧжас!
Лӧнь олан му вылын отирлӧ, кӧднӧ Сія радейтӧ!

15Ангеллэс мунісӧ енӧжас. Сэк баля видзӧтіссес висьталісӧ ӧтамӧдныслӧ: «Мунам Вифлеемас, видзӧтам сэтчин лоӧмсӧ, Дӧсвидзисьсянь миянлӧ юӧртӧмсӧ».16Нія тэрмасьӧмӧн локтісӧ сэтчин, адззисӧ Мариясӧ, Ӧсипсӧ да яслиын Кагасӧ.17Быдӧс адззылӧм бӧрсянь висьтасисӧ Кагаыс йылісь нылӧ юӧртӧмсӧ.18Баля видзӧтіссезлӧн висьтасьӧмсянь кывзіссесӧ быдӧннысӧ диво кутіс.19Марияыс висьтасьӧмсӧ босьтіс сьӧлӧмас да пыр видзис тӧдвылас.

20Баля видзӧтіссес бертісӧ ыб вылас. Нія ошкисӧ, буркывтісӧ Енсӧ кылӧм-адззылӧмныс понда. Быдӧс эд вӧлі сідз, кыдз нылӧ вӧлі висьталӧм.

Исусӧс вайӧтӧны Вежа Керкуӧ

21Кыкьямыс лун чулалӧм бӧрті локтіс кад вундыштыштны кагасӧ. Сылӧ нимсӧ сетісӧ Исус. Марияыс сьӧктытӧдз ангелыс сійӧ нимсӧ и сетіс Кагаыслӧ.22Моисейлӧн Туйдӧтын висьталӧм сьӧрті локтіс сӧстӧмсялан лун. Сэк Мария да Ӧсип мунісӧ Ерусалимӧ вайӧтны Исуссӧ Дӧсвидзись одзӧ.23Дӧсвидзисьлӧн Туйдӧтас эд гижӧм: «Мам кынӧмись медодзза петӧм зон ась лыддиссьӧ Дӧсвидзисьлӧн».24Дӧсвидзисьлӧн Туйдӧтын висьталӧм сьӧрті нылӧ колӧ вӧлі вайны езъялан козин: кык вӧр дуді али кык дуді пиян.

Симеонлӧн юӧртӧм

25Сія кадӧ Ерусалимас вӧлі Симеон нима морт. Сія юрбитіс Енлӧ да оліс Сы сьӧрті веськыта. Видзчисис Сійӧ, кин бурӧтас Израильсӧ. Вежа Лолыс вӧлі Сы вылын.26Симеоныс оз пӧ кув Дӧсвидзисьлісь сетӧм Кристос-Мездӧтісьсӧ адззывтӧдз. Сылӧ сідз висьталӧм вӧлі Вежа Лов.27Вежа Лов ӧзйӧтіс Симеонӧс локны Вежа Керкуӧ. Сэк ай-мамыс вайӧтісӧ сэтчӧ Исуссӧ, медбы быдӧс керны Туйдӧтын тшӧктӧм сьӧрті.28Симеоныс Кагасӧ босьтіс киас, oшкис Енсӧ да висьталіс:

29─ Юралісьӧ, ӧні Аслат висьталӧм сьӧрті
лэдзан Ассит рабтӧ лӧня мунны.
30Ме аслам синнэзӧн адззылі Мездӧтісьсӧ,
31Кӧдӧ Тэ сувтӧтін быд отир понда.
32Сія ─ Югытыс, Кӧда югдӧтас ентӧдтӧммесӧ,
ваяс югьялӧмсӧ Тэнат Израиль отирлӧ.

33Ӧсипсӧ Марияыскӧт кагаыс йылісь висьталӧмсянь диво кутіс.34Симеоныс нійӧ бласлӧвитіс. Исуслӧн Мария Мамлӧ висьталіс: «Эта кага кузя Израильын унаэз усясӧ, унаэз лэбтісясӧ. Сія Енсянь сетӧм пас. Сы кузя етшасьны пондасӧ.35Сэк уналӧн юраныс видзӧммес оссясӧ. А Тэнчит сьӧлӧмтӧ кыдз шыпуртӧн бытшкасӧ».

Анналӧн юӧртӧм

36Сэтӧн сэк вӧлі Анна нима Енсянь юӧртісь. Сія вӧлі Асир увтырись Фануиллӧн ныв, пӧрись ни. Аслас жӧниккӧт нывкасянь сія олӧм дзир сизим во.37Дӧваыслӧ вӧлі кыкьямысдас нёль во. Сія ой и лун кысъяліс Енлӧ: кӧслунавліс да кеймис. Вежа Керкуись сія эз и ветлывлы.38Исуссӧ бласлӧвитӧм коста Аннаыс сибӧтчис ны дынӧ да ошкис Дӧсвидзисьсӧ. Ерусалимлісь мезмӧмсӧ быд видзчисисьлӧ сія висьтасис Исусыс йылісь.

39Дӧсвидзисьлӧн Туйдӧт сьӧрті быдӧс керӧм бӧрсянь нія бертісӧ Галилея муӧ, асланыс Назарет карӧ.40Кагаыс зорамис, вынсяліс ловнас, мывкыдсяліс. Енлӧн бурсетӧмыс вӧлі Сы вылын.

Исус Вежа Керкуын

41Быд во Исуслӧн ай-мамыс ветлывлісӧ Ерусалимӧ Ыджыт лун вылӧ.42Даскык вося Исускӧт нія одззамоз локтісӧ Ерусалимӧ вежалун вылӧ.43Ыджыт луннэз чулалӧм бӧрын мунісӧ бӧр туйӧ. Исус зонныс кольччис Ерусалимас, а мамыс Ӧсипыскӧт сы йылісь эзӧ тӧдӧ.44Нія чайтісӧ, Сія пӧ мунӧ мӧдіккезкӧт. Кузь лун мунӧм бӧрсянь пондісӧ кошшыны Сійӧ увтырныс да тӧдсаэс коласын.45Исуссӧ эзӧ адззӧ. Сійӧ кошшыны бертісӧ Ерусалимас.

46Куим лун бӧрті Исуссӧ адззисӧ Вежа Керкуись. Сія пукаліс велӧтіссез коласын, юасис нылісь да кывзіс.47Исусыслӧн вежӧртӧмыс да висьтавлӧммес быд кывзісьсӧ дивуйтчӧмӧдз вайӧтісӧ.48Сійӧ казялікӧ ай-мамсӧ диво кутіс. Мамыс Сылӧ висьталіс: «Зонӧ! Мый тэ керан миянкӧт? Мийӧ айыткӧт ёна тӧждісим, кошшим Тэнӧ».49Исусыс нылӧ шуис: «Мыйлӧ тіянлӧ коліс кошшыны Менӧ? Одӧ разь тӧдӧ, Меным эд колӧ лоны Айӧ ордын».50Но Сылісь кыввесӧ нія эзӧ вежӧртӧ.

51Исусыс муніс ныкӧт, локтіс Назаретӧ. Сія нійӧ пыр кывзісис. Зоныскӧт быд лоӧмсӧ мамыс видзис тӧдвылас.52Исусыс быдмис, зорамис, мывкыдыс Сылӧн содіс. Сійӧ радейтісӧ Еныс да отирыс.


*а 2.7 сувтчан керку ─ гостиница

*б 2.9 югьялӧм ─ слава

*в 2.12 пас ─ знак

*г 2.20 буркывтны ─ благодарить

*д 2.22 сӧстӧмсялан лун ─ Моисейлӧн Туйдӧтын висьталӧм сьӧрті зонӧс вайӧм бӧрын инька сӧстӧммӧ нёльдас лун сьӧрна. Сійӧн нёльдасӧт луныс шусьӧ сӧстӧмсялан лунӧн. Сія лунӧ Еныслӧ коліс вайны езъялан козин.

*е 2.25 бурӧтны ─ утешить

*ж 2.32 ентӧдтӧммез ─ язычники

*з 2.35 шыпурт ─ меч

*и 2.36 сизим во ─ 7 лет

*к 2.42 вежалун ─ праздник

*л 2.44 чайтны ─ думать


предыдущая глава Глава 2 следующая глава