Your word is a lamp to my feet

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ОԒӘӇ ЭԒТЫ НЭПЕК

Глава 18

Авраам хуԓәм мойәӈ ху

1Мамре дуб йўхәӈ ут хŏща, хӑтәԓ кўтәп рўвән пирщин хот овәԓ пўӈәԓән Авраам омәсмаԓән, ԓўв хŏщайәԓ Турәм Куща этәс.

2Авраам сэмӈиԓаԓ нŏх аԓәпсәԓы пӑ шийаԓәсԓы, хуԓәм йох хŏйат ԓўв эԓтэԓ йэԓәншәк ԓойԓәт. Ԓывиԓаԓ шийаԓәмаԓ кемән, пирщин хот овәԓ эԓты ԓыв хŏщайэԓ йэщаԓт хухәԓмәс пӑ мўв унты иԓ ԋўрщәман ŏх пŏнәс,

3пӑ йастәс: «Вŏԓаӈ Куща! Нӑӈ йӑм сэмән ма пеԓайэм ватԓән ки, Нӑӈ митхуйэн хот мŏхты аԓ мӑна;

4кўрԓән ԉŏхәтты йикән туԓайты, щӑԓта тӑм йўх иԓпийән щўтщаты,

5ма пӑ ԋаԋ туԓәм, нын сӑмԓән ԓэщтәты урәӈән, щӑԓта йэԓԓы мӑнты верәтԓәты; ищипа щи ин нын митхуйән хŏща йŏхәтсәты». Ԓыв йастәсәт: «Хŏты пŏтәртԓән, щиты веры».

6Щӑԓта Авраам пирщин хота, Сарра хŏща, тэрматыман ԓŏӈемәс пӑ йастәс: «Хуԓәм мера арат йӑм ԓат сорашәк рўвта пӑ паԓәм ԋаԋ вера».

7Щӑԓта тащәԓ хŏща Авраам хухәԓмәс, мет йӑм ай мис пŏшәх пирыйәс, айкем митхуйәԓа мӑсԓы пӑ щитәԓ ԓэтŏт сора верты питәс.

8Щӑԓта вŏй пӑ мис йик, пӑ йӑԓпа кавәртәм ԋŏхи ўс, пӑ ԓыв йэԓпиԓаԓән омәссәԓы, ԓўв пӑ ԓыв пўӈԓэԓән йўх иԓпийән ԓойәс. Ԓыв пӑ ԓэсәт.

9Щӑԓта ԓўвеԓа йастәсәт: «Сарра иимен пӑ хŏта?» Ԓўв йастәс: «Тӑта, пирщин хотән».

10Итэԓ йастәс: «Папуш и тӑм пŏрайән Ма нӑӈ хŏщайэн па йŏхәтԓәм, пӑ Сарра иимен пŏх тӑйты питәԓ». Сарра пӑ пирщин хот ов сайән ԓойәс пӑ хуԓәнтәс.

11Авраам пӑ Сарра уна пелка йўвәм хŏйатӈән усӈән, Сарра нэ верԓаԓ йэтшәсәт.

12Сарра ԋӑхән йŏхәтса пӑ ԓўв сӑхатәԓ йастәс: «Ԏо, Ма пӑ, пирщамәмем йўпийән, ԋаврэм мўй щирән мŏщатԓәм? Иикем па пирәщ».

13Турәм Куща Авраам пеԓа йастәс: «Мўйа пӑ Сарра ԋӑхәс, йастәман: ‘Пирәщ турәмән мўй щирән ма ԋаврэм мŏщатԓәм?’

14Турәм Кущайа мŏԓты ԓавәрт вер хун уԓ? Папуш, йастәм хӑтԓэмән, Ма нӑӈ хŏщайэн йŏхәтԓәм, Сарра пӑ пŏх тӑйты питәԓ».

15Сарра пӑԓтамәс пӑ йастәс: «Ма ӑт ԋӑхсәм». Турәм Куща пӑ йастәс: «Ӑнта, нӑӈ ԋӑхсән».

Содом вош тӑԓаӈа хӑйты урәӈән Авраам пойкащәԓ

16Щӑԓта щи йох хŏйатәт нŏх ԓойсәт пӑ Содом вош пеԓа мӑтсәт; Авраам ищи ԓыв пиԓэԓән тŏхишәк унты йӑӈхәс.

17Щӑԓта Турәм Куща йастәс: «Ма мўй верты ўтщиԓәм, Авраам эԓты хӑԋатԓэм хун?

18Авраам эԓты вŏԓаӈ пӑ йурәӈ мир йӑна рутмәԓ, мўвән уԓты мирәт хŏԓ ԓўв хўватәԓән йӑмән мӑԓайәт,

19Ма ԓўвеԓ щи урәӈән пирысэм, щӑха ԓўв, ԋаврэмԓаԓа пӑ хиԓыԓаԓа, Турәм Куща аԉәм йуш хўват, тўӈа-щира пӑ вещката уԓман, шушты ат партԓәԓы, Турәм Куща пӑ мўй Авраама йастәс, ищи верԓәԓы».

20Турәм Куща йастәс: «Содом пӑ Гоморра вошӈән хŏйатәт уԓәпса эԓты ар хоԓԓәпәӈ ўв щащәԓ, кӑрэкеԓ шек ԓавәрт,

21иԓ ŏхәԓԓәм пӑ ватԓэм, йӑна мўй ԓыв щиты уԓԓәт, хŏты Ма хуԓԓыԓэм, мосәӈ, ӑнта, щит ԓэрапԓэм».

22Щи хŏйатӈән карэмәсӈән пӑ Содом пеԓа мӑтсәӈән; Авраам пӑ Турәм Куща йэщаԓт хŏԓна ԓойәс.

23Авраам Ԓўв хŏщайәԓ ванашәк мӑнәс пӑ йастәс: «Нӑӈ кӑрэкәӈ хŏйатәт пиԓән вещкат хŏйатәт мўй па пӑратԓәԓан?

24Мосәӈ, тӑм вошән ветйаӈ вещкат хŏйат уԓ? Пӑр мŏԓты Нӑӈ щи тӑха пӑратԓэн, щита уԓты щи ветйаӈ вещкат хŏйат урәӈән ӑт щаԉәтԓэн?

25Нӑӈ щиты ӑт верԓэн, вещкат хŏйатәт атәм хŏйатәт пиԓән пӑратԓәԓан хун, атәм хŏйатәт иты вещкат хŏйатәт сўтәтԓыԓан хун, Нӑӈ эԓтэн щит ӑт питәԓ! Иса мўв Сўт верты Ŏт йŏвра верәԓ хун?»

26Турәм Куща йастәс: «Содом вошән ветйаӈ вещкат хŏйат Ма уйәтԓәм ки, Ма ԓыв урӈеԓән хŏԓ щи тӑха щаԉәтԓэм».

27Авраам пӑ йастәс: «Ма пӑ Вŏсху пиԓән пŏтәртты йасӈем хŏԓна этәԓ, ма, таԓ хиш пӑ нампәр:

28мосәӈ, ветйаӈ вещкат хŏйат унты вет туп ӑт тӑрмәԓ? Нӑӈ тӑԓаӈ вош щи ӑт тӑрәмты вет хŏйат урәӈән пӑратԓэн хун?» Ԓўв йастәс: «Ӑт пӑратԓэм, ԋӑԓйаӈ вет щита уйәтԓәм ки».

29Авраам Ԓўв пиԓәԓән йэԓԓы пŏтәртәс пӑ йастәс: «Мосәӈ, ԋӑԓйаӈ щита ԉикмәԓ?» Ԓўв йастәс: «Ԋӑԓйаӈ хŏйат урәӈән Ма щит ищи ӑт верԓэм».

30Щӑԓта Авраам йастәс: «Вŏсху ӑт ат ԉикащәԓ, ма па йастәԓәм: мосәӈ, щита туп хŏԉмаӈ хŏйат питәԓ?» Ԓўв йастәс: «Ӑт верԓэм, хŏԉмаӈ щита ԉикмәԓ ки».

31Авраам йастәс: «Ма пӑ Вŏсху пиԓән пŏтәртты йасӈем хŏԓна этәԓ: мосәӈ, щита хус ԉикмәԓ?» Ԓўв йастәс: «Хус урәӈән ӑт пӑратԓэм».

32Авраам йастәс: «Вŏсху ӑт ат ԉикащәԓ, ма и пуш па иԋщәсԓэм: мосәӈ, щита йаӈ туп питәԓ». Ԓўв йастәс: «Йаӈ урәӈән ӑт пӑратԓэм».

33Щӑԓта Турәм Куща мӑнәс, Авраам пиԓән пŏтәртты вŏԓыйәс; Авраам пӑ ԓўв уԓты тӑхайәԓа йŏхԓы мӑнәс.


предыдущая глава Глава 18 следующая глава