Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛӸН ЕФЕСЯНВЛӒЛӒН КОЛТЫМЫ СИРМӒШӸЖӸ

2 Глава

1 Колымаш гӹц ӹлӹмӓшӹш. 11 Иудей дӓ вес халыквлӓм Христос иктӹш уша.

1Тӓ пӹтӓри худа пӓшӓдӓ дӓ сулыкда гишӓн колышы линдӓ.2Тӹ веремӓн тӓ худам ӹштен ӹлендӓ, ти сӓндӓлӹкӹштӹшӹ ӹлӹмӓш-овуца доно келшен, воздухыштышы властьын тӧрӓжӹн – шамак колыштдымывлӓ лошты кӹзӹтӓт ӹштӹшӹ шӱлӹшӹн – шанымыжы семӹнь ӹштендӓ.3Нӹнӹ лошты пӹтӓри мӓӓт цилӓн кӓп дӓ йӓнгнӓн сулыкан шыкланымышты семӹнь, кӓп дон йӓнгӹн дӓ шанымашын ядмыштым шоктен ӹленнӓ дӓ кӧргӹ природына доно молы семӹньок Йымын шӹдӹжӹм ӹшке вӹлӓннӓ ужшашлык ылына ыльы.4Но пурылыклан паян Йымы ӹшке кого яратымашыжы доно мӓмнӓм тенге яратен,5мӓмнӓм, худа пӓшӓвлӓнӓ гишӓн колышывлӓм, Христос доно иквӓреш ӹлӹшӹм ӹштен. Йымын благодатьшы доно тӓ ытарымы ылыда.6Тенгеок Йымы мӓмнӓм Христос Иисус доно иквӓреш ӹлӹжтен дӓ Тӹдӹн доно ушнымашты мӓмнӓм пӹлгом сӓндӓлӹквлӓшкӹ шӹнден.7Мӓлӓннӓ Христос Иисус гач анжыктымы пурыжы доно Йымы Ӹшкӹмжӹн благодатьшын шукы пайдажым анзыкылашы курымвлӓштӹ пӓлдӹртӓш шанен.

8Благодать доно, ӹнянӹмӹ гач, тӓмдӓм ытарымы. Ытарымаш тӓ гӹцдӓ агыл, а Йымын подаркажы ылеш.9Иктӓт хвален ӹнжӹ керд манын, ытарымаш эдемӹн пӓшӓвлӓжӹ гишӓн агыл пуалтеш.10Мӓ Йымын ӹштӹмӹжӹ ылына, Тӹдӹн анзыцок йӓмдӹлӹмӹ пуры пӓшӓжӹм ӹштӓш Тӹдӹ мӓмнӓм Христос Иисус гач ӹштен.

11Тенгежӹ ӓшӹндӓрӹдӓ: пӹтӓри тӓ, шачынжы язычниквлӓ, – кӓпӹштӹм кид доно пӹчмӹ гишӓн пӹчмӓн маналтшывлӓ тӓмдӓм пӹчдӹмӹ маныт –12тӹ веремӓн Христос гӹц пасна ылында дӓ Израиль халыклан йӓл ылында, Йымын пумы сӧрӹмӓшӓн согоньвлӓлӓн ӧрдӹж ылында, тӓ сӓндӓлӹкӹштӹ анзыкылан уанымаш дӓ Йымы гӹц пасна ӹлендӓ.13А ӹнде тӓ, молнам мӹндӹрнӹ ылшывлӓ, Христос Иисус доно ушнымашты Христосын Вӹржӹ гач лишӹл линдӓ.

14-15Вет Христос – мӓмнӓн тырна, язычниквлӓ дон пӹчмӓнвлӓ гӹц Тӹдӹ ик тӹшкӓм ӹштен дӓ нӹнӹм айырышы стенӓм, вес семӹньжӹ, тышманланымашым, ӹшке колымашыжы доно шӓлӓтен. Ти кокты гӹц Ӹшкежӹ доно ик у эдемӹм ӹштӓш манын, законым дӓ тӹдӹн шӱдӹмӓшвлӓ дон тергӹмӓшвлӓжӹм укеш лыктын, тидӹн доно тырым канден.16Тенге Христос тышманланымашым крестӹ гач пӹтӓрӓш, тӹштӹ ти коктым Йымы доно пуремдӓш дӓ нӹнӹм ик кӓпӹш ушаш шанен.17Тӹдӹ толын дӓ тӓлӓндӓ, мӹндӹрнӹ ылшывлӓлӓнӓт, лишнӹ ылшывлӓлӓнӓт, тыр гишӓн пуры уверӹм шайыштын.18Христос гач нӹнӹжӓт, нинӹжӓт ик Шӱлӹш доно Ӓтя докы шон кердӹнӓ.

19Тенгежӹ, тӓ ӹнде йӓл дӓ ӧрдӹж эдем ада ыл, а святойвлӓ доно иквӓреш ик халыкок линдӓ, Йымын эдемвлӓжӹ ылыда.20Тӓ Апостол дон пророквлӓн негӹцеш ӹштӹмӹ пӧрт ылыда, а негӹцӹн огол кӱжӹ – Иисус Христос Ӹшкежок.21Тӹштӹ улы стройка тӧр ушна, кушкеш дӓ Господьын святой пӧртшӹ лиэш.

22Христос доно ушнымашты тӓӓт Шӱлӹш доно Йымын пӧртшӹ лидӓ.*a


*а 2:22 «Шӱлӹш доно Йымын пӧртшӹ лидӓ»: тидӹм «Пӧрт лидӓ, тӹштӹ Йымы Шӱлӹшӹжӹ гач ӹлӓ» манынат сӓрӓш лиэш.


предыдущая глава Глава 2 следующая глава