Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛӸН ЕФЕСЯНВЛӒЛӒН КОЛТЫМЫ СИРМӒШӸЖӸ

1 Глава

1 Вӓшлимӹ шамаквлӓ. 3 Христос гач эргӹлыкеш нӓлмӓш. 15 Лыдшывлӓ пӓлӹмӓшӹм нӓлӹштӹ манын ыдылмаш.

1Йымын ирӹкшӹ семӹнь Иисус Христосын Апостолжы ылшы Павел гӹц Ефесӹштӹ ӹлӹшӹ дӓ Христос Иисус доно ушнен шалгымашты ӹнян святойвлӓлӓн.

2Мӓмнӓн Йымы Ӓтянӓ гӹц дӓ Господь Иисус Христос гӹц тӓлӓндӓ благодать дӓ тыр лижӹ.

3Мӓмнӓн Господьна Иисус Христосын Йымыжы дӓ Ӓтяжӹ хвальымы лижӹ! Тӹдӹ пӹлгомыштышы сӓндӓлӹквлӓштӹ Шӱлӹшӹн улы благословайымыжы доно Христос гач мӓмнӓм благословаен.4Ӹшке анзылныжы мӓлӓннӓ святой лиӓш дӓ нимахань ситӹдӹмӓш гӹц пасна яратен ӹлӓш манын, сӓндӓлӹкӹм ӹштӹмешкок Тӹдӹ мӓмнӓм Христос гач айырен нӓлӹн.5Ӹшке пуры кымылжы дӓ ирӹкшӹ доно Иисус Христос гач Тӹдӹ мӓмнӓм ӹшке эргӹжӹ лиӓш пуйырен.6Тенгежӹ яратымы Эргӹжӹ гач мӓлӓннӓ подарымы лӹмлештӓрӓлтшӹ благодатьшы хвальымы лиэш.7Тӹдӹ гач, Тӹдӹн Вӹржӹ доно, мӓ ытарымы ылына, Йымы паян благодатьшы доно сулыкнам простен.8Ти благодатьшым Тӹдӹ цилӓ йиш кого ыш дӓ ынгылымаш доно мӓлӓннӓ пиш шукым пуэн.9Христос гач пӹтӓриок ӹштӓш шанымы ӹшке ирӹкшӹн тайныжым Тӹдӹ пуры кымылжы доно мӓлӓннӓ пӓлдӓрен.10Жеп цицмӓш шомыкы, Йымы тидӹм ӹштӓ, пӹлгомыштат, мӱлӓндӹ вӹлнӓт цилӓжӹмӓт, Христосын кид лӹвӓкӹжӹ пуэн, уша.

11Христос доно ушнен, мӓ наследник линнӓ, цилӓ ӹштен шоктышы Йымын ирӹкшӹ семӹнь тидӹлӓн анзыцок пӓлемдӹмӹ ылына. Тӹдӹн ирӹкшӹ дӓ шанымыжы семӹнь12мӓ, сек пӹтӓриок Христослан уанаш тӹнгӓлшӹвлӓ, Йымын лӹмлештӓрӓлтмӹжӹлӓн хвальымашым кандышы ӹлӹмӓш доно ӹлӹшӓшлык ылына.13А лачокын шамакым, тӓлӓндӓ ытарымашым кандышы Пуры Уверӹм, колмыкыда дӓ Христослан ӹнянӹмӹкӹдӓ, Тӹдӹн доно ушнымашты тӓӓт сӧрӹмӹ Святой Шӱлӹш доно пӓлемдӹмӹ ылыда.14Тӹдӹ мӓмнӓн наследствынан залогшы, Тӹдӹм Йымын эдемвлӓжӹм ытараш пумы, тенге Йымын лӹмлештӓрӓлтмӹжӹ хвалялтеш.

15Цилӓ тидӹ гишӓн мӹнь, Христос Иисуслан ӹнянӹмӹдӓ дӓ цилӓ святойвлӓм яратымыда гишӓн колмыкем,16ыдылмем годым тӓмдӓм соок ӓшӹндӓрем дӓ тӓ верцдӓ Йымылан цӓрнӹде таум ӹштем.17Мӓмнӓн Господьна Иисус Христосын Йымыжы, лӹмлештӓрӓлтшӹ Ӓтя, Тӹдӹм пӓлен нӓлӓшдӓ тӓлӓндӓ кого ыш дӓ пачмаш шӱлӹшӹм пужы.18-19Мам уанен вычаш Йымын мӓмнӓм ӱжмӹм пӓлӹдӓ, махань пайдаан дӓ пиш яжо наследим Тӹдӹ святойвлӓжӹлӓн пуа, ынгылыда манын, дӓ Тӹдӹн кого силажы мӓмнӓн, Йымын мычашдымы силажын ӹштӹмӹжӹ доно ӹнянӹшӹвлӓн, кӧргӹштӹнӓ махань кого ылмым пӓлӹдӓ манын, тӓмдӓн йӓнг сӹнзӓвлӓдӓм пачшы.20Силажым Христос вӹлнӹ анжыктен, Тӹдӹм колышывлӓ логӹц ӹлӹжтен кӹньӹлтен дӓ пӹлгомыштышы сӓндӓлӹквлӓштӹ Ӹшкежӹ гӹц вургымла монгыреш шӹнден.21Цилӓ Начальство, Власть, Сила, Хозаланымаш гӹц дӓ ти курымышты веле агыл, а анзыкылашы курымыштат сакой пумы лӹм гӹц Йымы Тӹдӹм кӱшкӹ шӹнден.22Христосын ял лӹвӓкӹжӹ Йымы цилӓ пиштен, дӓ Тӹдӹм цилӓ гӹц кӱшкӹ, Церкӹн вуйжылан шагалтен.23Церкӹ – Тӹдӹн Кӓпшӹ, цилӓштӓт цилӓм Циц ӹштӹшӹн цицмӓшӹжӹ.


*а 1:1 Ирӹк – воля, желание. Тенгеок – 1:5, 1:9, 1:11.


предыдущая глава Глава 1 следующая глава