Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛ ИОАНН БОГОСЛОВЫН УЛЫ ЦЕРКӸЛӒН КОЛТЫМЫ КОКШЫ СИРМӒШӸЖӸ

1 Глава

1 Вӓшлимӹ шамаквлӓ. 4 Лачок дӓ яратымаш. 12 Шӓлӓм келесӹмӓш.

1-2Старец дорц – Йымы айырен нӓлмӹ госпожалан дӓ тӹдӹн тетявлӓжӹлӓн.

Мӓ донна ушнен шалгышы, мӓ сагана курымеш лишӓшлык лачок верц мӹнь тӓмдӓм лачокшымат яратем, дӓ мӹнь веле агыл, а лачокым пӓлен нӓлшӹвлӓ цилӓн яратат.3Йымы Ӓтя дӓ Ӓтян Эргӹжӹ Господь Иисус Христос дорц благодать, жӓлӓйӹмӓш, тыр тӓ сагада лачок дӓ яратымаш доно лиштӹ.

4Ӓтян мӓлӓннӓ шӱдӹмӹжӹ семӹнь лачок доно ӹлӹшӹвлӓм тетявлӓэт лошты ужымат, когон сусу лим.

5Дӓ ӹнде тӹньӹм, госпожа, ядам: икӹжӓк-иктӹнӓм яратышашлык ылына. Мӹньӹн кӹзӹт сирӹмӹ шӱдӹмӓшем у агыл, тӹдӹм мӓлӓннӓ тӹнгӓлтӹшӹшток пумы,6а яратымашыжы Йымын шӱдӹмӹжӹ семӹнь ӹштӹмӓш ылеш. Тидӹжӹ – тӹнгӓлтӹш гӹцок колмы шӱдӹмӓшдӓ, тӓ тӹдӹ семӹнь ӹлӹшӓшлык ылыда.

7Сӓндӓлӹк вӹкӹ алталышывлӓ шукын лӓктӹнӹт. Нӹнӹ Иисус Христосын кӓпӓнгмӹжӹм дӓ эдем семӹнь ӹлӹмӹжӹм лачокеш ак шотлеп. Техень эдемвлӓ алталышы дӓ антихрист ылыт.8Мӓмнӓн пӓшӓ лӓктӹшнӓ ӹнжӹ ям манын, ӹшкӹмдӓм тӹшлӹдӓ, тӓрӹм мӓлӓннӓ цицмӓш нӓлӓш лижӹ.9Кӱ Христосын тымдымыжы доно ушнен ак шалгы дӓ тӹдӹ гӹц ӧрдӹшкӹ карангеш, техеньӹн Йымыжы уке; Христосын тымдымыжы доно ушнен шалгышын Ӓтяӓт, Эргӓт улы.10Кӱ тӓ докыда толеш дӓ Христосын тымдымыжым ак канды, тӹдӹм пӧртӹшкӹдӓ идӓ пырты дӓ «Шу ли!» манынат идӓ вӓшли.11Вет тӹдӹм «Шу ли!» манын вӓшлишӹ худа пӓшӓшкӹжӹ ушна.

12Тӓлӓндӓ сирӹшӓшем шукы улы, но мӹнь тидӹлӓн пумага дон чернилам ӹнем кычылт, а тӓмдӓн сусуда циц лижӹ манын, тӓ докыда минем дӓ вӓшӓ-вӓшӓ шӹнзӹн хытырынем.13Йымы айырен нӓлмӹ ӓкӓтӹн тетявлӓжӹ тӹлӓт шӓлӓм колтат. Аминь.


*а 1-2 «Йымын айырен нӓлмӹ госпожа дӓ тӹдӹн тетявлӓжӹ» церкӹм дӓ тӹшкӹ пырышы эдемвлӓм анжыкта манын шотлалтеш.


предыдущая глава Глава 1 следующая глава