Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ТИМОФЕЙНЕНЬ ПАВОЛОНЬ ОМБОЦЕ СЁРМАЗО

Глава 2

Кенярксов кулянть кисэ тюрема ды пиштема

1Истя, цёрынем, кемекстык прят Пазонь чанстьсэнть, кона максозь тенек Христос Иисус марто вейсэндямонть вельде.2Ды сень, мезенть тон марик монь пельде ламо кунсолыцятнень пингестэ, ёвтник-максык кемевикс ломантненень, конатне маштыть лиятненьгак тонавтомо.3Пиштть-майсек мартонок тонгак, кода Иисус Христосонь кемевикс солдат-ушман.4Кодамояк ушман а сюлми эсь прянзо кудоютконь эрямо-аштема тевсэ, эдь сон бажи туемс мельс сенень, конась сиведизе сонзэ ушманокс.5Ды кодамояк чийниця спортсменнэнь а максови изницянь каштаз, бути сон а карми чийнеме путозь койтнень коряс.6Истя сокицянтень-видицянтень, кона важоди псилгадомазонзо, васенцекс эряви максомс таликанзо чачозенть-касозенть эйстэ.7Арсек седе, мезде мон кортан. Кадык Азорось лезды теть чарькодемс весементь.

8Кирдть мельсэть Иисус Христос Азоронть, кона лиссь-чачсь Давидэнь юрсто ды ульнесь вельмевтезь кулозьстэ. Истя ёвтни Кенярксов кулясь, конань мон пачтян.9Те кулянть кисэ мон пиштянгак, мик пекстазян-тертязян, теке зыянонь теиця. Ансяк Пазонь валось мейсэяк а тертяви.10Секскак мон кирдян-кандан весементь Пазонь кочкавтнэнь кисэ. Кадык сыненсткак максови Христос Иисус марто вейсэндямонть эйсэ идема ды теке марто пингеде пингень инексчи.11Видеть неть валтнэ:
Бути минь кулынек Христос марто,
сестэ эрямояк карматано Сонзэ марто.
12Бути кирдтяно майсемат,
сестэ вейсэ мартонзо инязорокскак ультяно.
Бути минь Сонзэ эйстэ каясынек прянок,
сестэ Сонгак минек эйстэ каясы прянзо.
13Бути минь а кемевикст,
Сон ялатеке кадови кемевиксэкс,
эдь Сон Эсензэ эйстэ зярдояк прянзо а каясы.

Пазонь кемевикс важо

14Ледстнек весенень тень ды Азоронть икеле вешть пельдест, кадык а пелькстыть-спорить стяконь валтнэнь коряс. Тень эйстэ кодамояк лезэ арась, ды кунсолыцятненень сон канды ансяк зыян.15Пек бажак улемс Пазонть икеле Сонензэ кемевиксэкс ды истямо важодицякс, конанень амезень кисэ визделгалемс ды конась видестэ тонавты Пазонь видечинь валонть.16Кирдевть ве ёно Пазонть мельс а туиця чаво валтнэде-кельтнеде. Эдь сынст сравтницяст яла седе васов ды васов туить Пазонть эйстэ.17Ды сынст валтнэ сралить рак орманть ладсо. Нетнень ютксо Гименейгак Филет марто,18конат пурдасть видечинть ки лангсто ды кортыть: кулозьстэ вельмемась уш ульнесь-ютась. Истя сынь колыть-калавтыть конань-конань кемемаст.19А вана Пазонь путовт юрось ашти кеместэ, ды сонзэ лангсо сёрмадозь: «Азорось содасынзе Эсензэтнень» ды «Эрьвась, кие ёвтни Азоронть лемензэ, туезэ ве ёнов авидечинть эйстэ!»

20Нама, покш кудосо улить аволь ансяк сырнень ды сиянь кедьгеть, истя жо чувтонь ды сёвонень кедьгетькак. Веенстнэ, питнейтне, сайневить покш тевс, омбонстнэ, аволь питнейтне, эрьва чинь тевс.21Се, кие ванськавтсы прянзо беряненть-зыяновонть эйстэ, карми улеме кода питней кедьге. Сон алтазь Пазонтень, лезэв эсь Азоронстэнь ды анок эрьва кодамо паро тевс.

22Од ломанень лакиця ёжомарямотнеде тук-оргодть ве ёнов ды бажак видечис, кемемас, вечкемас, седейоймамос вейсэ весе сетнень марто, конат ванькс седейсэ тердить лездыцякс Азоронть.23Кирдевть ве ёно превтеме ды чаво пелькстамотнеде-спорямотнеде. Тон жо содат, сынь чачтыть-кастыть сёвномат.24Пазонь важонтень а лади сёвномс. Мекевланк, сонензэ улема весень марто чевте седейкс, маштома тонавтомо ды весементь кирдеме-кандомо,25сэтьместэ-чевтестэ путома превс каршо молицятнень. Сестэ Пазось, паряк, максы тенст янксема-велявтома ды видечинть чарькодема.26Ды истямо ладсо сынь сыть ёжос ды оргодить-менить Идемевсень кундамкастонть, ков сон саинзе сынст эсь мелензэ топавтомо.


предыдущая глава Глава 2 следующая глава