Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ТИМОФЕЙНЕНЬ ПАВОЛОНЬ ВАСЕНЦЕ СЁРМАЗО

Глава 6

Уреть ды сынст азорост

1Сеть, конат кандыть урексчинь ашконть, кадык невтить эсест азорост туртов седейшкавань ловома. Истя теезь, Пазонть лемезэяк ды тонавтомазояк а улить сялдозь-покордазь.2Сеть, кинь азорост кемицят, кадык а ветить эсь пряст мартост мелень апак путо, секс мекс сынь кемиця ялгаст. Мекевланк, кадык важодить тенст седеяк покш мельсэ, эдь азорост – кемиця ломанть, вечкевикст ды паро тевень теицят.

Авиде тонавтома ды алкуксонь сюпавчи

Тенень тонавт ды тердть ломантнень.3Бути кияк тонавты лия тонавтомас ды а моли минек Азоронть Иисус Христосонь шумбра валтнэнь мельга ды се тонавтоманть мельга, кона кирди-панжи Пазонтень алкуксонь кемеманть,4се прянь верьга кандыця ды мезеньгак а чарькодиця. Сонензэ педясь валсо пелькстамонь ды тюремань орма. Те вети сельмень сявадомас, сёвномас, покордамос-сялдомас, лиядо апаро мельсэ арсемас,5певтеме пелькстамос-сёвномас ломантнень ютксо, конатнень превест колазь ды конатне ёмавтызь видечинть. Сынь арсить: Пазонтень кемемась-важодемась – те ки, кона ветятанзат сюпавчис. Истятнэде кирдевть ве ёно.6Нама, Пазонтень кемемась-важодемась – те улияк покш сюпавчи сестэ, зярдо ломанентень саты се, мезезэ сонзэ ули.7Эдь минь мезеяк эзинек кандо те мирэнть-масторонть лангс, ды, нама, мезеяк тестэ мартонок а саевияк.8Бути ули ярсамопеленек ды оршамопеленек – сестэ текеяк кадык саты тенек.9Сеть жо, кить бажить сюпалгадомас, манявить пежетьс, понгонить кундамкас ды ламо превтеме ды зыянов мельтнес, конат таргить-ускить ломаненть кажос ды куломас-ёмамос.10Эдь весе кажотнень-зыянтнэнь юрось – те ярмаконь вечкемась. Улить истят ломанть, конатнень ярмак мельга правтомаст пурдавтынзе кемеманть эйстэ, ды сынсь таргасть лангозост алововикс майсемат-пиштемат.

Кемеманть кисэ паро тюрема

11А вана тон, Пазонь ломань, оргодть тень эйстэ! Бажак видечис, Пазонть мелензэ коряс эрямос, кемемас, вечкемас, цидярдомас, сэтьмечис.12Ветяк кемеманть кисэ паро тюрема, изник эстеть пингеде пингень эрямонть, конанень тон тердезят! Эдь ламотнень икеле тон апак кекше панжик эсеть кемемат.13Пазонть икеле, кона максы эрямо весементень, ды Христос Иисус икеле, кона Понтий Пилат икеле апак кекше панжизе эсь кемеманзо, мон кармавтан-энялдан теть:14ваньксстэ ды видестэ топавт весементь, мезе мон теть кармавтынь, минек Иисус Христос Азоронть самозонзо.15Аравтозь шкастонзо Сонзэ самонть панжсы-невтьсы тенек Пазось, шназь-чанстязь ды вейкине Виевесь, инязортнэнь Инязорось ды азортнэнь Азорось.16Сон ськамонзо, кие а кулыця. Сон эри истямо валдосо, козонь кияк малавгак а пачкодеви. Сонзэ вейкеяк ломань эзизе нее, ды Сонзэ а кода неемскак. Улезэ Сонензэ шнамо ды пингеде пингень азорксчи! Аминь.

17Кармавт сетненень, конат ней сюпавт те масторлангсонть: кадык пряст верьга а кандыть ды а нежедить аволь кемевикс сюпавчист лангс, мекевланк, кадык кемить-нежедить эриця Пазонть лангс, кона сюпавсто максы миненек весементь седеенек витемань кисэ.18Кармавт эйсэст паронь тееме, кадык сюпалгадыть вадря тевсэ. Кадык улить сюпав максыцякс ды анокт явомс лиятненень эсь уличидест.19Истямо ладсо сынь таштыть эстест сюпавчи – кеме юр сы шкантень, ды пачкодить пингеде пингень эрямос.

Меельце валтнэ Тимофейнень

20Тимофей, ванстык сень, мезесь, лангозот кемезь, тонеть максозь! Кирдевть ве ёно пазтомо ды чаво кортамотнеде ды пелькстамотнеде, конатнеде авидестэ мерить “содамочи”,21конань мельга молезь, кой-кить уш пурдасть кемеманть ки лангсто.

Пазонь чанстесь улезэ мартот! Аминь.


предыдущая глава Глава 6 следующая глава