Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОЛОССА ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 3

Кемицятнень од эрямост

1Истя, бути Пазось тынк вельмевтидизь Христос марто вейсэ, сестэ бажадо сенень, мезе менель лангсо, косо Христос озадо ашти Пазонть вить кедензэ ёно.2Арседе менеленседенть, аволь масторлангонседенть.3Эдь тынь кулыде, ды эрямонк Христос марто вейсэ кекшезь-ванстозь Пазонть кедьсэ.4Христос – тынк алкуксонь эрямонк. Зярдо Сон сы, сестэ Сонзэ марто тыньгак явсынк Сонзэ инексчинть.

5Секскак тыненк эряви куловтомс весе сень, мезесь тынк эйсэ модалангонь обуцянть эйстэ: ускурямо, аваньксчи, визькс мельть, зыянов бажамот ды вардонь сельмечи, кона вейкеть аволь алкуксонь пазнэнь сюконямонть марто.6Весе тень кисэ Пазонть кежесь стардсынзе сетнень, конат а кунсолыть Сонзэ.7Зярдо-бути тыньгак эриде истя жо, зярдо ульниде неть пежетнень ало.8А вана ней тыненк эряви ёртомс весе тень: кеженть, ацирьгалеманть, зыяновчинть! Сялдомат-покордамот ды амазы валт иляст лисне тынк кургсто!9Илядо кенгеле вейкенк-вейкенк туртов, эдь тынь уш каинк-ёртынк эсенк лангсто ташто ломаненть весе сонзэ лувонзо-коензэ марто.10Тынь оршавиде-вельтявиде од ломаньсэ, кона свал одкстоми, яла седе пек ды пек тееви эсь Теицянзо ёнов молицякс ды малавгады Пазонть алкуксонь чарькодемантень.11Ды тесэ уш весе вейкеть: арасть греккак, еврейгак, керявтозьгак, апак керявтояк, варваргак, скифкак, уреяк, олячисэяк. Ули ансяк Христос, Сон – весе ды весесэ!

12Тынь Пазонь кочкавт, Сонзэ иневанькс ды вечкевикс ломанензэ. Секс уледе свал седеймарицякс, лиянень паронь теицякс, сэтьмекс, чевте седеекс, куватень кирдицякс-цидярдыцякс.13Маштодо вейкенк-вейкенк коронь кирдеме ды нолдамо-простямо вейкенк-вейкенк покордамонть. Кода Христос нолдынзе тынк чумонк, истя тыньгак тееде.14Весе неть паро ёнкстнэнь марто сехте пек оршаводо-вельтяводо вечкемасо, кона весементь сюлми вейс ды теи асатыкстэмекс.15Кадык путы тынк седеенк виде ки лангс Пазонь максовт седейоймамось, конанень Пазось тынк тердидизь кода вейке рунгонь пелькст. Ды свал ёвтадо Тензэ сюкпря!16Кадык Христосонь валось эри тынк эйсэ весе эсь сюпавчисэнзэ. Тонавтодо, путодо превс вейкенк-вейкенк эрьва кодамо превейчисэ. Седейстэ лисиця сюкпрянь ёвтазь, моравтодо Азоронтень псалмат, шнамо морот ды Оймеялтонь максовт морот.17Кадык весе, мезе тынь тейтядо, валсояк, тевсэяк, тееви Иисус Христос Азоронть лемсэ, Сонзэ вельде Пазонтень ды Тетянтень сюкпрянь ёвтазь.

Превспутомат кудораськень ломантненень

18Нить, максынк прянк мирденк кедь алов, кода лади теемс сетненень, кить кемить Азоронтень.19Мирдеть, вечкеде нинк, илядо уле сыненст казямокс-кежеекс.20Эйкакшт, весемесэ кунсолодо тетянк-аванк, эдь те Азоронтень мельспаро.21Тетят, илядо ацирьгавтне эйкакшонк, те теи сынст пелицякс-нусманякс.

22Уреть, кунсолодо весемесэ масторлангонь эсенк азоронк ды тень тееде ванькс седейсэ ды Пазонть мельдензэ пелезь, аволь ансяк невтемань кисэ ды аволь ломаннень савтомга.23Весементь, мезенть тейтядо, тееде покш мелень путозь, кода Азоронть туртов, аволь кода ломаннень.24Кирдеде мельсэнк: тынь важодтядо Христос Азоронтень. Истя жо содадо: Сон макссы тенк алтазь казненть, конань анокстызе Эсь ломанензэ туртов.25А вана кие теи зыян, сенень пандовияк истямо жо зыянсо. Азоронть икеле весе вейкеть.


предыдущая глава Глава 3 следующая глава