Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ФИЛИППА ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 4

Павол максы превспутомат

1Секскак, вечкевикс кемиця ялган, кеместэ аштеде Азоронть марто вейсэндязь! Тынь монь кенярксом ды каштанчим, монь свал покш мелем неемс тынк, вечкевиксэнь!

2Мон энялдан Эводиянень ды Синтикиянень: эрядо апак пелькста, Азоронть марто вейсэндязь!3Истя жо, тонетькак энялдан, мартон алкуксонь важодиця, инеськеть, лездак неть кавто аватненень. Сынь тюрсть-важодсть Кенярксов кулянть кисэ монь ды Клемент марто вейсэ ды лия важодиця ялган марто. Весень сынст лемест сёрмадозь эрямонь книгасонть.4Кенярдкшнодо свал, эдь тынь эрятадо Азоронть марто вейсэндязь. Ды таго кортан: кенярдкшнодо!5Кадык весе несызь тынк лембе седеенк. Азорось уш маласо!6Мезень кисэяк илядо мелявто! Мекевланк, эрьва кодамо тевсэ панжинк эсенк вешеманк Пазонтень ознозь, энялдозь ды сюкпрянь ёвтазь.7Ды сестэ Пазонь максовт седейоймамось, кона ломанень превс саевицядонть пек седе сэрей, ванстсынзе тынк седеенк ды арсеманк Христос Иисус марто вейсэндязь.8Ды окойники, кемиця ялган, инеськеть, свал арседе седе, мезесь алкуксонь, мезесь паронь аштиця, мезесь виде, мезесь ванькс, мезесь вечкевикс, мельс туиця, – арседе весе вадрядонть ды шнавицядонть.9Тееде сень, мезенть тонавтнинк, мезенть саинк, мезенть маринк ды неинк монь пельде, ды сестэ Пазось, седейоймамонь лисьмапрясь, карми улеме мартонк.

Павол ёвты сюкпрят лезксэнть кисэ

10Азоронть марто вейсэндязь эрямосонть мон седейшкава кенярдан вана мезень кисэ: окойники, тынк таго кармась улеме виенк мелявтомс монь кисэ. Нама, тынк свал ульнесь меленк мелявтомс мондень, ансяк икеле арасель истямо ён шканк тень ютавтомс тевс.11Тень эйстэ мон кортан аволь арасьчим коряс. Аволь, мон тонадынь сатстомо сень, мезем ули.12Мон содаса арасьчинтькак ды уличинтькак. Эрьва кода ды эрьва ладсо мон тонадынь эрямо, вачокс ды пешксекс, кажовчисэ ды уличисэ.13Те весемесь монень кирдеви Иисус Христос вельде, кона максы тень вий.14Ды ялатеке тынь парсте теиде, зярдо явинк мартон монь стакачитнень.

15Тынсь, филиппансетне, содатадо: Македониясто монь туемадо мейле, зярдо ушодовсь Кенярксов кулянтень важодемам, ансяк тынк кемикурось кучнесь свал монень лезкс ярмаксо.16Тынь аволь весть кучниде Фессалоникавгак монень лезкс, кона монень пек эрявкшнось.17Тень мон кортан аволь сень кисэ, буто мон бажан вешемс пельденк казнеть. Мон бажан вана мезес: кадык тынк лездамось канды тенк седе покш касовкс-раштавкс.18Ней монень максозь весе, ды монь ули мик пек седе ламо сень коряс, мезе эряви. Эпафродит монень максызе весе, мезе тынь монень кучиде, ды ней монь ули весе эрявиксэсь. Тынк казнесь теке “тантей чинесэ сувтамо”, “анокс, кона Пазонтень вечкевикс ды мельс туиця”.19Ды кадык монь Пазось, Эсензэ ине сюпавчинзэ коряс, Христос Иисус вельде педе пес топавтсынзе весе тынк арасьчинк.20Шнамо Пазонтень, минек Тетянтень, пингеде пингес! Аминь.

Сёрмань меельце валтнэ

21Ёвтадо шумбракстнемат Пазонь весе ломантненень, Христос Иисус марто вейсэндязтненень. Кучить тенк шумбракстнемат кемиця ялгатне, конат тесэ монь марто.22Пазонь весе ломантне кучить тенк шумбракстнемат, ды седе пек сетне, конат важодить Римень кесарень кудосонть.23Минек Иисус Христос Азоронть чанстесь улезэ весеменк тынк марто! Аминь.


предыдущая глава Глава 4 следующая глава