Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ВАСЕНЦЕ СЁРМАЗО

Глава 4

Минь – Христосонь апостолт

1Истямо ладсо, кадык ловить минек Христосонь кемевикс важокс, конатненень максозь пачтямс Пазонь салавачитнень.2Сетнень пельде, конатнень максозь истямо покш тев, вешеви ансяк кемевиксчи.3Монь допрок а кавтолдовты се, бути карматадо монь судямо тынь эли ломанень кодамояк лия суд. Мон монськак а судян эсь прям.4Монь оймеёжом ванькс, ансяк те а невти монь чумовтомочим. Монь судиям вейке – Азорось.5Секскак, киньгак илядо чумондо шкадо икеле, зярс а сы Азорось. Сон таргасы валдос весементь, мезесь ней кекшезь чоподасо, ды ливтьсынзе лангс седеень салава мельтнень-бажамотнень. Ды сестэ эрьвантень тевензэ кисэ максови шнамо Пазонть пельде.

6Тыненк, кемиця ялгат, мон весе тень ёвтния эсень ды Аполлосонь ланга, кадык тонадовлиде тынь, минек лангс ванозь, апак превейгале теемс ансяк сень, мезе сёрмадозь. Сестэ тынь а карматадо каштангалезь ловомо вейкень лиядонть вадрякс.7Эдь кие тонь явинзеть лиятнеде? Мезе тонь ули истямот, мезесь бу аволь уле максозь теть Пазонть пельде казнекс? Ды бути тонеть весемесь максозь казнекс, сестэ мекс прят верьга кандат, буто тень весе теик тонсь?

8Нама, тынк уш эрьва мезенк ули! Тынь уш сюпавтадо! Тынь уш инязортадо – а вана минь аволь истят. Паро, бути тынь алкукскак теевлиде инязорокс, сестэ миньгак тынк марто улевлинек инязорокс!9Эдь кода монень маряви: Пазось теимизь минек, апостолтнэнь, меельцедеяк меельцекс, теке ломанть, конат судязь куломас весень сельме икеле. Минь теевинек ванома таркакс весе мирэнтень-масторонтень – ангелтнэненьгак, ломантнененьгак.10Минь Христосонь кисэ превтеметь, тынь жо пек превейть Христоснэнь кемемасонть! Минь лавшот, тынь жо виевть! Тынк пек ловить, минек жо мезекскак а путыть!11Течинь чис минь печтятано вачочи ды симемань само, минь нулавтано, минек нарьгить, минь свал якатано таркадо таркас.12Минь кшинек кисэ эсь кедьсэнек важодтяно псилгадомазонок. Зярдо минек сёвныть – минь ялатеке чанстятано-баславатано сынст. Минек эйсэ пансить – минь цидярдтано.13Минек лангс кенгелить – минь ёвтатано каршост паро валт. Минек течис ловить масторлангонь шукшпрякс, ломаньлувонь ёртовт сорокс.

14Мон весе тень сёрмадан аволь визьксчамас тынк совавтомга, мекевланк, превс тынк путомга, кода эсь вечкевикс эйкакшон.15Кадык тынк превс путыцянк Христоснэнь кемемасонть мик тёжадояк ламо, тетянк жо ансяк вейке! Те мон кандыя тенк Кенярксов кулянть ды тень вельде мон чачтыдизь тынк Христос Иисуснэнь кемицякс.16Секскак энялдан тенк: тееде весемесэ монь ладсо, кода мон теян Христос ладсо.17Те тувталонть кувалма мон кучия тыненк Тимофеень, кона Азоронтень кемеманзо кувалма монь вечкевикс ды кемевикс цёрам. Сон ледстясынзе мелезэнк сеть превспутоматнень, конатнень коряс мон молян Христос марто эсь эрямосон ды конатнес мон тонавтан эрьва косо, весе кемикуротнесэ.

18Тынк ютксо улить истят ломанть, конат кармасть покшкавтнеме ды арсеме: мон, паряк, тыненк уш а сан.19Ялатеке мон сан ды вельть курок, бути тенень ули Азоронть мелезэ, ды ванса неть покшкавтницятнень виест, аволь валост.20Эдь Пазонть Инязорксчизэ неяви вийсэ-тевсэ, аволь валсо.21Кодамо тынк меленк? Кода монень самс тыненк? Локшо марто эли вечкема ды лембе седей марто?


предыдущая глава Глава 4 следующая глава