Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 12

Иисус кармавты а улемс фарисейтнень кондямокс

1Те шкане Иисусонь перька пурнавсть ламо тёжат ломанть. Сынь мик лепштясть вейкест-вейкест. Иисус васняяк пшкадсь Эсензэ тонавтницятненень: «Ванстодо прянк фарисеень чапавтомадонть, лиякс меремс, чачонь полавтнемадонть.2Весе, мезесь ней кекшезь, лиси лангс, ды весе салавансеськак карми улеме содавиксэкс.3Секскак, весе, мезде тынь кортатадо чоподасо, ули марязь чи валдосо. Ды мезде тошкатадо пилестэ пилес кудо потсо, ули серьгедезь кудо лангсто».4«Кортан тенк, Эсень оятненень: илядо пеле сеть ломантнеде, конат маштсызь тынк рунгонк. Эдь теде мейле тынк туртов а тееви седе покш зыян.5Мон ёвтан тенк, киде пелемс: пеледе Седе, конань ули азорксчизэ рунгонь маштомскак ды тоначинь толс ёртомскак. Кортан тенк, вана киде пеледе.6Арази а кавто трёшникте микшнить вете озязтнэнь? Тень лангс апак вано, Пазось вейкеньгак сынст эйстэ эзизе стувто.7Натой тынк пря черенккак весе ловнозь. Секс илядо пеле. Тынь ялатеке весе озязтнэде седе питнейтядо!»


Апак сёпо ёвтнеде Иисусто

8«Кортан тенк: эрьвась, кие апак сёпо ломантнень икеле лови эсь прянзо Монь ломанекс, сень Монгак, Ломантнень Цёрась, апак сёпо ловса Пазонь ангелтнэнь икеле Эсень ломанекс.9Кие жо ломантнень икеле велявты Монь эйстэ, сень эйстэ Монгак велявтан Пазонь ангелтнэнь икеле.10Эрьванть, кие ёвты сялдома-покордамо вал Ломантнень Цёранть лангс, чумозо нолдави. А вана кие ёвты сялдома-покордамо вал Иневанькс Оймеялтонть лангс, сень чумозо нолдазь а ули.11Ды зярдо ветятадызь тынк синагогас, прявтнэнь ды азортнэнь икелев, илядо мелявто, кода ванстомс эсь прянк эли мезе кортамс.12Эдь Иневанькс Оймеялтось те шкане тонавттадызь, мезе эряви тыненк кортамс».


Превтеме сюпавдо валвелявкс

13Та-кие пурнавозь ломантнень ютксто мерсь Иисуснэнь: «Тонавтыця, мерть монь лелянь туртов, кадык сон явсы юткованок тетянь-авань кадовт ули-паронть».14Иисус ацирьгадозь мерсь каршонзо: «Арази кияк путымим Монь улемс тыненк судиякс эли ули-паронь явицякс?»15Седе тов Сон поладсь весемень туртов: «Ванодо, ванстодо прянк эрьва кодамо апештевемадо. Ломанень эрямось а онкстави ули-паронь сюпавчисэ, зяро сонзэ эйстэ илязо уле».16Ды ёвтнесь Иисус тенст валвелявкс: «Вейке сюпав ломаненть чачсь паксясо ламо сюрозо.17Се ломанесь эсь пачканзо арсесь: “Мезе монень теемс? А козонь монень пурнамс сюронть”.18Ды сестэ сон мерсь эстензэ: “Вана мезе теян: яжасынь утомон, теян седе покшт, пурнаса тозонь весе сюром ды весе ули-паром.19Сестэ мерян эстень: ней тон уцяскават! Эрьва кодамо ули-парот саты ламо иес. Оймсек, ярсак, симть ды кецяк!”20Ансяк Пазось мерсь тензэ: “Превтеме! Те вестэнть сайса ойметь тонь эйстэ. Кинень сестэ кадови се, мезе тон пурныть?”21Истя эрси эрьванть марто, кие ансяк эстензэ ташты сюпавчить ды конась теке марто Пазонть сельме икеле а ули сюпавкс».


Пазонь Инязорксчинть ловодо весемеде инекс

22Мейле Иисус мерсь Эсензэ тонавтницятненень: «Секскак кортан тыненк: илядо мелявто эрямонк кисэ, мезде тенк ярсамс, ды рунгонк кисэяк, мезе тенк оршамс.23Эдь эрямось – ярсамопельде питней, ды рунгоськак – оршамопельде питней.24Варштадо кренчтнень лангс: сынь а видить, а нуить, арасть сынст утомост, потмарост, ды Пазось ялатеке сынст анды. Ламодо тынь седе питнейть неть нармунтнеде!25Кинень тынк ютксто, пек мелявтозь, кувалгавтови эсь эрямозо куш ве кенерешкас?26Секскак, бути тыненк а тееви те аламошкаськак, мезть мелявттадо лиядонть?

27Варштадо паксянь цецятнень лангс, кода сынь касыть: а штердить, а кодыть. Ялатеке кортан тенк: Соломон инязороськак эсь сюпавчинь сияждомасонзо истя эзь оршне, кода эрьвась сынст эйстэ.28Бути Пазось истя мазыйстэ оршавты тикше, конась течи касы паксясо, ванды жо ули ёртозь каштомонь толс, арази Сон тынк седеяк парсте а оршатадызь. Вай, кодамо аламо тынк кемеманк!

29Секскак, илядо вешне, илядо мелявто мезде тыненк ярсамс эли мезде симемс.30Тень эйстэ мелявтыть весе масторлангонь Паздо а содыцятне. Тынк Тетясь жо соды: те весе тыненк эряви.31Весемеде пек вешнеде Пазонь Инязорксчинть, ды сестэ те весемеськак тыненк максови.32Ломанень вишкине гуртке, иля пеле! Эдь Тетянк ули паро мелезэ максомс тенк Инязорксчинть.33Микшнеде эсенк ули-паронк ды макснеде кажовтненень. Анокстадо эстенк эрямо парть, конат а каладыть. Менельсэ таштадо истямо сюпавчи, кона а прядовкшны. Менельсэ те ули-паронтень салыцяськак а сови, тосо ки сукстнэяк сонзэ а сэвить-а колсить.34Эдь косо тынк сюпавчинк, тосо карми улеме седеенккак».


Кудазоронть учиця важо

35«Уледе свал анокт важодеме: ожанк улест илештязь ды толонк свал палозо.36Уледе, кода важот, конат учить эсест азоронть кудов самонзо урьвакстомань-венчамонь каванямосто: сынь анокт нейке панжомс азоронтень, зярдо сон сы ды вачкоди кенкшес.37Уцяскавт сеть важотне, конатнень кудонь азорось самстонзо стардсынзе а удыцякс. Видестэ тенк кортан: сестэ азорось сонськак орши эрьва чинь оршамопельть, озавтсынзе важотнень столь экшс ды карми сонсь каванямост.38Неть важотненень, паряк, сави учомс пелевес, натой пелеведе мейлес. Сынь алкуксокс уцяскавт, зярдо сы азорось ды стардсынзе сынст а удыцякс!

39Мельсэ кирдеде: содавольгак кудазорось, кона шкане сы салыця, сон аволь удо ды аволизе нолда сонзэ эцеме кудозонзо.40Тыньгак уледе анокт: Ломантнень Цёрась сы се шкастонть, зярдо тынь Сонзэ а учотадояк».

41Петра кевкстизе Иисусонь: «Азоро, тон ёвтнят те валвелявксонть весемеде эли ансяк минденек?»42Азорось тень каршо мерсь: «Уледе истямокс, кода кемевикс ды превей кудоветиця, конань кудазорось туемстэ путсы покшокс весе важотнень лангсо ды кармавты тензэ эрявикс шкасто явшемс сыненст алтазь ярсамопеленть.43Уцяскав ули те важось, конань кудазорось, зярдо сы, несы истя теемстэ.44Видечи ёвтан тенк: сестэ кудазорось путсы сонзэ весе ули-паронзо лангсо покшокс.45Бути жо важось арсезеви: “Монь азором а курок сы”, ды карми чавомо лия важотнень, ярсамо ды иредемас винадо симеме,46истямо важонь азорось сы се чистэнть, конастонть важось а учи, ды се часстонть, конадонть а арсияк. Кудазорось сестэ куломс чавсы сонзэ ды ёртсы сонзэ а кемевикстнэнь юткс.47Важось, кона содасы азоронь меленть, ансяк а аноксты ды а снартыяк топавтомо те меленть, ули пек чавозь.48Бути важось эзь сода азоронь мельденть, ды тейсь мезе-бути истямо, мезень кисэ чавомаль, сестэ сон карми улеме чавозь седе аволь пек. Кинень ламо максозь, сень пельде ламо вешитькак, кинь лангс пек кемить, сень пельде седеяк ламо кевкститькак».


Иисусонь кувалма сёвномат-пелькстамот

49«Мон сынь мода лангс толонь кирвазтеме, ды Монь пек покш мелем: седе курок кирвазезэ сон!50Монень сави ютамс майсемань сэрей веденть трокс. Ды зярс а ютави те пиштемань кись, седеем карми палозь паломо!51Тынь, паряк, арсетядо, Мон сынь масторлангс ладямонь кандомо? Арась! Аволь ладямонь – явомань!52Те чистэнть саезь, бути кудосонть вете ломанть, сыньгак явить: колмотне кепедевить кавтотнень каршо, ды кавтотне – колмотнень каршо.53Тетясь кепедеви цёранзо каршо, ды цёраськак – тетянзо каршо; авась кепедеви тейтерензэ каршо, ды тейтереськак – аванзо каршо; ававтось кепедеви урьванзо каршо, ды урьваськак – ававтонзо каршо».


Шкань тешкст

54Седе мейле Иисус мерсь ломантненень: «Зярдо тынь нетядо чивалгомасто кепедевиця пель, тынь нейке мертядо: туи пиземе. Ды алкукскак, пиземесь туи.55Ды зярдо лембе ёнкссто пуви варма, тынь мертядо: карми пси. Истя эрсияк.56Чачонь полавтницят! Модань ды менелень тешкстнэнь кувалт тыненк содави венельксэнь ёжось, мекс эно тынь а содасынк неень шкань тешкстнэнь смустест?

57Мекс тынь тынсь а мусынк, мейсэ видечись?58Зярдо кияк чумондтанзат ды карми ветямот судямо кудос, тов молемстэ снартнек прядомс тевенть вейсэнь лувсо. Бути теят лиякс – сон ветятанзат судиянтень, се макстанзат ванстыцянтень ды каятадызь пекстамо кудос.59Кемть Монень: тосто а лисеват се шкас, зярс а пандсак весементь меельце трёшникень пес».



*а 12:1 чачонь полавтнема – лицемерие


предыдущая глава Глава 12 следующая глава