Выбрать язык
Книги Ветхого Завета
Книги Нового Завета
с русским текстом(Тейтересь:)
1Мон – Сарононь*а луганаронь таташка,*б
лайметнень якстерне лилия!
(Цёрась:)
2Кодамо лилиясь кодоркстнэнь ютксо –
истямо седейпелькскем лия тейтертнень ютксо.
(Тейтересь:)
3Кодамо умарьчувтось вирень чувтотнэнь ютксо –
истямо монь вечкевиксэм лия од цёратнень ютксо.
Сонзэ сулей экшсэ пек вечкан аштекшнеме,
умарензэ тантейть монь кургонтень.
4Сон ветимим эстензэ, кавани винасо
ды вельтимим эсензэ вечкемасо.
5Велявтынк нардем узюмсо,
одстомтынк вием умарьсэ –
эдь мон лавшоминь вечкемадонть!
6Керш кедезэ – прялон,
вить кедьсэнзэ кутмори монь.
7– Иерусалимень тейтерть!
Максан тенк кемедеяк кеме кармавтома,
кармавттадызь пежедькстамо*в
пандонь мазый сеятнесэ эли идем сёкантнесэ:*г
илядо сыргозте вечкеманть,
илядо токше таркастонзо,
зярс сонсь а саи мель сыргоземс-стямс!
(Тейтересь:)
8Марян: те вечкевиксэм сы!
Оно, сон чии пандотнень прява,
кирнявтни губорькстнэнь ланга.
9Вечкевиксэм пандонь сеянь
эли од сёканень кондямо.
Оно, сон уш ашти минек кудо вакссо,
ваны вальмаванок,
варштни вальмань пельцяванок.*д
10Вечкевиксэм ушоды кортамо монень:
"Седейпелькскем, стяк!
Мазыйдеяк мазыем, лиссть, тутано!
11Неят, телесь уш ютась,
пиземетне валовсть, прядовсть.
12Модась ацавсь мазый таташкасо,
сась морамонь шкась,
масторсонок кайсети идем гулькань гулдордомась.
13Уш кенери васень инжирэсь,
тантейдеяк тантейстэ качадыть
винаумартнень панжовкстнэ.
Стяк, седейпелькскем!
Лиссть, тутано, мазыйдеяк мазыем!»
(Цёрась:)
14Монь вечкевикс гулькинем
васоло кевпандонь лазтовкстнэсэ,
сонзэ кекшизь пандочамань потмарс!
Невтик монень (м:чамат-?)чачот,
мерть марямс вайгелеть:
эдь тонь вайгелеть седейспедиця,
тонь чамат мельстуиця.
15Лездадо тенек, кундседе ривезтнень, ривезьлевкстнэнь:
сынь кольстить винаумарь пиретнень.
Эдь винаумарь пиренек
ней вельтязь панжовкссо.
(Тейтересь:)
16Вечкевиксэм – монь,
мон – сонзэ.
Сон яки-ярсни*е лилиятнень юткова.
17Зярс чись лекси экше ялткесэ
ды зярс эзть срадо сулейтне,
велявт одов, вечкевиксэм.
Чийть пандонь сеякс эли од сёканекс
пандотнэнь юткова.
*а 2.1 Сарон – Модакуншкань иневедь чиресэ лайме.
*б 2.1 таташка – цеця, панжовкс.
*в 2.7 пежедькстамс – клясться.
*г 2.7 сёкань – лань.
*д 2.9 вальмань пельця – вальмань решётка.
*е 2.16 Те тарканть ули лия чарькодемазояк: сон ваны ракшанзо лилиятнень юткова. Тесэ лилиятне, паряк – вечкевиксэнзэ турват.
Глава 2