Выбрать язык
Книги Ветхого Завета
Книги Нового Завета
с русским текстом1Тонавтыцянть*а, Давидэнь цёранзо, Иерусалимсэ инязоронть, валонзо.
2Тунь смусттеме тевть, –
мерсь Тонавтыцясь, –
тунь смусттеме тевть.
Весемесь – смусттеме!*б
3Кодамо лезэсь ломанентень
весе стака тевензэ-важодеманзо эйстэ,
конатнень сон виензэ маштомс теи-топавты чипаенть ало?
4Туить буень-сымень неень шкань ломантне,
ды сыть буень-сымень лия шкань ломанть,
а вана модась-масторось пингеде пингес а полавтневи.
5Чись лиси, ды чись валги
ды одов капши лисема тарказонзо.
6Вармась пуви-ливти лембе ёнксов,
велявты – пувазеви якшамо ёнксов,
пувамстонзо вели-чары, вели-чары
ды одов велявты кеверь кинзэ лангс.
7Весе лейтне прыть иневедьс,
ансяк иневедесь ялатеке чирестэнзэ а лиси.
Лейтне велявтыть лейпрязост
ды тосто таго чудезевить.
8Те весемесь истя пек сизевти:
ломанесь мик а вийсэнзэ весементь ёвтнемс.
Сельмесь а пешкеди неезденть,
пилесь а пешкеди марязденть.
9Мезе ульнесь – се карми улемеяк,
мезе тейневсь – се карми тейневемеяк.
Чипаенть ало мезеяк од арась.
10Лиясто эрси мезеяк истямо, конадо кортыть:
«Вант, те оно од».
Ансяк истямояк уш ульнесь
минденек икеле, ютазь пингетнестэ.
11Неень эрицятне мельсэст а кирдить
икеленсетнень тевест.
Сетнеяк, конат сыть тарказост,
а кадовить мельгаст сыцятнень мельс.
12Мон, Тонавтыця, ульнинь Израиленть инязорокс Иерусалимсэ.13Седеем алтыя менеленть ало весе теевицянть домкасто тонавтнемантень ды весеме ёндо варчавтнемантень*в – весе тень тееме покш превейчи вельде. Те стака тевенть Пазось максызе ломантненень.14Мон ванкшнынь чипаенть ало теевиця весе тевтнень. Ды мезе? Весемесь – смусттеме, варма мельга пансема.*г
15Кичкересь а витеви.
Ды се, мезесь арась, киненьгак а ловови.
16Седейсэм эсень туртов арсевтия истя: «Вана, инексчисэнь ды покш превейчисэнь мон икельдинь весень, кить ульнесть мондень икеле прявтокс Иерусалимсэ. Оймем мусь-таштась ламо содамочи ды покш превейчи».17Седеем алтыя кода покш превейчинть тонавтнемантень, истя превтемечинть ды чаволачинть тонавтнемантень. Ды карминь содамо: теяк – варма мельга пансема.
18Эдь косо ламо покш превейчиденть –
тосо ламо ацирьгадомадонть.
Ды кие ламолгавты содамочинзэ,
се ламолгавты ризксэнзэ.
*а 1.1 Тонавтыця – пек превей тонавтыця Пазонь ломанень промкссо. Грекень кельсэ те валось – Экклесиаст.
*б 1.2 смусттеме – те валонть смустезэ: лексема, шожда ялтке, сув. Ансяк те книгасонть сон максозь лия смустьсэ: "Весемесь пек курок прядовиця, чаво, смусттеме, кувать шкас паронь ды уцяскань а максыця."
*в 1.13 варчавтнема – испытание.
*г 1.14 эли "оймень майсевтема-стомавтома". Истя те книганть лия таркатнесэяк.
Глава 1