Выбрать язык
Книги Ветхого Завета
Книги Нового Завета
с русским текстом1Лемуил инязоронть валонзо. Превспутоманзо,*а конатнес тонавтызе тиринь авазо.
2– Вечкевикс цёрам! Потстон лисевксэм!
Пазонть кедьстэ вешезь эйдинем! Кунсолыть валон:
3Иляк явше виеть тейтерьаватнень ланга,
илить панжо кить инязоронь неть ёмавтыцятненень.
4Аволь инязорнэнь, Лемуил,
вай, аволь инязорнэнь симемс винадо,
аволь чирязнэнь копорямс пуреде.
5Иредезь илизь стувто койтнень
ды илизь кадо пайстомотнень виде судтомо.
6Максодо пуре ёмицянтень,
ды вина сэпев седеентень.
7Кадык сон сими ды стувтсы арасьчинзэ,
мельс а ледстясынзе майсеманзо.
8Тон вана пшкадть-аштек
эсест лезэс валонь каямо а маштыцятнень кисэ
ды весе пайстомотнень идемга.
9Кортак-аштек видестэ судямонть кисэ,
кажовтнень ды арасьчисэтнень кисэ.
10Кода муемс паро ни?
Сон сехте питней кевдеяк питней.
11Мирденть седеезэ кеми тензэ,
ды те мирденть свал карми сюпавчизэ-лезксэзэ.
12Низэ весе эрямонзо перть теи тензэ паро
ды зярдояк тензэ а канды зыян.
13Сон оршамопелень анокстамс нары пона эли тарги лияназ –
эсь кедтнесэ свал важоди мелень путозь.
14Сон, теке микшницянь-рамсицянь иневенч,
васолгаяк пурны-ташты эрявикс ярсамопель.
15Оштё чопода – сон уш сти
кудораськенстэнь ярсамопелень анокстамо,
важаванзо туртов тевень максомо*в.
16Мелезэнзэ туи пакся – рамасы сонзэ
ды эсь таштавт ярмактонзо озавты винаумарь пире.
17Сон карксазь-тапардазь вийсэ,
кедензэ нардевть покш ёрокчисэ.
18Ёжованзо несы-марясы: тевензэ молить парсте,
ды пелевес а мадни сонзэ толозо.
19Сонзэ кедензэ венстязь пряхантень,
сонзэ суронзо а нолдтнить штеренть.
20Коморозо панжозь кажовнень,
кедензэ венстязь арасьчисэнень.
21Ловне-якшамоне сон а пели кудораськензэ кисэ,
эдь эрьвась оршазь лембестэ-парсте.
22Эстензэяк теи вельтявкст-каявкст,
сонзэ оршамонзо лияназонь човине коцтсто
ды чопода-якстере понасто.
23Мирдезэяк ошонь орта лангсо содавикс,
сон тосо ашти масторонь прявттнэнь ютксо.
24Нись-азоравась сты-микшни панарт, вельтямот,
аноксты микшнемс каркст Финикиянь наймунтнэнень.*г
25Кемечись ды инексчись сонзэ оршамонзо,
эрьгелезь-пейдезь ваны сон вандынь чизэнзэ.
26Валонзо пештязь покш превейчиде,
чевтестэ-видестэ ёвты превс путоманзо.
27Сон ваны, кода ютыть кудонь тевтне,
аволь стяко сэви кши кочомонзо.
28Эйкакшонзо стить ды мерить тензэ: «Чанстязь-баславазь»,
мирдезэяк сонзэ шны-инелгавты истямо валсо:
29«Паронь теиця тейтерьаватнеде аволь аламо,
ансяк сынст ютксояк тон сехте вадрят!».
30Мельс туемась манчиця, мазычиськак ютыця,
шназь улезэ Инешкипаздонть пелиця нись-тейтерьавась!
31Максодо тензэ паро тевензэ коряс,
шнадо эйсэнзэ весенень марямга!
*а 31.1 Эли: Лемуилень, Массань инязоронть, валонзо.
*б 31.9 Те шнамо морось (31:10-31) сёрмадозь акростихэнь лувсо. Тесэ валрисьметнень васень букватне ладсезь евреень алфавитэнть коряс.
*в 31.15 Эли: ярсамопелень явномо.
*г 31.24 наймун – микшниця-рамсиця, купец.
Глава 31