Выбрать язык
Книги Ветхого Завета
Книги Нового Завета
с русским текстом6
1Зярдо озат столь экшс ярсамо чиряз марто,
иля стувтне, косат тон.
2Аравт кирьгапарезэть куш пеель,
бути мелеть ламо ярсамс.
3Преветь иляст чаракадо сонзэ тантей каванямкадо –
те ярсамопелесь манчиця
7
4Прят иля чаво сюпавчи мельга пансезь.
Кадыть теде эсь мельтнень-арсематнень.
5Ансяк варштат сюпавчинть лангс, сон уш арась:
теке тейсь эстензэ куцьканонь*а сёлмот ды тусь ливтязь менелев.
8
6Иля ойсе ярсамо сявадыця сельме ломаненть марто,
преветь иляст чаракадо сонзэ тантей каванямкадо.
7Эдь сонзэ оймезэ пекстазь панжомасо.
Мери теть: «Симть-ярсак»,
ансяк седеезэ аволь тонь марто.
8Секс нилезь палнэнть уксносак,
паро валот стяко ёмавтсак.
9
9Чаволантень мезеяк иля корта –
превей валтнэнь лангсо сон ансяк ракси.
10
10Иляк шашто кезэрень аравтовт умань тешксэнть,
урозонь паксяс иля эце.
11Эдь сынст ули кисэст виев Аштицяст,
Сон карми каршот ветямо пелькстамо тевест.
11
12Велявтык седееть превс путоматненень
ды панжить пилеть превей валтнэнень.
12
13Иляк кадо цёрынеть казямо превс путомавтомо,
тонавтсак илевсэ – сон а кулы.
14Тон сонзэ лоштясак илевсэ –
теньсэ идесак оймензэ ёмамодо.
13
15Цёрам! Бути тонь седейсэ покш превейчи –
моньгак седеесь карми кенярдомо.
16Весе потмоёжомгак карми эрьгелеме,
зярдо тон кармат кортамо видестэ.
14
17Кадык седееть а сявады пежетевтнень лангс,
тонсь свал пельть Инешкипаздонть.
18Сестэ карми улеме вандынь чить,
ды тонь седейнежедьксэть а ёми.
15
19Цёрам! Кунсоломак ды ульть пек превеекс,
ладик седееть виде килангс.
20Иля вейсэньгале сетнень марто, кить прамозост симить винадо
ды тоцтятомазост ярсыть сывельде.
21Эдь винадо симицясь ды опкан кургось*б кажовгадыть,
нувсемась мейле оршатанзат нулас-валас.
16
22Кунсолок тетять – сон тонеть макссь эрямо,
ловт тиринь авать, зярдо сон сыреди.
23Рамик видечинть ды иляк мие.
Рамить покш превейчинть, превс путоманть ды чарькодьксчинть.
24Видечисэ эрицянть тетязо пек кенярды,
пек превеентень эрямонь видьмень максыцясь эрьгели.
25Кадык эрьгелить тонь тетят-ават,
покш кеняркс сайсынзе тонь чачтыцят!
17
26Цёрам! Велявтык седееть монь пелев,
кадык тонь сельметь ваныть ансяк монь китнень лангс.
27Эдь усксевиця тейтерьавась – домка-сэрей латко,
лиянь нись – теине лисьма.
28Сон нельгениця ладсо учи кекшема таркасо,
ламо цёрат тарги миемас-манчемас.
18
29Те кие вайкстни, кие кувси?
Кие сёвны, кие пеняци?
Кие а соды, косто саевезь румовксонзо?
Кие ваны якстерьгадозь сельмсэнзэ?
30Те се, кие вечки вина кече марто аштекшнеме,
кие яла яки тантей-виев винань вешнеме.
31Иля маняво, иля вано винанть лангс,
кода сон мазыйстэ якстерьгали,
кода кечесэнть налкси
ды кода шождасто симеви.
32Эдь мейле сон гуй ладсо пупатанзат,
тумогуйкс сусктанзат.
33Сестэ сельметь кармить нееме аразень тевть*в,
ды мелеть-валот човорявить.
34Тон тееват теке иневедь куншкасо венчсэ удыця,
прок сэрей торсей*г прясо лымбакстневиця.
35[Тон сестэ мерят:]
«Монь чавсть – монень те эзь марявояк,
монь тулкаесть, мон тень эзия редяяк.
Ялатеке, зярдо сыргозян,
тагояк карман чапамонь вешнеме».
*а 23.5 куцькан – орёл.
*б 23.21 опкан курго – обжора.
*в 23.33 Синод. ютавтовкссонть: ваномо лиянь ни лангс. Евреень текстсэ тесэ арась "ни" эли "тейтерьава" вал.
*г 23.34 торсей – мачта.
Глава 23