Выбрать язык
Книги Ветхого Завета
Книги Нового Завета
с русским текстом1Паро лемесь ламо сюпавчиде вадря,
шнамо валтнэ сиядо ды сырнеде парт.
2Сюпавось ды арасьчисэсь аравтовить рядсек:
теньгак ды тонаньгак теинзе Инешкипазось.
3Превеесь редясы сыця кажонть ды туи эйстэнзэ веёнов,
эрямонь а чарькодицясь моли видьстэ ды эртеви.
4Сэтьме обуцясь ды Инешкипаздонть пелемась
кандыть мартост сюпавчи, инексчи ды кувака эрямо.
5Кенгелицянть кинзэ лангсо пупиця кодоркст ды кундамкат.
Кинень питней эрямозо – туезэ веёнов!
6Аравтык цёрыненть виде килангс –
сон а мурды эйстэнзэ сыредезьгак.
7Сюпавось кедензэ ало кирди арасьчисэнть,
долкс саицясь тееви урекс долкс максыцянтень.
8Кие види авидечи, се нуи кажо,
сонзэ кежень локшозо сиви ды азорксчизэ прядови.
[Паро мельсэ максыця ломаненть Пазось вечксы
ды пештясы-топавтсы тевсэнзэ уликс асатыксэнть.]
9Седеймарицясь ули чанстязь-шназь,
эдь сон яви эсь кшинзэ арасьчисэнть марто.
[Изнямось ды шнамось максовить казнень кандыцянтень,
сон тееви азорокс казнень саицянь ойметнененьгак.]
10Паник визькстэменть-згилицянть – ды аладямотне лепамить,
лоткавтовить сёвноматне-пазямотнеяк.
11Кие вечки седеень ваньксчи
ды кинь кортамонзо мельстуицят,
сенень инязорось ялга.
12Инешкипазонть сельмензэ ванстыть алкуксонь содамочитнень.
Инешкипазонть кадыцянть тевензэ-валонзо Сон теи модачелькекс.
13Нузяксось корты: «Ушосо лев!
Ошкужо куншкасо монь маштсамизь!».
14Ускурявиця авань валтнэ – домка-сэрей латко.
Кинь лангс Инешкипазось кежиявты, се тов пры.
15Бути цёрынентень педясь превтемечи –
сонзэ путсы превс илевсэ тонавтомась.
16Кие парочинзэ ламолгавтомга лепшти кажовонть,
кие сюпавонтень максни казнеть –
сень стардасы арасьчись.
17Панжить пилеть, кунсолок пек превеень валт
ды велявтык седееть монь тонавтомантень.
18Кеняркс ули теть,
бути кармат неть валтнэнь ванстомо седейсэть,
ды сынь свал кармить турват песэ.
19Кемть-нежедть Инешкипазонть лангс –
тенень мон течи тонь тонавтан, самай тонь.*а
20Мон сёрмадынь теть колоньгемень валвелявкст*б,
конатнестэ тон муят превс путомат ды тонавтомат.
21Сынст коряс тон тонадат видечиинь паро валтнэнень
ды маштат ёвтамо виде каршо вал тевс кучицят туртов.
1
22Иля нельгене кажовонть кедьстэ арасьчинзэ кувалт,
ды иля лепштя пайстомонть орта лангсо судямсто.
23Эдь Инешкипазось карми аштеме сынст тевест кисэ
ды саласынзе-ёмавтсынзе нельгеницятнень оймест.
2
24Иля уле ялгакс кежейстэ пизякалицянтень,
иля кирде ояксчи ацирьгалицянть марто:
25аволить тонадо сонзэ китненень-янтнэнень,
аволить аравтне кундамкат эсеть ойменть туртов.
3
26Иля уле истямокс, конат сювордыть кедь
ды максыть вал долксо аштицянть кисэ.
27Эдь бути тонеть а мейсэ ули пандомс,
сестэ сайсызь вельтямот, натой алдот ацамот.
4
28Иляк шашто кезэрень умань тешксэнть,
конань аравтызь тонь покштятне.
5
29Неят эсензэ тевсэ кол ломаненть? –
Сон карми важодеме инязортнэнень,
аволь вишка ломантненень.
*а 22.19 Синод. ютавтовкссонть: ды тон иля стувтне.
*б 22.20 Евреень кельстэ "колоньгемень" валось ютавтови оштё кода "колмонькирда", ансяк тесэ седе лади "колоньгемень".
Глава 22