Выбрать язык
Книги Ветхого Завета
Книги Нового Завета
с русским текстом1Ломанесь седейсэнзэ ладси-кирди мельть-арсемат,
ялатеке меельце кемекстыця валось Инешкипазонть кургсо.*а
2Ломанентень весе эсь китне марявить видекс;
Инешкипазось онкстни-варчтни ойметнень.
3Кемезь максыть Инешкипазонть кедьс эсеть теветь,
ды тонь мелеть-арсемат парсте топавтовить.
4Инешкипазось весементь теизе Эсь арсеманзо топавтоманть туртов,
пазтомоськак ванстови-эряви Пазонь кежень чинтень.*б
5Эрьва покшкавтницясь Инешкипазонтень нулгодькс.
Кемть: сон а кадови чумонзо апак пандовто.
[Паро кинь ушодксось – видестэ теемась,
Пазонтень те вечкеви анокстнэдеяк пек.
Инешкипазонть вешницясь муи видечи марто содамочить,
Инешкипазонть алкуксонь вешницятне муить сэтьмечи.]
6Кемевикс вечкемасо ды видечисэ ванськавтови пежетесь,
Инешкипаздонть пелемась иди зыяндонть.
7Зярдо Инешкипазонть мельс тукшныть ломаненть кинзэ,
сестэ яттнэньгак Сон ладявтсынзе сонзэ марто.
8Видечи марто сазь аламось седе паро
авидечи марто сазь покш сюпавчиденть.
9Ломанесь превсэнзэ арсевти эсь кинзэ,
Инешкипазось аравты сонзэ эскельксэнзэ.
10Инязоронть кургсо – Пазонь путовт валт:
сон илязо ильведеве судямсто.
11Виде онкстамотне ды безьменесь*в – Инешкипазонть пельде,
паргосо весе онкстамонь сталмотнеяк Сонзэ пельде.
12Инязортнэ нулгодить койтемечинь тевтнеде,
эдь инязорксчись кемекстави видечисэ.
13Инязоронть мельс тукшныть видечинь валтнэ,
видестэ кортыцянть сон вечксы.
14Инязоронь кежесь – куломадо кулянь кандыця,
а вана превей ломанесь сонзэяк оймавтсы.
15Инязоронь валдо варштавксось – эрямонь казиця,
сонзэ паро мелесь – теке учозь пиземень пель.
16Превейчинь таштамось сырнедеяк паро,
содамочинь пурнамось сиядояк питней.
17Видечисэтнень кист юты зыяндонть веёнга.
Кие ваны, ков моли, се ванстасы эсь эрямонзо.
18Покшкавтнемась вети ёмамонтень,
прянь верьга кандомась пачти прамонтень.
19Покшкавтницятнень марто нельгезенть явоманть таркас
седе паро коронь кирдицятнень марто сэтьместэ эрямось.
20Кие вети тевензэ ёроковсто, се муи паро,
кие кеми Инешкипазонть лангс, се ули уцяскав!
21Седейга пек превеесь карми лововомо чарькодицякс,
ды мазыйстэ кортамось седеяк кемекстасы тонавтоманть.
22Превейчись азоронстэнь – те эрямонь лисьмапря,
превтемечись превтементень – казямо тонавтома.
23Пек превеесь эсь келентькак теи ёроковокс,
удемевесь виевгавты тонавтомань валонзо.
24Мельвитиця кортамось теке ансяк таргань медь:
сон тантей ойментень ды лезэв рунгонтень.
25Ламо китне неявить ломанентень видекс,
ансяк сынь ветить-пачтить куломас.
26Вачочись пани ломаненть важодеме эсензэ лангс,
тень тееме сонзэ кармавты кургозо.*г
27Апаро ойме ломанесь поны-коды зыян,
валонзояк – теке пултыця тол.
28Салава сускицясь види аладямот,
келень-валонь тейницясь яви ялгат.
29Зыянов ломанесь малавиксэнзэ уски берянь тевень топавтомо,
сонзэяк тулкади апаро килангс.
30Кие ёжовсто кончтни сельмесэнзэ, се арси салава сускомань тевть,
кие сускони турванзо, сень мельсэ зыянонь теема [; сон зыянонь каштомо].
31Шержей чертне – инексчинь каштаз,
кона максови казнекс видечисэ эрямонь кисэ.
32Коронь кирдицясь апелиця ушмандонть паро,
прянзо кедь-коморсо кирдицясь ошонь саицядонть паро.
33Жеребеесь каяви элесэ сорновтнезь,
ялатеке меельце валось свал Инешкипазонть.
*а 16.1 Эли: ...а вана виде валонть тензэ максы Инешкипазось.
*б 16.4 Пазонь кежень чись – вант 11.4.
*в 16.11 безьмень – кезэрень онкстамопельть.
*г 16.26 Вачочись – истя евреень текстсэнть, а вана Синод.ютавтовкссонть: Важодицясь важоди эсензэ лангс – тень тееме кармавты кургозо.
Глава 16