Выбрать язык
Книги Ветхого Завета
Книги Нового Завета
с русским текстом1[Кежесь ёмавты превейтненьгак.]
Сэтьме валось мадсти кеженть,
покордыця валось кирвазти ацирьгадома.
2Пек превеень келесь мазылгавты содамочитнень,*а
чаволань кургсто лиси ансяк превтемечи.
3Инешкипазонть сельметне эрьва косот:
сынь неить партнэнь ды зыяновтнень.
4Оймавтыця келесь – эрямонь чувто,
манчиця валось*б– оймень ёмавтыця.
5Превтемесь мезекскак а лови тетянзо превс путоматнень,
превеесь вана кунсолы мурнематнень-тонавтоматнень.
[Видечинь ламоксчисэнть ине вий,
пазтомотне ундокснэк таргавить модастонть.]
6Видечисэ эрицянть кудосо певтеме сюпавчи,
пазтомонтень парочиськак велявты ризксэкс.
7Пек превейтне валсост пачтить содамочи,
чаволатнень мелест-арсемаст азгондить.
8Инешкипазось нулгоди пазтомотнень анокстост;
Сонзэ мельс тукшныть видечисэтнень озномаст.
9Инешкипазось нулгоди пазтомонть кидензэ;
Сон вечксы видечинь вешницянть.
10Виде кинь кадыцянть учи чумонь казямо пандома,
мурнемань-тонавтомань а вечкицясь кулы-ёми.
11Инешкипазонтень неявикст Аваддонось*в ды тоначинь отьмась,
Сонензэ седеяк панжадот ломанень седейтне!
12Визькстэмесь-згилицясь а вечксынзе мурницянзо,
пек превейтнень юткскак сон а моли.
13Седеесь кенярксов – чамаськак валдомгады,
седейризкстэнть оймеськак мелявты-пишти.
14Чарькодицянь седеесь вешни содамочить,
чаволань кургонтень тантей превтемечись.
15Кажовонть весе чинзэ ризксэвть-мелявксовт.
Кинь седеезэ эрьгели, сенень эрьва чись кенярксов.
16Сюпавчинь пурнамодонть ды тандалезь-талнозь эрямодонть
седе паро улемс аволь сюпавокс ды пелемс Инешкипаздонть.
17Седе паро ярсамс эмежде – ды вечкезь,
андозь букань сывельде ярсамодонть – ды пек апак вечке.
18Пизякалиця ломанесь кирвазти сёвномат,
коронь кирдицясь оймавты аладямотненьгак.
19Нузяксонь кись теке пурьгине палаксонь пирявкс,
видечисэтнень кист вана чевте, валаня.
20Превей цёрась кенярдовты тетянзо,
превтемесь мезекскак а лови аванзояк.
21Превтементень кеняркс – превтемечись,
чарькодицясь вана юты виде киява.
22Превспутомавтомо сыргавтозь тевтне каладыть,
ламо превс путыця марто сынь парсте топавтовить.
23Кодамо кеняркс, зярдо муят эрявикс каршо вал,
кодашка мельспаро, зярдо валось ёвтави шкастонзо!
24Ёроковось кузи эрямонь кияванть верев:
истя сон оргоди тоначинь отьманть эйстэ.
25Прянь верьга кандыцянть кудонзо Инешкипазось допрок калавтсы,
а вана дова аванть уманзо Сон кемекстасы-ванстасы.
26Инешкипазось нулгоди зыяновтнень мельдест-арсемадост,
Сонзэ мельс тукшныть ваньксчисэтнень валост.*г
27Ансяк эстензэ лезэнь вешницясь терди кажо кудораськензэ лангс,
салавань казнень авечкицясь карми эрямо.
28Видечисэнть седеезэ арсесы каршо валонть,
пазтомонть кургосто лиси ансяк зыян.
[Инешкипазонть мельс тукшныть видечисэнть китне,
сынст вельде яттнэяк теевить ялгакс].
29Пазтомотнень эйстэ Инешкипазось васоло –
видечисэтнень озномаст Сон мари.
30Валдо варштавксось кенярдовты седей,
паро кулясь шумбалгавты-кемексты рунго.
31Эрямова ветиця мурнеманть пштистэ кунсолыцясь
эри-ашти пек превейтнень ютксо.
32Кие мельс а саи превс путомат, се питнеекс а лови эрямонзо,
кие кунсолы мурнемат-тонавтомат, сюпалгады превсэ.
33Инешкипаздонть пелемась тонавты покш превейчис,
инексчинть икеле моли сэтьме обуцясь.
*а 15.2 Те тарканть ули лия чарькодемазояк: Пек превеень келесь пачти паро содамочить.
*б 15.4 Синод. ютавтовкссонть: акирдевикс (келесь).
*в 15.11 Аваддон – те тоначинть омбоце лемезэ, смустезэ "кулома-ёмамо тарка".
*г 15.26 Евреень кельсэ те тарканть смустезэ: чевте валтнэ (Сонзэ икеле) ванькст.
Глава 15