Выбрать язык
Книги Ветхого Завета
Книги Нового Завета
с русским текстом1Соломононь, Давидэнь цёранзо, Израилень инязоронть, валвелявксонзо.
2Неть валвелявкстнэ сетнень туртов, кить бажить
содамс покш превейчинть ды превс путоматнень,
чарькодемс превей ёвтавкстнэнь смустест,
3превс саемс прянь парсте ветямонь лувонть,
чумовтомочинть, видестэ судямонть ды видечинть.
4Сынь максыть эрямонь а содыцянтень чарькодьксчи,
одонтень – содамочи ды икелепелев арсема.
5Кунсолосынзе сынст пек превеесь – ды ламолгавтсынзе содамочинзэ,
чарькодицяськак муи эйстэст эрямова ветиця валт.
6Сынст вельде сон чарькодьсынзе валвелявкстнэнь ды валмеревкстнэнь,
панжсынзе пек превейтнень валост ды содамоёвксост смустенть.
7Инешкипаздонть пелемась – вана превейчинь ушодксось.
[Тень вельде весень туртов сы алкуксонь содамочись.
Пазонть ловомась-вечкемась – те превиямонь ушодксось.]
Ансяк превтеметне мезекскак а ловить
8– Цёрам! Кунсолок тетять превс путоманзо
ды саик мельс авать кармавтоманзо.
9Сынь – пек мазый каштаз тонь прянть туртов,
теке эрьгекерькс тонь кирьганть туртов.
10Цёрам! Карминдеряйть тонь эстест тердеме пежетевтне –
иля моле сынст пелев.
11Карминдеряйть кортамо: «Мольть мартонок,
тейтяно кекшема тарка верень валоманть туртов,
карматано тувталтомо маштнеме чумовтомотнень,
12нильсынек сынст эрийкс, кода модаалксонь тоначись,
рунгонек-мезнек, кода калмось нили кулыцятнень.
13Нельгенетяно эрьва кодамо сюпавчи,
пештясынек кудонок те ули-паросонть.
14Сак, каяк жеребей мартонок,
ды весемесь минек карми улеме вейсэнь». –
15Цёрам! Иля яка мартост сынст янтнэва,
кирдить пильгеть сынст китнеде.
16Эдь сынст пильгест чиить зыянс
ды капшить верень валомо.
17А мезекс аравтомс пистень*а
нармунтнень сельме икеле.
18А вана нетне кекшема таркасост учомсто
понгить эсест аравтовт пистенентень,
сынсь валсызь эсь верест.
19Истямо кись эрьванть,
кие правты лиянь ули-паро мельга:
сон ёмавтсы эсь оймензэ.
20Покш Превейчись, теке паро азорава,
верьга вайгельть терди куринкасо,
кепси эсь вайгелензэ куншкакуросо.
21Промксонь ютавтнема покш шалтсонть сон ранги,
ошонь орта лангсо эсь валонзо сон ёвтни:
22– Эрямонь а чарькодицят!
Зярс тынь карматадо вечкеме эсь а чарькодеманк?
Нарьгицят-згилицят!
Зярс карматадо витнеме меленк нарьгамосонк- згилямосонк?
Чаволат! Зярс карматадо вельть а вечкеме содамочитнень?
23Велявтодо ёном, мон мурнян-тонавтан эйсэнк:
вана мон валса лангозонк эсь оймеялтом,
пачтясынь тенк эсь валон.
24(Покш Превейчись азоравакс корты:)
Мон тердинь, ды тынь эзиде кунсоло.
Венстнинь кедь, ды арасель редицям.
25Тынь велявтыде весе превс путоман эйстэ,
эзинк сае превс мурнеман-тонавтоман.
26Секс монгак пейдян тынк кажотнень лангсо,
нарьгазеван, зярдо стардтадызь покш пелемат,
27зярдо, теке давол, пры лангозонк тандадома
ды, кода кандылов, юты ланганк кажо,
зярдо лепштятадызь ризкс ды стака мелявкст.
28Сестэ кармить монь тердеме, ды мон теян амарикс;
кармить монь вешнеме, ды костояк а мусамизь.
29Эдь сынь вельть а вечкильть содамочитнень
ды эстест эзизь кочка Инешкипаздонть пелеманть,
30эзизь совавто седейс монь превс путоматнень,
мезекскак эзизь путо монь мурнеман-тонавтоман.
31Весе тень кисэ сыненст ули максозь эсь тевест коряс,
кирьга видьс сави пешкедемс раужо арсемадост.
32Эдь эрямонь а чарькодицятнень маштсынзе наянчист,
превтеметнень ёмавтсынзе мелявкстомочист.
33А вана монь кунсолыцятне кармить эрямо апак пеле
ды сэтьмечисэ, зыяндо апак тандале.
*а 1.17 пистень – силок, петля.
Глава 1