Выбрать язык
Книги Ветхого Завета
Книги Нового Завета
с русским текстомДавидэнь псалмась таргонь нилеце чинтень.
1Азоро, кежень пандыця Паз!
Кежень пандыця Паз! Невтик прят!
2Стяк, модалангонь Судия,
пандык тевест коряс прянь верьга кандыцятненень!
3Зярс, Азоро, зыяновтне,
зярс зыяновтне кармить каштангалеме?
4Сынст кургосто лисить покордамонь валт,
весе зыянонь теицятне прянь шныцят.
5Азоро, сынь шешкить Тонь раськеть,
лепштить Тонсетнень.
6Дованть ды веёндо сыцянть сынь маштнить,
урозтнэнь куловтыть.
7Сынсь кортыть: «А несы тень Азорось,
а редясы Иаковонь Пазось».
8Совадо превс, смусттеме эриця ломанть!
Зярдо тынь превейгадтадо, чавола прят?
9Се, кие макссь пилеть, арази а марясы?
Сон, сельмень теицясь, арази а несы?
10Арази Се а чумонды, кие путы превс раськетнень
ды кие максы ломантненень содамочить?
11Азорось соды: ломанень арсематне-бажамотне чавот.
12Уцяскав ломанесь, конань Тон, Азоро, мурнезь путат превс
ды тонавтат Эсеть коентень.
13Кажонь читнестэ Тон сонензэ максат сэтьмечи,
а вана зыяновонтень ули чувозь латко.
14Азорось а эртьсы Эсензэ раськензэ
ды а кадсынзе сетнень, конат Сонзэ.
15Таго кармить судямо видечинь коряс,
ды видечинть киява туить весе ванькс седейтне.
16Кие сти монь кисэ зыянонь теицятнень каршо?
Кие карми аштеме монь кисэ нулгодьксэнть каршо?
17А лездавольгак тень Азорось,
умок туевель оймем чатьмонемань масторов.
18Зярдо мерилинь: «Нолажты монь пильгем»,
Тонь седеймарямот, Азоро, свал эрсиль тень нежекс.
19Зярдо седеем пешкеди ризкстэ,
Тонь ладсематне кандыть кеняркс монь ойментень.
20Арази сюлмавить Тонь марто нулгодькс судиятне,
конат теить зыян, коенть экшс кекшезь?
21Сынь вейсэндявить видечисэнть каршо
ды пачтясызь куломас чумовтомонть.
22А вана Азорось – монь ванстыцям,
Пазом – монь кевпандом ды кекшема таркам.
23Сон пандсы тенст секе зыянсонть, конань сынь теизь,
ды сынсест кежей тевсэст маштнесынзе сынст.
Азорось, минек Пазонок, маштнесынзе сынст.
Шнамо
Глава 93