Выбрать язык
Книги Ветхого Завета
Книги Нового Завета
с русским текстом1Моравтомань ветицянтень. «Шошанним»△ седямопель марто. Давидэнь псалмась.
2Пазом, идемак монь,
кирьга видьс мон уш ведьсан.
3Мон пезнынь домка чеядавксос*а,
ды арась калгодо тарка монь пильгень ало.
Понгинь домка ведентень,
ды ведьвелявкстнэ, секень вант, монь ваявтсамизь.
4Мон сизинь пижнемадонть,
коськсь кирьгапарем,
чополгадсь сельмесэнь Пазонь лезксэнть учомадо.
5Тувталтомо монь авечкицятнеде
прясон чертнеде седе ламо.
Виевгадсть душмантнэ,
конат а мезень кисэ пансить мельган.
Сынь кармавтыть монь мекев велявтомс сень,
мезенть мон эзия сала.
6Пазом! Тон содасак монь превтемечим,
ды монь пежетень апак кекше Тонь эйстэ.
7Азоро, менелень вийтнень Паз,
иляст уле совавтозь визьксчамас монь кувалма сеть,
кить нежедить Тонь лангс.
Израилень Паз,
иляст уле покордазь монь кувалма сеть,
кить вешнить Тонь.
8Тонь кисэ кирдян мон покордамот,
визьксэсь вельти монь чамам.
9Асодавикс ломанекс теевинь мон лелян-ялаксон туртов,
веёндонь ломанекс – монь авань цёратнень туртов.
10Тонь кудот кисэ пиемась-паломась сэви монь,
ды Тонь покордыцятнень покордамотне прыть седеем лангс.
11Мон авардян ды нурьгавтан эсь оймем
постонь кирдемасо,
ды теяк тееви монень покордамокс.
12Зярдо ризнемань невтемакс
каинь лангозон казямо коцтонь оршамопель,
мон теевинь сыненст нарьгамо таркакс.
13Монь ланга кортыть орта вакссо озадо аштицятне
ды згилязь морыть эйстэнь моросост винадо симицятне.
14Мон жо, Азоро, ознозь пшкадян Тонеть.
Кадык монь озномам пачкоди Тонеть Теть паро шкасто.
Пазом, Эсеть покш седеймарямот ды видечить коряс
марямак монь ды идемак.
15Пезнака рудазсто таргамак монь, илязан вая!
Кадык идеван мон душмантнэде ды домка ведтнеде.
16Илямак максо саламс монь чудиведентень,
илязамам ниле терьгендавксось ды
илязо сёлгово монь велькссэ потмакстомо отьманть кургозо.
17Марямак монь, Азоро, –
сюпават Тон Эсь седеймарямосот.
Варштак монь лангс Эсь ине вечкемасот.
18Иля кекше чачот Эсь уредеть – мон покш кажосан.
Седе курок марямак монь.
19Сак монь малав ды менстемак,
идемак монь душмантнэнь икеле.
20Тон содасак монь покордамом,
визьксчамам ды сёвномам,
Тонь икеле весе монь душмантнэ.
21Покордамось калавтызе седеем,
ды мон допрок лавшомгадынь.
Учинь седеймарямо – сон киньгак арась,
учинь седеень оймавтыцят – вейкеяк эзь муеве.
22Каясть монь ярсамопельс сэпе
ды симемам самсто макссть тень пек чапамо вина.
23Кадык ули каванямонь столест тенст килькшекс,
ды сынст покшчинь симемаст-ярсамост – кундамкакс.
24Сокоргадост сынст сельмест,
лоткаст сынь неемадо,
ды свал лавшот улест сынст пильгест.
25Валык лангозост Эсь кежеть,
кадык сайсынзе сынст
Тонь палыця-кирвиця инекежень толось.
26Эрямо таркаст улезэ чаво,
коцткудост кадовост эрицявтомо.
27Кинь Тон правтыть-чавить, сень сынь ялатеке пансить
ды ламолгавтыть сетнень майсемаст, кинь Тон томбить.
28Путыть нулгодькс тевест сынст нулгодькс тевтненень,
иляст уле сынь идезь.
29Нардавост сынст лемест эрямо книгастонть,
кадык а улить сёрмадозь сынь видечисэтнень марто вейсэ.
30Мон вана пайстоман ды майсян.
Тонь лезксэсь, Пазом, кадык идесамам.
31Мон карман шнамо [монь] Пазонть лемензэ моросо,
карман сэрейгавтнеме-инелгавтнеме Сонзэ сюкпрянь ёвтазь.
32Истямо шнамось Азоронть мельс седе туи,
аноксокс максозь буканть коряс
эли сюронек-пильгенек максозь вазонть коряс.
33Сэтьметне несызь тень ды кенярдозевить.
Тынк, Пазонть вешницятнень, седеенк
кадык пештявить эрямонь од вийсэ.
34Эдь Азорось мари арасьчисэтнень
ды а стувтни Эсензэтнень, конат аштить пекстамо кудосо.
35Кадык шнасызь Сонзэ менелесь ды модась,
иневедтне ды сынст эйсэ весе эрицятне.
36Пазось идесы Сиононть ды
стявтсынзе Иудань оштнень.
Сонзэ раськесь озы тозонь эрямо,
ды те масторось тееви сынст уличикс.
37Сонзэ уретнень эйкакшост-нуцькаст туртов
максови масторось,
ды Сонзэ лемень вечкицятне
кармить эрямо сонзэ лангсо.
*а 68:3 чеядавкс – болото
Глава 68