Выбрать язык
Книги Ветхого Завета
Книги Нового Завета
с русским текстом1Моравтомань ветицянтень. Давидэнь псалмась. Моро.
2Кадык сти Пазось△,
кадык сравтневить Сонзэ душманонзо,
ды чиезь туить Сонзэ чачонть икельде весе,
кить Сонзэ а вечксызь!
3Кода качамось сравтневи,
истя Тон сынсткак сравтнесыть.
Кода штась солы толдонть,
истя зыяновтне кулсить-маштневить Пазонь чачонть икеле.
4А вана видечисэтне кармить эрьгелеме
ды кеняргалеме Пазонть икеле.
Сынь ушодыть киштеме-морамо.
5Морадо минек Пазонтень, шнадо Сонзэ лементь,
шнадо пель ланга Ардтницянть.
Сонзэ лемесь – Азоро, кенярдодо Сонзэ икеле!
6Сон урозтнэнь тетя ды доватнень кисэ аштиця,
Пазось Эсензэ иневанькс эрямо таркасонзо.
7Пазось максы кудо ды кудораське
ськамост кадовозтненень,
олякстомтсынзе терттнеде
пекстамо кудосо аштицятнень,
а вана каршо молицятнень кадсынзе пултыця чаво модас.
8Пазом! Зярдо Тон ветить Эсь раськеть,
зярдо Тон ютыть чаво модава,
9сестэ модась сорнось,
ды менельстэнть, кона солась, валсь пиземе Тонь икеле,
Синаень Пазонть, Израилень Пазонть икеле.
10Виев пиземеть Тон валыть коськезь, вийтеме модат лангс.
Тон сонзэ вельмевтик-виевгавтык.
11Тонь раськеть озась эрямо тозонь.
Пазом, паро мелеть кувалма
Тон анокстык эрявиксэнть кажовтнень туртов.
12Азорось ёвтызе валонзо,
аватне ламонест пачтить изнямодо кулянть.
13Инязортнэ ушмонек оргодить, сынь оргодить,
а вана кудосо аштиця аватне явить нельгезенть-саезенть.
14Тынь лоткиде [эсенк] эрямо таркатнес теке гулька,
конань сёлмонзо вельтязь сиясо,
толганзо – ванькс цитниця сырнесэ.
15Зярдо Весеменькирдицясь сравтнинзе
инязортнэнь те моданть лангсо,
Селмон пандось теевсь ашокс, теке лов.
16Васан пандось – те Пазонь пандось,
Васан пандось сэрей, ламо тёкш марто!
17Мекс тон, ламо тёкш марто пандо,
сельмень сявадозь ванат се пандонть лангс,
конань лангсо Пазонть мельс тукшны эрямс,
ды косо Азорось карми эрямо пингеде пингес?
18Пазонть крандазонзо ламодояк ламо, тёжань-тёжат.
Сынст ютксо Азорось Синаень лангсо, Эсь иневанькс таркасонзо.△
19Тон кепедевить верев, ветить мартот полонс понгозтнень,
саить казнеть ломантненень,
кадык каршо молицятнеяк эрявольть-аштевельть
Азоро Пазонть кедьсэ.
20Шназь улезэ Азорось!
Сон чиде чис канды минек стака ашконок.
Сон минек идиця Пазонок.
21Пазось минек туртов – идиця Паз.
Весеменькирдиця Азорось менсти куломадо.
22Пазось тапасынзе Эсензэ душмантнэнь пряст,
пондакш човонест, сетнень,
конат ваясть эсест нулгодькс тевезэст.
23Азорось мерсь: «Мон велявтсынь сынст Васансто,
таргасынь иневеденть потмакссто
24сень кисэ: нававлить тон эсь пильгеть,
кода тонь пинетнеяк эсь келест,
душмантнэнь верьс».
25Пазом, весе неизь Тонь яксемат,
монь Пазонть, монь Инязоронть яксеманзо
иневанькс эрямо тарказонзо.
26Икеле ютасть морыцятне,
удало – седямопельсэ налксицятне,
куншкасо – тимпантнэнь*а марто тейтертне:
27«Шнадо Азоро Пазонть покш промкссо,
тынь, Израилень ломанть!»
28Тосо Вениамин, веженсесь, сынст ветицяст,
тосо Иудань прявттнэ эсь ломанест марто,
тосо Завулононь ды Неффалимень прявттнэяк.
29Тонь Пазось макссь-аравтсь теть вий.
Пазом, невтик нейгак миненек Эсь виеть, кода икеле!
30Иерусалимень озкудот кисэ инязортнэ сыть
ды кандыть Тонеть казнеть.
31Кардык се раськенть,
кона теке нудей пулос кекшезь идем ракша,
кона теке букань стада вазонь кондямо раськетнень ютксо.
Сон эсь прянзо покорды сиянь валовксонь максомасо.
Сравтнить раськетнень, конат бажить кепсемс тюремат.
32Кучозтне сыть Египетстэ,
Ефиопиясь венстясынзе кедензэ Пазонтень.
33Модалангонь мастортнэ! Морадо Пазонтень!
Гайгевтеде шнамо Азоронтень,
34менельганть ардтницянтень, пингеде пингень менельганть!
Кунсолодо, Сонзэ вайгелезэ гайги, кода пурьгинень зэрть.
35Шнадо Пазонть виензэ!
Покш Сонзэ Инязоронь инексчизэ Израильсэ,
Сонзэ аонкставиця виесь пачколи пельтнес.
36Тандавтыця Тон, Пазом, Эсь иневанькс эрямо таркасот!
Израилень Пазось – Сон максы вий ды кемечи [Эсензэ] раськентень.
Шназь улезэ Пазось!
Шнамо
*а 67:26 тимпан – ручной барабан, тамбурин
Глава 67